HABAKUK 2 - BIBALDA TA PELDETTA

Kitata vi sum sa Kaldeena

¹ Nan ka coli hay liy ma nan li lop hayamna, kulo kay simdira, nan ay coli kiliŋ kay hum va ma Lawn min di tanu, va ma nan min dumu bugol tiyta van talamu.

² Ma-Vatɗin sli ditiya di tanu: Ɗo sle ma nan ɗekem kiraŋu, naŋ ma cum kulo hay tablona, kay sumun kaf ma jaŋamu.

³ Kay va ma nan ɗekem kiraŋŋa kayni buram ka co goboyo, nam ka tuɗ hay yalam ma vatn ɗaw, nam as hinaŋ goy sinɗi. La yalam vi ne' kaw, naŋ cubum tige, kay va namna ma li'e gasiya, jaram as kal goy gineɗi.

⁴ Ɗuwaŋu, diksi hobay hiɗi suburta, nisi may colay hay ɗigerta loɗi. May sa ma ɗigera ma mus iriya kuɗ vida.

⁵ Suw kayni lo, dolayna mi va ma ɗutaŋ goyo, sum sa gar suburta may lak ŋal kiliŋɗi, nisi mal vunsi goyo ki zulla vi sa mitin nala, haysi may hob noŋɗi ki mitta nala kaw, nisi nem jaf-sumun tisi kafe, nisi tok sumun tisi kafe.

⁶ Sum sa nisi lassina ma muɗ ɗuwsi ɗawn ki junda ɦawa nala, ki va ma burahta ma gasiyam mayɗi nala. Sumun ma di kisi ala: Joot kay sum sa tok faray ma may visiɗina. Ta-ta lancitige? Nisi sa zat balla kisi lo kisi lo.

⁷ Fat tara'a sa sumay slena ma yaw kulo'o ɗisu? Nisi ma co'o, nisi sa nigi ɦiwirsina, nisi ma zliy kulo'o, nisi ma muɗ kigiya, vurumgiya.

⁸ Nigiya nigi vurum jaf-sumun ŋolo, Jaf-sumun segen kaf ma muɗ vurumgi nigiya, kay busuw sumun ma nigi ɦokom goyna, kay ɦawlata ta nigi la' tam sumuna, tam hoyok-ziyna hiɗi sum sa hayam kafna.

⁹ Joot kay sa ma gar faray ma bay-ɗigera kay ziyna valamu, sa ma min in ziyna valam kulo hay liyn ma ginena, ala va ma joo ma fumɗi.

¹⁰ Dok-dok nigi ka gar yalla, kay hot yam nuroygin gaa'a: Nigi vat jaf-sumun goy ŋolo, nala sum segen ma vat irita vigi goy lay.

¹¹ Kay hiɗiyn ma jak gulmunna ka siwel kigiya, gu ma gan ziyna ka hotom dita kaw.

¹² Joot kay sa ma tun sem hoyok-ziyna valam gaa hiɗi busuwna, sa ma tun sem hoyok-ziyn gaa hiɗi jiw-zlata.

¹³ Dit kayni may goy vi Ma-Vatɗina, Lawna vi vok-ma-duura pa ɗisu? Nisi ka mak tuwsi kay kot slen mi kut ɦawa, nisi ka mak tuwsi kay sle ma waa'a ɦawa.

¹⁴ Kay nagata ya' ma hoba hiɗi sum sa wi gajijita vi Ma-Vatɗina, ki niyn ɗub yam nagat nala.

¹⁵ Joot kay sa ma vul va ma cina ma galakŋa mi sugolomna, sa ma ɦok dolay ma hay genta valamu, vulum mi ɓasulumna kay nam hiwira, a nam ma ɗuw nalata valamu.

¹⁶ Nigi ma hob hiɗi zulota, may hiɗi suburtaɗi; Nigi kay tuwgiya, nigi min ci'e, kay sumun ma wi nalata vigiɗi may su? ɦiyda ta ɗigerta vi Lawna ma muɗ kigiya, gajijita vigi ma muɗ goy zulo ta ŋolda.

¹⁷ ɦawlata ta nigi la' hay Libaŋ ma hot kigiya, ki nigi ci muura ŋolo haya nala, nigi ɦok busuw sumun goy ŋolo, nigi li ɦawlat ŋolo tam nagata hiɗi sum sa haya'na.

¹⁸ Va ma ceɗay hiɗi ɓamta as gutgi hiɗi mige? Kaway ma yorayna nam hataŋ sinda ɦawa, sa ma ceɗ slena hiɗi ma yor slen kaw, tun caw vi hay sle namna cani, ta-ta nam girif lawayn ma waana ma gidiŋŋa kay mige?

¹⁹ Joot kay sa ma di tam guna ala: Fokaŋ kulo'o, hiɗi sa ma di tam hiɗiy ma vunam diɗina ala: zliyaŋ kulo'o. May hiɗiyn as daŋ va su? Nisi kor ora hiɗi wayta tam hiɗiyna, ma suk may hayamɗina.

²⁰ Kay na'ta, Ma-Vatɗina ka hay Tempella valam ma peldetna, hin sum sa hay nagat kaf lak ŋal kiliŋ vok iramu.