GATTA-SEM-MA'TA 3 - BIBALDA TA PELDETTA

Hay li ma nisi sli nagata vi Og mulla vi Basan

¹ Nay hotay bugolaya kay jik hay hagata vi Basan. Og mulla vi Basan kalay goyo kay ŋafay iraya, nam hiɗi sumuna valam kaf, kay duraya hay Edrey.

² Ma-Vatɗina di tanu: Naŋ ma li nar kalamɗi, kay nan min vulum hay ɓaŋu, namu hiɗi sumuna valamu hiɗi nagata valam noŋ kaf, naŋ ma li talamu ki naŋ li tam Sihon mulla vi sa Amoriyana sa ka li ziy hay Hesbon nala.

³ Ki kayn nala Ma-Vatɗina vul Og mulla vi Basan hay ɓaya, namu hiɗi sumuna valam noŋ kaf; nay kol kalamu, sa valam mara kep kaw nay hinim pir goyɗi.

⁴ Hay na'ta kayni nay sli hoyok-ziyna valam noŋ kafe, hoyok-ziy mara ma hin goy bay nay slum mayɗi, hoyok-ziy ŋulon dok-karkiya, galla vi Argob noŋ kafe, mulda vi Og hiɗi Basan kafe.

⁵ Hoyok-ziy namna kaf gulmun talamu, hiɗi gulmun ma ini kulo fiyokŋa, vunam ma dukŋa ɓalay dono'o; hoyok-ziy ma bay gulmun kaw kaw ka'a, nam ka ŋol dak-dak.

⁶ Nay ɓulakam goy kafe, ki nay li tam Sihon mulla vi Hesbon nala, sum sa hayamna, jufayna, boyna hiɗi gurosgurayn kaw nay cisi goy kafe.

⁷ May farayna hiɗi sle ma hay hoyok-ziyn kaf nay ŋomom ir maya.

⁸ Ki kayn nala, hay na'ta kayni, nagata ta goy gal hena vi niy-lumna Yordan nay yawa' hay ɓam muliyana vi sa Amoriyan sa ma'na kafe, tun caway hay niy-ma-riŋŋa vi Arnon pa ta-ta kulo kay hiɗiyta vi Hermon.

⁹ Sum sa Sidonna yi Hermon ala Siriyon, sa Amoriyana ya' ala Senir,

¹⁰ hoyok-ziy ma hay ɗiŋiriŋŋa kaf, Galaad hiɗi Basan kaf ta-ta hay Salka hiɗi Edrey, hoyok-ziyna vi mulda vi Og hiɗi Basan.

¹¹ Og mulla vi Basan hin iri kuɗ sumuna vi Refayim kayn mi nam kepe. Va ma buura valamu koti hiɗi kawaya, va ma buur namna ka tuni hay Rabbat, nagata-ŋolda vi sa Amonna. Fiyokka valamu ir goldoŋ zleeŋe, be'da valamu vi goldoŋ fiɗi. Ki ŋaɓta ta sumun ka ŋaɓa' kafta nala.

Hay li ma nisi ɓuraw nagan jar sa fi Rubenna Sa fi Gadna hiɗi gal jafna vi Manase

¹² Hay liy namna kayni nay sli naga na'ta. Naga ma tun caway hay Arower pa, kel niy-ma-riŋŋa vi Arnon hiɗi gal nagata vi Galaad hiɗi hoyok-ziy ma hay kaf, nan vulum mi jafna vi Ruben hiɗi jafna vi Gad kafe.

¹³ Caw nagata vi Galaad hiɗi mulda vi Og hay Basan kaf, gal nagata vi Argob, hiɗi Basan kaf ma nisi ay yum ala nagata vi Refayim kaf, nan vulum mi gal jafna vi Manase.

¹⁴ Yayir goora vi Manase sli gal nagata vi Argob kafe ta-ta hay jaara vi sa Gesuriyena hiɗi sa Maakatiyena, nam tun selem tam Basan, ta-ta vaydi kaw nisi ka yi Basan ala hoyok-ziyna vi Yayir.

¹⁵ Nan vul Galaad mi Makir.

¹⁶ Galla vi Galaad nan vulum mi gurona vi Ruben hiɗi gurona vi Gad, ta-ta hay niy-ma-riŋŋa vi Arnon, way-niyna mi jar nagata kaw, ta-ta hay niy-ma-riŋŋa vi Yabok, jar nagata vi sa Amonna;

¹⁷ hiɗi Araba kaw, vuna' dab tam Yordan, tun caway hay Kinneret pa ta-ta tam niy-lumna vi Araba, niy-lum ma Mandana, ta-ta gaa hay sem hiɗiyta Pisga, hay gal ma kuɗuwna.

¹⁸ Hay na'ta kayni, nan vulgi dit ala: Ma-Vatɗina Lawna vigiya vulgi nagat kaynawa, kay na' ma muɗ goy vigiya. Nigi kaf, sum sa dikgi dono'o, nigi ma jik hiɗi sle ma duura vok guro-biyogina sa Israyella.

¹⁹ Boyna vigiya, gurona vigi sa gurayna, farayna vigi kaw, nan wi ala nigi ka hiɗi farayn ŋolo, nam ma hin hay hoyok-ziyna ma nan vulgitna,

²⁰ ta-ta hay li ma Ma-Vatɗina vul tun-sukka mi guro-biyogina sa Israyella ki nigi nala kaw, ta-ta nagata ta Ma-Vatɗina vulsiya goy jiy niy-lumna Yordan na' ma muɗ visiya ki nigi nala kaw, nala bugolda gigekaw ma hot hay liyn ma nan vulumtina.

²¹ Hay na'ta kayni, nan vul dita tam Yosuwa ala: Slen ma Ma-Vatɗina Lawna vigiya lum tam muliyan nisi sa ma'na iraŋ wumawa: Mulda ta nigi ma jik haya' kafta Ma-Vatɗina ma li ta'a ki kayn nala kaw.

²² Ligi nar kisiɗi, kay Ma-Vatɗina Lawna vigiya ka dur hay baŋalgiya.

²³ Hay na'ta kayni, nan ka giɗel del Ma-Vatɗin ala:

²⁴ Bum-Sumuna Ma-Vatɗina, naŋ tun caw ɗek ŋolda vaŋu hiɗi gaŋeraŋa vaŋu goy tam sa ma sunda vaŋawa, Lawn mara'a ma gaa kay nagat tani ma as li lop ma naŋ lumna hiɗi lop ma ŋulo ŋulona mi Lawn marige?

²⁵ Nan siɗawaŋu kay nan min ɦaw goyo kay ɗuw nagat ŋaata na'ta hiɗi hiɗiy ŋaana namna vi Libaŋ ma ka goy bugol niy-lumna Yordan.

²⁶ May Ma-Vatɗina dikam muɗ ɦiy katanu, kuɗgi nigiya, nam min human loɗi. Ma-Vatɗin di tanu: Asaya, naŋ ma dan law namna loɗi.

²⁷ Jikaŋ kulo sin hiɗiyn Pisga, cukaŋ iraŋ hay gal ma vulatina, gal ma gaana, gal ma kayamna hiɗi gal ma kuɗuwna, ɗuwaŋ hiɗi iraŋu; kay mige naŋ kay tuwaŋu ma ɦaw Yordan kuloɗi.

²⁸ Hinaŋ dita vaŋ tam Yosuwa, lum dono'o muɗum kursuliya; kay sumun tani tun voksi ɗawn mi namu, nagata ta naŋ ɗuwa'ta ɗawni, ma vula' voco mi nisi ɗawni mi namu.

²⁹ Nay lakay hay hoyok-ziyna, ɗiger vok Bet-Pewor.