GATTA-SEM-MA'TA 21 - BIBALDA TA PELDETTA

Sum sa fisi goy mitina

¹ La nigi coowa hay nagata ta Ma-Vatɗina Lawna vigiya min vulgiya kay nigi ma lak haya'a, la nigi fi san waŋ' tuwam ka kaay goy mili, nam mitiya, ka giy goy hay fulda waŋi, may nigi wi sa ma calamnaɗi ni,

² sa maariyana vigiya hiɗi sa ka kitata ma tuɗa kay ŋaɓ jar-liyna ma nam ka miti hayamna hiɗi hoyok-ziy ma talam goboyna.

³ Hay li ma nisi fi hoyok-ziy ma nam talam goboynawa, sa maariyana vi hoyok-ziy namna as vi put ta gunayta kep ta sa bay li lop hiɗi na' tuwa, ta sa bay tun juk pela' tuwa.

⁴ Sa maariyana vi hoyok-ziy namna nar putta gaa hay niy ma riŋŋa ma may so goyɗina, liyn ma sa may zum hayɗi, cuk jaf hayɗi layna, ɗawni hay niy-ma-riŋŋa nisi ma mun taɓar putta goyo.

⁵ Bugol kayni muliyan-sa-ɗifinna, gurona vi Levi, nisi ma co'o; kay Ma-Vatɗina Lawna vigi vileksi kayni kay nisi ma sunumu, kay gi bolo hay semda vi Ma-Vatɗina, kay law ma ci-wayt hayamna hiɗi ci ma ci sana dum lawam kaf kayn si nisiya.

⁶ Sum sa maariyana sa hay hoyok-ziy namna ma goboy hiɗi sa ma mitina as muz ɓisi gaa kay putta ta nisi muna' taɓara' gaa hay niy-ma-riŋŋa.

⁷ Nisi ma li di-goyta ala: Ɓuma'a may ɦok busuw namna goyɗi, irma may wi sa ɦok busuw namna goyɗi.

⁸ Ma-Vatɗina, laŋ poora kay sumuna vaŋ sa Israyella sa naŋ butsi goyna; busuwna vi sa ma may li jooɗina naŋ ma jobom tam sumuna vaŋ sa Israyellaɗi, ki kayn nala nisi ma fi poora kay busuw ma jaŋ goyna.

⁹ May nigiya sa ma ɦok busuwn goy jargina nigi ma bam iram goyo, hay li ma nigi li sle ma ɗigera vok ir Ma-Vatɗina.

Boyn sa yawsi ay vun duura Galla vi guro sa vuɗi jewna Guro sa ŋel gatta

¹⁰ Hay li ma nigi cukawa goyo kay dur sa gawt kigina, la Ma-Vatɗin vulsiyawa hay ɓigiya, la nigi yawsiyawa gorvo'o,

¹¹ kla jar sa gorvona la irgi cuk kay cat ta jifiya, nigi as vi bono hiɗi na'a, sla' ca'a.

¹² Sa ma sli cat na'ta as nara' kalaf hay ziyna valamu, na' wel ya' goyo, ka tireka' goyo kaw,

¹³ na' ma fok sligara va' ma va'ay hiɗi namna goyo, na' ma mus hay ziyna vi jufa'a, tiy bu'a hiɗi su'a ir til kep. Bugol kayni jufa' as tuɗ ta'a, sla' ca'a, na' muɗi ti cata valamu may.

¹⁴ La na' muɗawa kir jufa' bisi, nam hina' tuɗ hay liyn ma na' mina. Nam as gusa' goy hiɗi gurjuɗi, muɗa' gorvoɗi kaw, kay jewe nam buri ta'a.

¹⁵ La san ka hiɗi boyn ma', nam min heta suw heta ni, la ta nam mina' suwta gurona va' ka'a, ta nam mina' kiɗayta gurona va' ka lay, la goor ma vuɗi jewna nam vi ta nam mina' kiɗayta ni,

¹⁶ hay li ma nam tun caw ɓuraw farayn jar gurona valam ɗawni, galla vi goor ma ŋolla nam as vulum mi goora vi cata ta nam mina' suwtaɗi, may nam vulum kayni mi goora vi cat ta nam mina kiɗayta, kay namu mi ma ŋolla.

¹⁷ May goora vi ta nam mina kiɗayta nam ma ɗuwum ki nam ma ŋolla nala, galla valamu nam as kay vulumti goy suw sem ma', kay nam kayni mi vun-jaf ma jewna vi donota valamu. Nam mi ma ŋolla dok-doko.

¹⁸ La san ka hiɗi goora valam mara kep ma humɗi, ma ŋel gatta, hum vun sulumɗi, hum vun bulumɗi kaw, la nisi watam kaw nam hum kuɗsiɗi,

¹⁹ bulum hiɗi sulum ma vumu, naram kat sa maariyana vi hoyok-ziyna, goy hay vun-galana vi ziyna hay hoyok-ziy ma nam ka haya,

²⁰ nisi ma di tam sa maariyana vi hoyok-ziy ma nam ka hayamna ala: Goora vuma zawni, nam may humɗi, nam ŋel gatta, hum kuɗmaɗi, goor ma viyuwu, ma ci dolayna.

²¹ Ki kayn nala sum sa hay hoyok-ziyna valam kaf ma gum hiɗi goorhoyona, nala nam ma mita. Ki kayn nala nigi ma pat joot goy jargiya, kay sum sa Israyel kaf ma hum kayni, nisi ma li nari.

Tuwna vi sum sa ɓalay kulo kat guna

²² La san li suluk ma nagay kay mittawa, la cumawa mati, ɓalamawa kulo kat guna,

²³ tuwna valamu as kay bur tos' kulo kay gunɗi; may nigi ma pum hay buurta na'ta de'. Kay sa ma ɓalay kat guna namu beɗaya vok ir Lawna, ki kayn nala nagata ta Ma-Vatɗina Lawna vigi min vulgit voco'o nigi ma muɗa' liwisɗi.