GATTA-SEM-MA'TA 18 - BIBALDA TA PELDETTA

Galla vi muliyan-sa-ɗifinna hiɗi sa Levitna

¹ Muliyan-sa-ɗifinna sa Levitna, jafna vi Levi noŋ kaf, gal vocota visi may jar sa Israyelɗi, tina visi kayni mi ɗifin ma ŋalay hay kuta ir vi Ma-Vatɗina, tina visi kayni mi vocota vi Ma-Vatɗina.

² Nisi as yaw voco jar guro-biyosinɗi, Ma-Vatɗina mi vocota visiya, ki nam di tisi nala.

³ Kayni mi gal ma sumun ma vulum mi sa Levitna kuɗ putu lebo goor ɦu-dimiya ma nigi ŋatan ɗifinna: Deɓella vulum mi mul-ma-ɗifinna, sin-ɦuna hiɗi ruwatna.

⁴ Nigi ma vulum vun-jaf ma jewna vi alkamarena vigiya, vi vin ma jibetna vigiya vi mula vigiya, hiɗi vun jaf ma jewna vi ɗuŋus fukunayna vigiya;

⁵ kay mul-ma-ɗifinna kayni mi sa ma Ma-Vatɗina vilekemu jar jaf-sum segen kaf, kay nam ma col li lopna ma hay semda vi Ma-Vatɗina dok-dok, namu hiɗi gurona valamu.

⁶ Hay li ma sa ma Levitna hin hoyok-ziyna vigi mara'awa kepe, liyn marige kaw ma nam ka musi ziya jar sa Israyella, kay tuɗ mus kuɗ minda valamu hay liyn ma Ma-Vatɗin vilekemawa,

⁷ la nam ka li lopna hay semda vi Ma-Vatɗina Lawna vigiya, ki guro-biyogi segena kaf nala, sa Levitna sa ka lakay lak' vok Ma-Vatɗina,

⁸ nam ma fi tina valam ŋray ca ki nisi nala, lo ir slena valam ma nam gusumis goyn nam valamu.

Gireyta hiɗi gul-yalda, lopna vi sa jobta-Lawna

⁹ Hay li ma nigi coowa hay nagata ta Ma-Vatɗina Lawna vigi min vulgiya, nigi ma hat tuwgi kay li lop ma liwisna ma sum sa hay nagat heta ka lumnaɗi.

¹⁰ Sa ma ŋal goora lebo goota valamu hay kuta ma li jargiɗi, sa ma tun gireyta ma li jargiɗi, sa ma kiwena ma li jargiɗi, sum sa di fulla hiɗi sum sa guna ma li jargiɗi.

¹¹ Sa sli zuwna, sa tuɗ tam sum sa job kuɗ fuliyana lebo sa di slen ma voksina, sum sa job kuɗ sa kiwena kaf ma li jargiɗi.

¹² Kay na'ta, gigekaw li sle namna lakŋi, nam liwisi kir Ma-Vatɗina; kuɗ liwis na'ta kayni Ma-Vatɗina Lawna vigiya min digiɗ sa gawt kigin vokgi ɗawni.

¹³ Nigi ma hin tuwgi noŋ kaf hay ɓam Ma-Vatɗina Lawna vigiya,

¹⁴ kay jaf sum sa nigi munsi vokgin ɗawni nisi hum dita vi sum sa di slen voksina hiɗi sa tun gireyta. May nigi hayɗini, Ma-Vatɗina Lawna vigiya may vulgi hagat kay li slen kaynɗi.

¹⁵ Ma-Vatɗina Lawna vigiya ma day yam sa ma jobta mara kulo jargi kep ki nan nala, nigi ma humgi kuɗumu!

¹⁶ Kaf kayni mi sle ma Ma-Vatɗina jobom tigiya hay Horeb, hay buur ma tokŋa, hay li ma nigi ka di ala: Numa min hum del Ma-Vatɗina Lawna vuma mara loɗi, numa min ɗuw kut na'ta ta ŋolda loɗi, kay numa'a ma mitɗi.

¹⁷ Ma-Vatɗin di tan ala: Slen ma nisi dumna kayn nam ŋaa'a.

¹⁸ Nan ma day yam sa mara'a ma jobta kulo jar guro-biyosina ki naŋ nala, nan ma tun yoboyna van hay vunamu, nam ma disi slen ma nan dumtin kaf.

¹⁹ La sa min hum yoboy ma nam dum hay semda vannaɗi, nan kay tuwanu ma jobom vunamu.

²⁰ May sa ma jobta ma wuraŋga kalawa hayamu kay di slen ma nan dumtaɗina hay semda vanu, lebo sa ma jobta ma di slenawa hay sem lawayn mara'a, sa ma jobta namna ma cum goy mati.

²¹ Li ŋalɗi nigi ma di hay dikgi ala: Nay ma wi ala yoboyn kayni may dum mi Ma-Vatɗinɗi ɗawn hiɗi mige?

²² Hay li ma sa ma jobta di slenawa hay semda vi Ma-Vatɗina, may la sle namna may liɗi, lebo may coɗi, kayni may mi yoboy ma Ma-Vatɗin may dumɗi. Kayn di ala sa ma jobta namna dum kayni hiɗi wuraŋga, nala tuwgi ma li nar kalamɗi.