GATTA-SEM-MA'TA 10 - BIBALDA TA PELDETTA

¹ Hay liy namna kayni, Ma-Vatɗin dan ala: Ceɗaŋ table hiɗiyn ma' ki ma jewn nala, jikaŋay kulo tanu kay hiɗiyna; naŋ ma kot timgil ma guna kaw.

² Nan min ɗo hayamu yoboyn ma ay hay table ma jewna, ma naŋ tom goyna, bugol kayni naŋ ma burum hay timgilla.

³ Nan kot timgilla hiɗi gu-kasiyana, nan ceɗ table-hiɗiyna ma' ki ma jewna nala, bugolda nan jik kulo kay hiɗiyna, tablena ma ma'na ka hay ɓanu.

⁴ Yoboyna ma doogona ma ay ɗoy hay tablena ma jewna Ma-Vatɗina hot ɗom hay tablena namna ma ma'na, kayni mi yoboyn ma doogona, nam dumu kulo kay hiɗiyna, goy jar kuta pa, hay buur ma tokŋa; Ma-Vatɗina vulan yoboy namna hay ɓanu may.

⁵ Nan hot bugolanu, nan jik gaa kay hiɗiyta, nan lak tablena hay timgilla ma nan kotomna, nam cuki hayam ca, ki Ma-Vatɗin vul hagata tanu nala.

⁶ Sum sa Israyella yaways hay Beerot-Bene-Yaakan pa, kal hay Mosera. Kayni mi liyn ma Aaron mit hayna, nisi pum hay liy namna kaw. Goora valam Eliyazar vurna baŋalamu hay lopna vi ɗifinna.

⁷ Nisi yaways hay ɗawn pa kalay hay Gudgoda, hay Yotbata, nagata ta niyn ka riŋ haya.

⁸ Hay liyn namna kayni, Ma-Vatɗina poŋ ir jafna vi Levi goyo, kay nisi ma ziy timgilla vi bonota vi Ma-Vatɗina. Kay nisi ma lak vok Ma-Vatɗina kay li lopna valamu, kay gi bol kay sumuna hay semda valamu, (kayni mi slen ma nisi ka lumu ta-ta vaydi).

⁹ Kuɗ na'ta kayni galla hiɗi vocota vi Levi may jar ɓosiyomnaɗi, Ma-Vatɗina mi vocota valamu, ki Ma-Vatɗina Lawna vigiya di tigi nala.

¹⁰ Nan mus kulo kay hiɗiyta, ki jew nala, ir buur dok-fiɗi. Hay na'ta kayni Ma-Vatɗina hum siɗawta van lo, kay nam may min kay vatgi goyɗi.

¹¹ Ma-Vatɗina di tanu: Fokaŋ kulo'o, tuɗaŋu, tunaŋ vok sumuna. Naŋ ma narsi hay nagata ta nan yi va kanu vun sumaysi ala nan min vula' misiya.

Gatta kay lak hay hum-vunda hiɗi minda

¹² Wulin kayni, nigi sa Israyella, Ma-Vatɗina Lawna vigi jobom tigi kayni mi mige? Nam min kayn ala nigi ma li nar kuɗum nam Ma-Vatɗina Lawna vigiya, kay nigi ma poy hay hagata valam kafe, min Ma-Vatɗina Lawna vigiya, sunum kaw hiɗi dikgi kaf, hiɗi ciwta vigi kaf;

¹³ Ma-Vatɗin job tigi kayn ala nigi ma li kuɗ vun-ma-gatna valamu hiɗi slen ma nan ɗom tigi vaydina kaw kay nigi ma lak hay sle'ta ɗisu?

¹⁴ Humgiya dukalawna hiɗi dukalawna ma suw dukalawna nam vi Ma-Vatɗina Lawna vigiya, nagata hiɗi sle ma haya'na kaf kaw.

¹⁵ Ma-Vatɗina jun kay li minda kayn hiɗi sumaygi tuta; bugolsi nisi kayni si jafna valamu, si nigiya, nam vilekgi goy jar jaf-sumun kaf ki nigi ka wi vaydi nala.

¹⁶ Nigi ma ka gosay mi dikgiya, nigi ma li yigi ɗeŋɗi.

¹⁷ Kay Ma-Vatɗina Lawna vigiya mi Lawna vi lawayna, Bum-Sumuna vi sumay sumuna, Lawn ma donona, ma narta kuɗumna, ma poŋ ir saɗina, ma yaw vulda vi saɗina,

¹⁸ ma li ɗigerta mi sa ma kuyuna hiɗi cata duhulta, ma min sa ma pulla, vulum tina hiɗi sligara kaw.

¹⁹ Nigi ma min sum sa pulla, kay nigi kaw ay pulu hay nagat Egipte.

²⁰ Nigi ma li nar kuɗ Ma-Vatɗina Lawna vigiya, nigi ma girifimu, nigi ma jun tuwgi talamu, nigi ma yi va kigiya hay semda valamu tuta.

²¹ Namu mi gajijita vigiya, namu mi Lawna vigiya: Namu mi ma li slen ma ŋulona ma ɦuyumda kuɗumna jargiya, slen ma irgi wum wulin lakŋi.

²² Sumaygiya kal hay Egipte kayni nisi ka ir sumun dok-siɗiya ɦawa, may wulin Ma-Vatɗina Lawna vigi biyagiyawa ŋolo ŋray ca ki mislek ma dukalawn nala.