GALATENA 6 - BIBALDA TA PELDETTA

Gut-tuwta ta jar-tuwayta

¹ Ɓosiyonna, la sulukŋa nem sanawa, nigi sa hay Ŋusta gutgi kuɗumu hiɗi dikga ŋalda, may li ŋal mi tuwaŋu kay naŋ kaw ma kal hay nemdaɗi.

² Ziygi jakŋa vi tuwgiya tuwgiya, ki kayn nala nigi ma hob vun vun-ma-gatna vi Kristu.

³ La san var ala nam ŋolo, nam ɗutum kayn mi tuwam ɦawa, nam may mi sa ma ŋolɗi.

⁴ Hin san gigekaw wak lopna valam kay tuwamu, kay na'ta nam ma fi suburta kay tuwam ɗeŋe, may kuɗ sa maraɗi.

⁵ Kay gigekaw ma ziy jakŋa valam kay tuwamu tuwamu.

⁶ Sa ma ka hay hatta vi yoboyna hinim ɓuraw slena valam ma ŋaana kaf hiɗi sa ma ka hatamna.

⁷ Ɗutgi tuwgi goyɗi, Lawna may hin sa ŋulumɗi, kay jaf mige kaw ma san wasam gaana nam ma feɗemu.

⁸ Nam ma was kuɗ sliwna, nam ma feɗ ɓulak-goyta kuɗ sliwna, may nam ma was hay Ŋusta, nam ma feɗ irita vatɗita kuɗ Ŋusta.

⁹ Nay ma mak kay li ŋaatɗi, kay nay ma feɗ hay liyamu, la nay so tuwaya.

¹⁰ Kay na'ta nay ma li ŋaata tam sumuna kaf hay li ma nay fi hagata, may suw pet tam ɓosiyay sa hay vida.

Vatta

¹¹ sargi ɗo ma ɗoy ŋulona ma nan ɗom hiɗi ɓan nanna tige!

¹² Nisi kaf sa min ala sumun sarsi ŋaa'a hay sliwna ka ligi dono'o ala nigi ma ka gosaya, kayni hiɗi varta ta ala nisi min ci lasi hiɗi gu-ma-grakŋa vi Kristuɗi tuta.

¹³ Kay nisi sa kaay gosayna kaw may li kuɗ vun-ma-gatnaɗi, may nisi min ala nigi ka gosaya kayni kay nisi min subur tuwsi hiɗi nigiya.

¹⁴ May nanu, kay subur tuwanu kayni gine'e kanu. May nan as subur tuwan kayni kay gu-ma-grakŋa vi Yesu Kristu Bum-Sumuna vaya kepe. Hay namu nagata ɓalay goy kay gu-ma-grakŋa vok-iranu, nanu ɓalay kat gu-ma-grakŋa vok ir nagata kaw.

¹⁵ Kay ka-gosayta kayni may li vaɗi, bay-gosayta li vaɗi kaw, may va ma ŋolla ti vu'da wulita.

¹⁶ Nisi kaf sa hum kuɗ gatta kayni, sle'ta hiɗi lamanda ka kisiya, kay sa Israyella vi Lawna kaw.

¹⁷ Tun caw wulin pa, sa may makan tuwan loɗi, kay ɦuɗukŋa vi Yesu ka tumi tam tuwan vatiya.

¹⁸ Ɓosiyonna, slugota vi Bum-Sumuna vaya Yesu mus hiɗi Ŋusta vigi musge. Amen.