GALATENA 5 - BIBALDA TA PELDETTA

Butta-goyta vi labara ma firina

¹ Wulini Kristu butayawa goyo hiɗi butta-goyta ta gasita. Kay na'ta lakgi dono'o, hingi tuwgi juni gaa kuɗ lop ma gorvon loɗi.

² humgi ŋaa'a, nan Paulus digi ala: la nigi hin tuwgi ka gosaya, Kristu ma li mi va ma ŋaa'a kigi loɗi.

³ Nan min di goyo sem mara kep lo mi gigekaw ma hin tuwam ka gosaya, bal ka kalamu kay li kuɗ vun-ma-gatna kafe.

⁴ Nigi sa min muɗ goy ɗigere kuɗ vun-ma-gatna, nigi ja jargiyawa goy hiɗi Kristu, nigi pukawa gaa hay slugota pa.

⁵ May numa'a, hiɗi vida hay Ŋusta, numa ka cub cubta-sle'ta vi ɗigerta.

⁶ Kay hay Kristu Yesu, gosayta li vaɗi, bay-gosayta li vaɗi, may vida na' kepe li'e hay ti-kamda.

⁷ Nigi tin caway ŋaa'a, may sa ma telgi kay nigi ma li wulin kuɗ gasitɗi kayn gige?

⁸ Gi-yam na'ta kayni may vi nam ma yiginɗi.

⁹ Cuk isna kuɗ futuw hiliɓin neeɗa ɦawa, nam as fokom kulo kuf kafe.

¹⁰ May nanu, vida van ka tuni kigi hay Bum-Sumuna ala: nigi ma var varta taraɗi, may sa ma zliŋgi goyn kayni, la nam mi gigekaw, nam ma fi kitata.

¹¹ May ɓosiyonna, la nan ka kus yoboyn kay ka-gosayta tuwa, nisi ka lasanu ta-ta wulini kay mige? Nala gu-ma-grakŋa ma dab semna may loɗi.

¹² Ŋaata nisi sa ka muɗgi dikgi giriŋi ma kaam goy mi tuwsi noŋo.

Nigi ma lak hay sliwnɗi, may hay Ŋusta

¹³ Ɓosiyonna, nigi yiy ay tam butta-goyta, may hin butta-goyta vigiya muɗ goy hagata vi sliwnɗi, may sungi jar-tuwgi hay ti-kamda.

¹⁴ Kay vun-ma-gatna kafe vunam hobay goy hay dit kepe: dit ta ala; naŋ ma min sugoloŋu ki tuwaŋ naŋ nala.

¹⁵ May la nigi ka siy mi tuwgiya, mut tuwgi jar-tuwgiya kaw, nigi ma li ŋali kay ɓulak tuwgi jar-tuwgiɗi.

¹⁶ May nan digiya, poygi hay Ŋusta, nala nigi ma li kuɗ darta vi sliwnɗi.

¹⁷ Kay darta vi sliwna dur hiɗi Ŋusta, Ŋusta dur hiɗi darta vi sliwna kaw. Nam yaw kulo kat tuwamu, ta-ta nigi muɗ li va ma nigi minɗi.

¹⁸ May la Ŋusta ka tuni vokgiya, nigi may gaa kuɗ vun-ma-gatna loɗi.

¹⁹ May lopna vi sliwna ka goy haraŋi: Kayni, zlata-bulota, liwista, viyuwta,

²⁰ girifta vi lawayn ma waana, li guna, gawta, ci-wayta, hunayta, ɦiyda, lawt jar-tuwsiya, ɓuraw-vunda, ka-irta,

²¹ dar slena vi sa'a, ci mati, ɦoyta kuɗ dolayna, liwta gijum-gijumta hiɗi sle mara'a mara'a. Nan min di tigiya ki nan digi goy jew nala: Nisi sa li slen ki kayn nala ma fi vocota hay mulda-Lawnɗi.

²² May vuɗna vi Ŋusta kayni: Ti-kamda, firita, toyta, cubta-ŋalda, ŋaata, ŋaata-ŋolda, vida, zigin-zlata, tel-tuwna;

²³ vun-ma-gatna may ka gaw hiɗi slen canɗi.

²⁴ May nisi sa ka hay Yesu Kristu, nisi ɓal sliw-tuwna hiɗi minda vi sliw-tuwna hiɗi darta vi sliw-tuwna kat grakŋawa.

²⁵ la nay ka iriya hay Ŋusta, nala poyay hay Ŋusta kaw.

²⁶ Garay subur-tuwtaɗi, nefay jar-tuwayɗi, lay hunayt jar-tuwayɗi kaw.