FILIPINA 1 - BIBALDA TA PELDETTA

Ɗek-tuwta hiɗi gi-deɓta

¹ Paulus hiɗi Timotewus, sa sunda vi Kristu Yesu, tam sa peldetna kaf sa hay Kristu Yesu, sa ka hay Filipi, tam sa ŋomda hiɗi sa sunda:

² Lawna buya hiɗi bum Bum-Sumuna Yesu Kristu vulgi slugota hiɗi toyta tage.

Gi-deɓta hiɗi siɗawta

³ Nan gi deɓ mi Lawna van dok-dok hay liyn kaf ma human ka gan kigiya;

⁴ hay siɗawta van kaf ma kigiya, yan may jok kay siɗaw hiɗi firitaɗi,

⁵ kuɗ tapta vigiya hay labara ma firina ma tun caw hay buur ma jewna pa ta-ta wulini.

⁶ Kay nan wi goy haraŋ ala, nam ma tun caw haygi hiɗi lop ma ŋaana, nam ma dabam yalam kulo'o ta-ta hay buura vi Yesu Kristu.

⁷ Nan fi varta kigi kaf nala hay liyamu, kay nan ka ziygi hay dikanu, kay ki hay jaɓna vanu, hay di-goyta vanu kay ŋaata hiɗi gasita vi labara ma firina, nigi kaf ka hay slugota na'ta hiɗi nanu kaw.

⁸ Kay Lawna as li di-goyta kan ala nan tiy kigi kaf hiɗi luma'da vi Kristu Yesu.

⁹ Va ma nan jobom hay siɗawta van kayn ala: ti-kamda vigi ma li ŋol suwa suwa hay wida hiɗi wida-yalla.

¹⁰ Kay nigi fi poŋ ir slena ma ŋaana, kay nigi ma lak hay gasita, bay joota tam fatta vi Kristu,

¹¹ hobay hiɗi vuɗna vi ɗigerta ma may tam Yesu Kristu, gajijita hiɗi suburta vi Lawna kaw.

Paulus ka law kay daŋgayta valamu

¹² Ɓosiyonna, nan min kay nigi ma wi ala, slen ma li tan kayni muɗi ŋaa'a kay jok labara ma firina goyo.

¹³ Kay, hay Pretoriyomna, goy hay liyn hena kaf kaw, ɗekka li goy haraŋ ala nan ka hay jaɓna kayn kuɗ Kristu:

¹⁴ Ɓosiyon segena ŋolo, sa tun vida visi hay Bum-sumuna kuɗ ta ala nan ka hay jaɓna, nisi muɗ kursuli ŋolo kay kus yoboyna vi Lawna bay narta.

¹⁵ Sara'a, ki nay wi gasi nala, nisi kus goy kay Kristu hay hunayta hiɗi ci-wayta, may segena kusum hay Ŋusta ŋalda.

¹⁶ Nisi kayni li hay ti-kamda, hay wida ala nan tuni kayni kay di goy kay labara ma firina,

¹⁷ may segena sa kus goy kay Kristu hay ŋus ma ci wayta, varta visi may ŋaaɗi, nisi var kayn kay ɦur zumalda tara vun jaɓna vanu.

¹⁸ Li vaɗi! La Kristu kusi goy malam hay del ma bay gasiya, la hay gasita kaw, Kristu kusi goyo; nan firiya, nan ma firi kay kayni lo.

¹⁹ Kay nan wi ala kuɗ siɗawta vigiya, hiɗi gutda vi Ŋusta vi Yesu Kristu, van kayni ma muɗ tam su'da vanu;

²⁰ Kuɗ cubta hermesta hiɗi cubta kuɗ sle'ta vanu, nan ma li zulo kay va noŋ ne' loɗi. May wulini ki dok-dok nala, Kristu ma fi gajijita hay tuwanu, hiɗi kursuliya ŋolo, la hay irita vanu, la hay mitta vanu kaw;

²¹ kay kan nanu, Kristu mi irita vanu, mitta kayni mi va ma ŋaa'a kanu.

²² May la nan mus iriya hay sliwna, kayni mi vuɗna vi lopna vanu ni, li vilek na'ta mi nan su? Nan may wiɗi.

²³ May nan hebay hay galan ma' pete: Hayan dar kay tuɗ mus hiɗi Kristu, kay kayni ŋaa ŋol suwa;

²⁴ may kigi nigiya, kayni ŋaa ŋol suwa lo kay nan mus hay sliwna.

²⁵ Nan wi'e, nan wi goy gasi kaw ala: Nan ma ra hiɗi nigiya, mus hiɗi nigi kaf kaw, kuɗ wulda vigi ta vokka, kuɗ firita vigiya ta hay vida kaw.

²⁶ Kay kuɗ hotta ma nan ma hotis tigina, suburta vigi ma li ŋolo hay Kristu Yesu kuɗan nanu.

Teŋ irta

²⁷ May va kep kayni, poygi ki nagay kay labara ma firina vi Kristu nala, a la nan coys kay ɗuwgiya, lebo coys manɗi kaw, nan ma hum kigi kayn ala nigi ka lakay dono'o hay ŋusta kepe, kay hiɗi ciwta kep nigi ka dur kay vida vi labara ma firina.

²⁸ Muɗgi nar kay sa gawt kigina hay va ne' noŋɗi, kay kayni mi wakka kisiya kay ba-goyta, may kigi nigiya nam mi su'da,

²⁹ Kayni may vi Lawni pa; kay nam li slugotawa tigiya kay nigi vi hay Kristu tutaɗi, may kay fi lasta kalamu kaw,

³⁰ kay tap dur duur namna ma nigi wan durumu, ma nigi humumna kaw, ma ta-ta vaydi nan ka durumu.