ESTER 4 - BIBALDA TA PELDETTA

Sum sa Yudiyana ka hay yorta, nisi li laata

¹ Hay li ma Mardose hum labara kay slen ma ka li'e, nam jet sligara valam goyo, cuk bolla talamu, cuk butuwn kalamu kay tuɗ hay hoyok-ziyna, nam ka tiy tiy ma hawn ŋolo.

² Ta-ta nam co goy vok faatana vi mulla, la sa gigekaw cuki hiɗi sligar bolla talamu, nam as co vun faatana vi mullaɗi.

³ Hay nagata kaf, hay liyn kaf ma dita hiɗi ɗota vi mulla coy haya, sum sa Yudiyana kaf tun caw ti do'olla, nisi li laata, tiya, yor tuwsi ŋolo kaw; sumuna ŋolo bur gaa hay sligar bolla, hay butuwna kaw.

⁴ Guro-boy sa sun Ester hiɗi sa patayna va'a mara' labar namna, nala ca-mulda sutiya' to kaɗa-kaɗa'. Na' jok sligar mi Mardose kay nam ma cukum talamu hay baŋal bolla, may Mardose minɗi.

⁵ Bugolda, Ester yi Hatak kep jar sa patayna ma mulla vulum kay ŋoma'na. Na' dum kay nam tuɗ ŋaf hiɗi Mardose, kay jobomu ala va ma lina mi mige?

⁶ Hatak kalay goyo kay ŋaf hiɗi Mardose goy hay way hoyok-ziyna, ɗiger vok faatana vi mulla.

⁷ Nala Mardose vum labara kay slen ma li talamna kafe, hiɗi ŋaɓta vi gurjuta ta Haman min cuka' hay timgilla vi mulla kaw, kay ci sa Yudiyan goyo.

⁸ Nam vul hay ɓalamu ɗota kepe ta hagata vuli kay ci sa Yudiyana ka ɗoy haya'ta, ta ɗoy hay Susa pa, kay nam ma ɗeka' kir Ester a na' ma hum kayni, lo di ta'a a na' ma tuɗ tam mulla kay tiy vok iramu kay nam ma li slugot mi sumuna va'a kaw.

⁹ Hatak hotay tam Ester hiɗi dita vi Mardose.

¹⁰ Ester hot gi Hatak tam Mardose kay nam ma hot dum ala:

¹¹ Sa sunda vi mulla kaf, sum sa kuɗ nagata vi mulla kaf wi ala san gigekaw, la sa jufu lebo ca'a kaw, la nam min co kalaf hay daŋŋa vi mulla, la nam bay fi yita vi mulla goy jewe, kuɗ gatta nam fi cita-goyta, gatta na'ta kay gige kaf, mus iri kayni mi sa ma mulla meɗem zugulda valam ta ora kiramu tuta. Wulin kayni, buur dok-ɦidi vaydi mulla bay yan tuwa.

¹² Slen ma Ester dumna nisi maram mi Mardose.

¹³ Mardose hot dit tam Ester ala: Ca-mulda, nak ma var ala nak ma suɗ goy jar sa Yudiyana kuɗ ta ala nak ka hay ziyna vi mullaɗi.

¹⁴ La nak mus hiɗi vunag duki dok-doko, vok lawt kayni, butta-goyta vi sa Yudiyana ma coy goy hay liy mara'a pa, may nak hiɗi ziyna vi bugu nigi ma vat goyo may. Sa ma win gige, nak co hay mulda kayni la li ŋalɗini, kuɗ lawt zawni klasige!

¹⁵ Ester hot sunda tam Mardose ala:

¹⁶ Tuɗaŋu, tokaŋ sa Yudiyana kaf sa ka hay Susa. Ligi laat kanu, tigi fuɗi, cigi niyɗi kaw, ta-ta ir buur ɦidi, falayta hiɗi henjeta kaw. Nan kaw hiɗi guro-boy sa sunda vanu numa min li laata. Bugol kayni nan ma tuɗ tam mulla, la gatta ma' nala kaw. La a nan fi mitta kaw, nan ma mit manu.

¹⁷ Mardose kaliya, kay li kuɗ slen kaf ma Ester dumna.