ESDRAS 6 - BIBALDA TA PELDETTA

Dita vi Dariyus, malta vi vun Tempella

¹ Ki kayn nala mulla Dariyus vul hagata kay nisi ma gar hay ziy ma lak ɗerwella ma slen ɗoy hayna hay Babilon.

² Hay Ahmeta, hay nagata ta kuɗ Mediya, nisi fi ɗerwel ma ɗutina kepe ma gi-humda ka ɗoy haya ki kayn nala:

³ Busata jewta vi mulla Sirus, mulla Sirus vul dita ala: Ziyna vi Lawna hay Yerusalem: Hinsi in ziyda vi Lawna hay Yerusalem kulo'o, kay na' ma li mi liyn ma li ɗifin haya, se' ma tuni gaana ma liys dono ŋolo. Fiyokŋa va' ma kulona ma liys ir goldoŋ dok-karkiya, be'da va'a ma liys ir goldoŋ dok-karkiya,

⁴ hiɗiy fiyokŋa ma li zlaray kay tuwam sem ɦidi, gu ma wulina ma li jakay kulo sem kepe may. Gurjuta ta li lopna ziyna vi mulla ma wuraka'a.

⁵ Suw kayni lo, slen ma ora hiɗi ma doorona ma Nebukadnesar yawamay goy hay Tempella hay Yerusalem kalam hay Babilon ma hotom goyo, ma ziyimu hotom hay Tempella vi Yerusalem hay liyn ma nam ay lakay jewe hay ziyda vi Lawna.

⁶ Wulin kayni, Tatnay, guvernera vi nagata ta goy bugol vi niy-lumna, Cetar-Boznay, nigi nuroysi sa Afarsakŋa, nigi sa goy gal hena vi niy-lumna, vigi tuwgi goy tisiya.

⁷ Hingi lopna vi ziyda vi Lawn kayni tuɗ voko; hin guvernera vi sa Yudiyana hiɗi sa maariyana vi sa Yudiyana in ziyda hay baŋala'na.

⁸ Kayni ti dita ta nan vul tigiya kay slen ma nigi ma li'e kat sa maariyana vi Yudiyana kay inda vi ziyda vi Lawna: Gurjuta ta nigi tara' goy gal bugol vi niy-lumna kay nara' mi mulla kaf, nigi ma vula' goy mi sum nisina hay liya' ɗiger, kay lopna kayni ma colɗi.

⁹ Slen ma ŋaa'a kay ɗifin ma ŋal-goyna vi Lawna ma dukalawna, luway-gujuna ma joriyona, fok-gamalana hiɗi guro fok-dimina, alkamarena, mandana, vinna hiɗi mula, nigi ma vulsita, ki nisi job tigi nala, tam muliyan-sa-ɗifinna vi Yerusalem, hay buurta buurta, yigi as jok mara noŋɗi,

¹⁰ kay nisi ma li ɗifinna ma his ŋaana tam Lawn ma dukalawna, kay nisi ma siɗaw kay irita vi mulla hiɗi gurona valamu.

¹¹ Kayni ti dita ta nan vula' tam gigekaw ma raw gatta kayni goyo: Gu ma piy hay ziyna valamna ma pat goy kuɗum kepe, kay ɓalam kulo kat gu namna, kay tom hiɗi gu namna kaw. Ziyda valamu ma muɗ goy difir-fira.

¹² Muliyana hiɗi sumun kaf sa meɗ ɓisi goyo kay raw gatta kayni goyna, sa min ɓulak ziyda valamu ta hay Yerusalem goyna, hin Lawna ma tun selem hay liyn namna cuksi gaa'a. Nanu Dariyus, nan vul dita, hinsi li kuɗa' hay liyam ɗiger.

¹³ Ki kayn nala Tatnay, guvernera vi nagata ta goy bugol vi niy-lum hena, Cetar-Boznay, hiɗi nuroysin kaf li kuɗ dita ta mulla Dariyus vul tisiya hay liya' ɗiger.

¹⁴ Nala sa maariyana vi sa Yudiyana in ziyda hiɗi kolda, kuɗ vun-dita vi Haggeya sa ma jobta, hiɗi Zakariya goora vi Iddo, nisi in ziyda, kota' slen haya'a, ki Lawna vi Israyel vulsi hagat nala, ki Sirus hiɗi Dariyus hiɗi Artakserses mulla vi Persiya vul hagata nala.

¹⁵ Inda vi ziyda vat hay buurta ɦidita vi tilla vi Adar, hay busata karkiyata vi Dariyus hay mulda.

¹⁶ Sum sa Israyella, muliyan-sa-ɗifinna hiɗi sa Levitna, hiɗi caw sum sa maariyana sa ay goy gorvona, nisi mal vun-ziyda vi Lawna hiɗi firita.

¹⁷ Kay malta vi vun-ziyda vi Lawna, nisi ŋat luway-jufayn kis, fok-gamalan kis-ma', guro fok-dimin kis-fiɗi; lo kay sulukŋa vi sa Israyel kaf nisi ŋat fok-ŋekŋa doogo yam ma', ŋray dig ŋaɓta vi jafna vi sa Israyella.

¹⁸ Nisi tun muliyan-sa-ɗifinna kuɗ vokŋa visiya, sa Levitna kuɗ ɓurawta visiya visiya, kay li lopna vi Lawna hay Yerusalem, ki ɗoy hay ɗerwelda vi Musus nala.

¹⁹ Gurona vi Israyel sa ay goy gorvona li Paskata hay buurta doogo yam fiɗita vi til ma jewna.

²⁰ Muliyan-sa-ɗifinna hiɗi sa Levitna li tuwsi goy peldet kafe, nisi kaf liy goy peldete; nisi li Paskata kay sa maariyana may goy gorvona kaf, kay ɓosiyosina muliyan-sa-ɗifinna, kay nisi kay tuwsi kaw.

²¹ Sum sa Israyella sa may goy gorvo pana ti Paskata hiɗi nisi kaf sa ja jarsi goy hiɗi liwista vi sa waana, tap tuwsi tisiya kay gar Ma-Vatɗina Lawna vi Israyel.

²² Nisi li yuldeta vi fun-bay-kufna hiɗi firita ir buur siɗiya, kay Ma-Vatɗina lisi diksi firiya, kay Ma-Vatɗina muɗ dik mulla vi Asiriya katsiya kay gut kuɗsiya, hay lopna vi ziyda vi Lawna, Lawna vi Israyel.