ESDRAS 3 - BIBALDA TA PELDETTA

Giwin-ma-ɗifinna ini kulo'o, sem Tempella tuni gaa'a

¹ Til ma siɗiyan coowa, sum sa Israyella ka hay hoyok-ziyna visiya visiya. Sumun tok tuwsi ki sa kep ɦawa nala hay Yerusalem.

² Yosuwa goora vi Yotsadak, hiɗi ɓosiyomna muliyan-sa-ɗifinna, hiɗi Zorobabel goora vi Seyaltiyel, hiɗi ɓosiyomna yaway kulo'o, nisi in giwin-ma-ɗifinna vi Lawna vi Israyel, kay li ɗifin ma ŋal-goyn kalamu, ki nam ka doy hay gatta vi Musus sana vi Lawna nala.

³ Nisi in giwin-ma-ɗifinna hay baŋalamu, kay nisi ka li nar kay sum sa hay liyna, nisi li ɗifin ma ŋal-goyna tam Ma-Vatɗina, ɗifin ma ŋal goyna ma graw culumta hiɗi ma vulatita.

⁴ Nisi li yuldeta vi guɗukŋa, ki nam ka ɗoy nala, nisi li ɗifin ma ŋal-goyna falayta hiɗi henjet kaf, kuɗ ŋaɓta valamu ma colay hay buurta kafna.

⁵ Bugol kayni, nisi li ɗifin ma ŋal dok-dokŋa, ɗifin ma ŋal-goyna ma kay til ma wulina, hiɗi buur ma yuldeta ma vuli goy tam Ma-Vatɗin kafna, hiɗi sum sarige kaf sa li vulda kuɗ minda tam Ma-Vatɗina.

⁶ Hay buurta jewta vi til ma siɗiyana, nisi tun caw li ɗifin ma ŋal-goyna tam Ma-Vatɗina. May hay na'ta, sem-ziyda vi Tempella vi Ma-Vatɗina bay tun gaa tuwa.

⁷ Nisi vul gurjuta mi sa ceɗ hiɗiyna, hiɗi sa har guna, nisi vul tina hiɗi cina hiɗi mula mi sa Sidonna hiɗi sa Tirusna, kay nisi ma yaw gu-gamna vi Libaŋ ay goloŋ hay niyna ta-ta hay Yaffa, ki Sirus mulla vi Persiya vul hagata nala.

⁸ Hay til ma ma'na bugol cota visiya hay ziyda vi Lawna hay Yerusalem, hay til ma ma'na, Zorobabel goora vi Seyaltiyel, Yosuwa goora vi Yotsadak, hiɗi caw guro-biyosi ma hinina, muliyan-sa-ɗifinna hiɗi sa Levitna, hiɗi nisi kaf sa hotay hay gorvota hay Yerusalem pana, nisi fok hiɗi lopna, sa Levitna sa busata visi dok-ma' ta-ta kulo kalam ɗawna, nisi vulsi lop hay ɓisiya kay nisi ma ŋom sum sa ka li lop hay ziyda vi Ma-Vatɗina.

⁹ Yosuwa hiɗi gurona valamu hiɗi ɓosiyomna, Kadmiyel hiɗi gurona valamu sa Yudiyana, gurona vi Henadad, hiɗi gurona visiya hiɗi ɓosiyosi sa Levitna, nisi tap tuwsi kaf kay ŋom sum sa li lop hay ziyna vi Lawna.

¹⁰ Hay li ma sa li lopna tun sem Tempella vi Ma-Vatɗin gaa'a, muliyan-sa-ɗifinna nisi laksi hay liyna visiya, cuksi sligar tisiya, hiɗi togolomna, sa Levitna gurona vi Asaf hiɗi kaway beɗayna, kay subur sem Ma-Vatɗina, ki David mulla vi Israyel di'ays nala.

¹¹ Nisi ka hot dita, hay li ma nisi ka subur Ma-Vatɗina, tiyim selem ala: Kay nam ŋaa'a, kay ŋaata valamu kay sa Israyella mus ta-ta. Sumun kaf ciriy kulo ŋolo, hiɗi siwelda kay subur sem Ma-Vatɗina, kay nisi ka tun sem ziyda vi Ma-Vatɗina.

¹² May sumun ŋolo jar muliyan-sa-ɗifinna, sa Levitna hiɗi sa ŋulona vi jafna sa muɗi maari, sa wi ziyd ta jewta hiɗi irsina, ka tiy hiɗi delsi kulo ŋolo hay li ma sumun ka tun sem ziy na'ta kayni kirsiya, segen ka siwel hiɗi delsi kulo ŋolo kay li firiya,

¹³ muɗ kayni sa as poŋ ir ciriyna vi firita hiɗi ciriyna vi tiynɗi, kay sumun ka ciriy ŋolo ta-ta winekŋa visi kalay goy gine'e.