ESDRAS 10 - BIBALDA TA PELDETTA

Nisi cuk boy sa pulla

¹ Hay na'ta Esdras ka guɗofi gaa vok ziyda vi Lawna, nam ka tiya ka siɗawa, ka hama kaw. Sumuna vi Israyel ŋolo ka tokay talamu: Jufayna, boyna, hiɗi gurosgurayn kaw ka tokay talamu, sumun ka tiy ŋolo kaw.

² Ki kayn nala Sekaniya goora vi Yehiyel, jar gurona vi Elam, sli ditiya di tam Esdras: Numa li bay hum-vunda kat Lawna vuma'a, hay li ma numa yaw boyn sa pulla sa gurona vi sum sa hay nagata. May wulin kayni, cubta-sle'ta kay sa Israyella kuɗ Lawta kayni ka lo.

³ Junay bonot jaray wulini hiɗi Lawna vaya kay digiɗ boyn nisina hiɗi gurona visiya, kuɗ minda vaŋ naŋ mulanna hiɗi nisi sa tuwsi wirsiya vok vun-ma-gatna vi Lawna vaya. Nay ma li kuɗ gatta.

⁴ Fokaŋ kulo'o, kay lawta kayni ɗuwa' mi naŋu. Numa ka hiɗi naŋu. Laŋ tuwaŋ dono'o, laŋ lopo.

⁵ Bugol kayni Esdras fokay kulo'o, nam di sa ŋulona vi muliyan-sa-ɗifinna, sa Levitna, hiɗi sa Israyella kafe, a nisi ma yi va kisiya kuɗ va ma nisi dumna kaf, nala nisi yi va kisiya.

⁶ Bugol kayni Esdras vi tuwam goy vok ir ziyda vi Lawna, kal hay ziyda vi Yohanan goora vi Eliyasib; hay li ma nam kalawa hay ziyda, nam min ti fuɗi, ci niyɗi kaw, kay nam ka hay yorta kuɗ lop ma joona vi sa maariyana sa may goy gorvo pana.

⁷ Nisi siwel goy hay Yuda hiɗi Yerusalem kaf ala sum sa maariyana sa may goy gorvona ma tok tuwsi hay Yerusalem;

⁸ kuɗ varta vi sa ŋulona hiɗi sa maariyana, la sa min co jar buur ma hidin lakŋɗi, slena valam kaf nisi ma yawamu, nam kay tuwamu nisi ma gum iram goy jar sum sa may gorvona.

⁹ Sumuna vi Yuda hiɗi Benyamin kaf tok tuwsi hay Yerusalem jar buurta ɦidita, kayni hay buurta dok-ma'ta vi til ma zleeŋena. Sumun kaf ka lakay hay liyna vi ziyda vi Lawna, tuwsi ka visi yakara'a kuɗ slen ma lina hiɗi niyn ma ka sina.

¹⁰ Esdras mul-ma-ɗifinna fokay kulo'o, nam di tisiya: Nigi li bay-ɗigertawa hay li ma nigi yaw boy sa pulla, nigi muɗ sum sa Israyellawa joo'o suw lo.

¹¹ Hamgi goy wulini vok Ma-Vatɗina Lawna vi sumaygiya, ligi minda valamu, jagi jargi goy hiɗi sum sa hay nagatna hiɗi boy sa pulla.

¹² Sumun kaf hot dit hiɗi delsi kulo ŋolo ala: Awa, numa min li ki naŋ di nala.

¹³ May sumun ka dakay ŋolo, niyn ka si'e, nay as lak goy jiyɗi; lo nam kayni may mi lop vi buur kep lebo ma' ɦawaɗi, kay sumun sa li suluk hay lawta kayni ka jaray ŋolo.

¹⁴ Nigi sa ŋulona vaya ma lakgi dok-dok hay tokŋa kafe; nisi sa hay hoyok-ziyna vaya sa yaw boyn sa pulla ma co'o hay buur ma nay min colomna, hiɗi sa maariyana, hiɗi sa ka kitana vi hoyok-ziyn kaf, ta-ta Lawna vaya vat ɦiyda valam goy taya kuɗ lawta kayni.

¹⁵ Sum sa ci way hiɗi lawta kayni si Yonatan goora vi Asayel, Yahsiya goora vi Tikwa, sum sa gi dirsi kuɗsin kayni si Mesullam, hiɗi Sabtay ma Levitna tuta.

¹⁶ May sa maariyana sa ay goy gorvona li kuɗ slen ma nisi dumna. Esdras mul-ma-ɗifinna, hiɗi sum sa ŋulona vi jafna nisi yisi sesi goyo, poŋsi irsi goy visiya, hay buurta jewta vi til ma doogona, nisi lak gaa'a kay ɗuw law na'ta.

¹⁷ Hay buurta jewta vi til ma jewna, nisi vat lawtawa hiɗi sum sa yaw boy sa pulla kafe.

¹⁸ Jar gurona vi muliyan-sa-ɗifinna, nisi fi sum sa yaw boy sa pulla kaw: Kuɗ jafna vi Yosuwa mi goora vi Yotsadak hiɗi ɓosiyomna Maaseya, Eliyezer, Yarib hiɗi Gedaliya.

¹⁹ Nisi va' tisiya kay digiɗ boyna visiya, kay li ɗifin hiɗi ŋat ɦu-gamala kep kaw kay jiw-zlata visiya.

²⁰ Kuɗ jafna vi Immer si Hanani hiɗi Zebadiya;

²¹ kuɗ jafna vi Harim si Maaseya, Eli, Semayeya, Yehiyel hiɗi Oziyas;

²² kuɗ jafna vi Pakhur si Elyohenay, Maaseya, Ismayel, Netaneel, Yozabad hiɗi Eleyasa.

²³ Kuɗ jafna vi sa Levitna si Yozabad, Simey, Kelaya ma yum lo ala Kelita, Petahya, Yuda hiɗi Eliyezer.

²⁴ Kuɗ sa gi nulla, mi Eliyasib. Kuɗ sa ŋom vun-galana si Sallum, Telem hiɗi Uri.

²⁵ Jar nisi sa Israyella: Jafna vi Parewos, si Ramiya, Yiziya, Malkiya, Miyamin, Eleyazar, Malkiya hiɗi Benaya;

²⁶ kuɗ jafna vi Elam, si Mataniya, Zakariya, Yehiyel, Abdi, Yeremot hiɗi Eli;

²⁷ kuɗ jafna vi Zattu, si Elyohenay, Eliyasib, Mataniya, Yeremot, Zabad hiɗi Aziza;

²⁸ kuɗ jafna vi Bebay si Yohanan, Hananiya, Zabbay hiɗi Atlay;

²⁹ kuɗ jafna vi Bani si Mesullam, Malluk, Adaya, Yasub, Seyal hiɗi Ramot;

³⁰ kuɗ jafna vi Pahat-Mowab si Adna, Kelal, Benaya, Maaseya, Mataniya, Betsaleel, Binnuy hiɗi Manase;

³¹ kuɗ jafna vi Harim si Eliyezer, Yisiya, Malkiya, Semayeya hiɗi Simeyon

³² Benyamin, Malluk, hiɗi Semariya;

³³ kuɗ jafna vi Haskum si Matnay, Matatta, Zabad, Elifelet, Yeremay, Manase hiɗi Simey;

³⁴ kuɗ jafna vi Bani, Maaday, Amram, Wel,

³⁵ Benaya, Bediya, Keluhu,

³⁶ Vaniya, Meremot, Eliyasib,

³⁷ Mataniya, Matnay, Yaasay;

³⁸ Bani, Binnuy, Simey

³⁹ Selemiya, Natan, Adaya,

⁴⁰ Maknadbay, Sasay, Saray,

⁴¹ Azareel, Selemiya, Semariya,

⁴² Sallum, Amarya hiɗi Yosef;

⁴³ kuɗ jafna vi Nebo si Yeyel, Matitiya, Zabad, Zebina, Yadday, Yowel hiɗi Benaya.

⁴⁴ Nisi kaf kayni yaw boyn sa pulla, segen ŋolo jarsiya vuɗ guro hiɗi nisi kaw.