ESAYA 4 - BIBALDA TA PELDETTA

¹ Hay buur namna ɗawni, boyn siɗiya ma mok sa kep kisiya, nisi ma di talam ala: numa gar funa, semda vuma yi hiɗi naŋu, yawaŋ zulota vuma goy yawge.

Wida vi sle ma vokŋa

² Hay buur namna ɗawni, jafna vi Ma-Vatɗina ma muɗ jifiya, gajijiya kaw, sle ma vuɗ hay nagata ma sleɗ hay sumuna, nam ma vul gajijita mi caw Israyella ma hinna.

³ Hay buur namna ɗawni, sa ma hin kulo hay Siyon hiɗi sa ma hin kulo hay Yerusalem, sumun ma yisi ala sa peldetna, nisi kaf sa sesi ɗoy kay irita hay Yerusalem.

⁴ Bugol Bum-Sumuna muz gesna vi guro-boyna vi Siyon goy muzna, bugol nam por Yerusalem goy kay busuw ma jaŋ goy haya'na pora, hiɗi sukŋa vi ɗigerta, hiɗi sukŋa vi ɓulak-goyta.

⁵ Kulo kay hiɗiyta vi Siyon hiɗi ŋolda va' kaf, hay liyn ma tokŋa va' kaf, Ma-Vatɗina ma kot ɗugulla hiɗi nukŋa kay falayta, nam ma kot kuta ta ŋalda kay henjeta may. Kay sle ma gajijina kaf yalam ma kusuɓa,

⁶ ɗuŋus ma sumun ma ŋay kuɗumu kay fatta hay falayta ma li'e, liyn ma sumun ma ŋay kuɗumu kay simeɗ ma biwna, hiɗi niy ma sina co kisiɗi ma li'e.