ESAYA 11 - BIBALDA TA PELDETTA

Liyna vi Mesiyas

¹ Bugolda ɓam-guna ma kalay goy hay guna vi Esaya pa, so'olla valam ma cuki goyna ma si ŋolo.

² Ŋusta vi Ma-Vatɗina ma mus kalamu: Ŋusta vi yalla hiɗi yamda-wida, ŋusta vi gatta hiɗi donota, ŋusta vi wida hiɗi narta kuɗ Bum-Sumuna.

³ Nam ma gi suk hiɗi narta kuɗ Bum-Sumuna, nam ma ka kitat kuɗ ir san ɦawaɗi, nam ma poŋ jar sumuna kuɗ vun ma diyn ɦawaɗi.

⁴ May nam ma ka kitata vi sa hawna hiɗi ɗigerta hiɗi gasita, nam ma li mi ma gut kuɗ sa maŋayna gaa kay nagata; nam ma ci sumuna hay nagata hiɗi zugulda vi vunamu, hiɗi suk ma vunamna nam ma ci sa ma joon goyo.

⁵ Gasita ma li mi kanti ma furamna, Vida ma li mi kanti ma nam junum kay koŋomna may.

⁶ Keŋŋa ma lak hiɗi goor ɦu-dimin kuɗ tuwsi kep, zinilla ma bur gaa kep hiɗi goor ɦu-meena, Goor-putna, goor-zlona hiɗi faray ma ɗoromna ma lak dar kepe, ma gi kuɗum kay ŋomom mi goorgoor ɦawa.

⁷ Putta hiɗi ursena ma ti hat liy kepe, gurona valamu ma bur hay liy kepe, zlona ma tum mi hati ki putta nala.

⁸ Goor ma ci miir tuwana ma liw hiɗi guy-makayda, goor ma fok wulina ma kal ɓalamu hay zulla vi makay siwle-siwleta.

⁹ Va ma joo'o as liɗi, va as ɓulakɗi kaw kulo kay hiɗiyta van ta peldetta kafe; kay wida vi Lawna ma hob yam nagata, ki niyna hob hay niy-lum ma ŋolla nala.

¹⁰ Nala, hay buur namna ɗawni, jafna vi Isay ma min col kulo'o ki bay-bayn nala kay sumuna, jaf-sumun kaf ma garamu, liyn ma musta valamu ma li gajijiya.

¹¹ Nala hay buur namna ɗawni, Bum-Sumuna ma meɗ ɓalam goyo sem ma ma'na, kay gus caw sumuna valamu sa hini goy hay Asiriya hiɗi Egipte. Hay Patros hiɗi Etiopiya, hay Elam, hay Sineyar, hay Hamat, hiɗi jokona vi niy-lum ma ŋolla.

¹² Nam ma pi bay-bayt kulo'o kay jaf-sumuna, nam ma tok sa irsi giy goyna vi Israyel, nam ma yaw talamu sumuna vi Yuda, sa meray goy hay gef-nagat fiɗi petna.

¹³ Hunayta vi jafna vi Efrayim ma vat goyo, sa gaw kay jafna vi Yuda ma ciys goyo, jafna vi Efrayim ma li hunay hiɗi jafna vi Yuda loɗi, jafna vi Yuda ma ka gaw tam jafna vi Efrayim loɗi kaw.

¹⁴ Nisi ma mok sa Filistina hay gal ma vulatina, nisi ma tap tuwsiya kay vurum gurona vi nagat ta kuɗuwta, nisi ma gi ɓisi goy kay Edom hiɗi Mowab, sum sa Amonna ma lak gaa kuɗ gaŋeraŋa visiya.

¹⁵ Ma-Vatɗina ma so sin niy-lumna vi Egipte goyo, nam ma poŋ ɓalam kulo'o kay niy-lumna, hay li ma nam ma hin simeɗn biw hiɗi dono'o, nam ma ɓuraw ir niy-lumna goy siɗiya, sumun ma muɗ ɦaw hayam hiɗi tugurun sesiya.

¹⁶ Hagat ma gi'e kay caw sumuna valam sa hinina, nisi sa min hin hay Asiriya, ki jewe hagat ay kepe kay Israyella, hay li ma nisi kalay goy hay nagat Egipte pana nala.