EFESENA 6 - BIBALDA TA PELDETTA

¹ Nigi gurona, humgi kuɗ sumaygiya, ki kuɗ Bum-Sumuna nala, kay kayni hay liyamu.

² Slaŋ yam buŋu hiɗi suŋu kulo'o, -- kayni mi vun-ma-gatna ma jewna ma deŋga ka kuɗumu --

³ Kay naŋ ma fi ŋaata, mus ŋol hay nagata kaw.

⁴ Nigi sumayna, ka gurona vigi ɦiyɗi, may nigi wulsi kulo'o hay gatta ta ŋaata hiɗi hatta ŋalda vi Bum-Sumuna.

⁵ Nigi sa li lop vo vi sumuna, humgi kuɗ mulaygina hay sliwna hiɗi narta, hiɗi wiira kaw, hay ŋalda ŋaata vi dikgiya ki kuɗ Kristu nala;

⁶ nigi ma li lopna kuɗ vok-irsiɗi, ki sumuna ɗuwgiya di ŋaat kigi kaw nalaɗi, may ki sa sunda vi Kristu nala, sa li lopna hiɗi diksi kaf hay minda vi Lawna.

⁷ Sunsiya hiɗi minda ta gasita ki nigi sunum kayn mi Bum-Sumun nala, may ki nigi sunsi kayni si sumuna ɦawa naɗi,

⁸ hay wida ala gigekaw, la gorvona lebo goor ma vuɗina, Bum-Sumuna ma wurakam ɗawn kuɗ ŋaata ta nam la'ta.

⁹ Tigi nigi mulaysina, nigi ma li ŋray ca ki kayn nala tam sa sunda vigiya; nigi ma tel tuwgiya kay lawsi dono'o, hay wida ala ma ŋolla visiya ma ka hay wuralawna, nam ma ka ir saɗi, nam kayn ma figina kaw.

Sle ma duura vi sa ma viyna

¹⁰ Va ma hinin kayni, kay nigi ma lak dono'o hay Bum-Sumuna, hay donota vi gaŋeraŋa valamu kaw.

¹¹ Cukgi slena ma duura vi Lawna kaf kigiya, kay nigi fi col dono'o vok yalla vi Matna pet.

¹² Kay nay dur kayni hiɗi sliwn hiɗi busuwnaɗi, may hiɗi gaŋeraŋa, hiɗi donota, hiɗi muliyan jufunda sa ka gaa kay nagat tanna, nay dur kayn hiɗi ŋusiyana ma joona, ma ka hay liyn ma kulo dukalawna kaw.

¹³ Kay na'ta, yawgi slen ma duura vi Lawna kaf, kay nigi fi lak dono'o kay dur hay fattiɗeŋ ma joona, as col dono'o kaw bugol kolda.

¹⁴ Lakgi dono'o: Furgi juni hiɗi gasita; cuki hiɗi ŋoŋ ma duura vi ɗigerta;

¹⁵ tuguruna cuki segi kotay ŋaa'a hiɗi labar ma firina vi toyta;

¹⁶ vok duura kaf, yawgi marayta vi vida, ma nigi as tew kuta vi ɓarawna vi ma joona goyo hiɗi namna;

¹⁷ yawgi ŋalayta-duura vi su'da hiɗi kew-gaferaŋa vi Ŋusta, kayni mi yoboyna vi Lawna.

¹⁸ Hay vok-liyna kaf siɗawgiya hay Ŋusta, siɗawta hiɗi tiyna kuɗ jafamu jafamu. Lakgi jigere hay kayni ŋiresl', siɗawgi kay sa peldetna kaf.

¹⁹ Kanu kaw, kay yoboyna ma vulanti manu, hay li ma nan mal vunan goyo, kay nan ma fi di ŋayayta vi labara ma firina goyo hiɗi kursuliya,

²⁰ yoboy namna ma nan muɗi kuɗum sa ma sunda hay jaɓna; ma nan ka kusum hiɗi kursuliya, kay nan ma kusum ki kayn nala.

Gi deɓta vi Paulus ta cawta

²¹ A nigi kaw, nigi ma hum slena kanu, hiɗi slena ma nan lum goy haraŋi, ɓasun ma hayan kalamna, Tikikus sa ma sunda ma gasina hay Bum-sumuna ma di slen kayni kaf tigiya.

²² Nan gumis tigi ir muray ɦawa, kay nigi ma wi lakka vuma'a, kay nam ma tungi dikgi gaa'a kaw.

²³ Lawna Bumna hiɗi Bum-sumuna vaya Yesu Kristu vul sle'ta hiɗi minda tam ɓosiyayna tage.

²⁴ Slugota ma li hiɗi nisi kaf sa min Bum-sumuna Yesu Kristu hay ɓulakɗita.