EFESENA 2 - BIBALDA TA PELDETTA

Sana fi su'da kuɗ slugota

¹ Nigi kaw, nigi ay mitiya kuɗ joota hiɗi sulukŋa vigiya,

² ma nigi hay liyn ma kalayna poy haya kuɗ lita vi sa nagat tanna, kuɗ mulla vi gaŋeraŋa vi simeɗna, kayni ti Ŋusta ta ka li lop wulini hay gurona vi ŋel-gatta.

³ Nay kaf kaw, nay ay jarsiya, jewe nay ay poy kuɗ darta vi sliwna vaya, hay li ma nay li minda vi sliwna hiɗi varta vay ma joona, kay hay vu'da vay pa nay ay si gurona vi hiyda ki segena nala kaw.

⁴ May Lawna ma slugo ŋolla, kuɗ minda ta ŋolda ta nam minaya,

⁵ nay sa ay miti hay joota vaya, nam muɗay iriya hay Kristu -- hiɗi slugota nigi suɗawa --

⁶ Nam dayay kulo hiɗi namu, lakay kulo hiɗi namu; hay liyn ma kulona kaw hay Kristu Yesu,

⁷ kay nam ma ɗek goy haraŋi asta ŋolda vi slugota valamu, hay ŋaata valam ta kayta hay Kristu Yesu, hay liyn ma vokŋa.

⁸ Kay nigi suɗawa kuɗ slugota hiɗi vida, kayni kuɗ hagata vi vida. Kayni may vigi paɗi, may kayni mi vulda vi Lawna.

⁹ Kayni may kuɗ lopnaɗi, kay sa fi subur tuwamɗi kaw.

¹⁰ Kay nay kayni mi lopna vi ɓalamu, kay Lawna kotay hay Kristu Yesu kay li lopna ma ŋaana ma nam kotomay jewe, kay nay ma poy hayamu.

Sa waana hiɗi sa Yudiyana tapay kep hay gu-ma-grakŋa vi Kristu

¹¹ Kay na'ta humgi ma gigi kay kayni: Jewe, nigiya sa waana hay sliwna, ka kaay-gosayna yigi ala sa bay ka gosayna, nisi sa kaay gosaya hay sliwna, hiɗi ɓam sumuna kaw,

¹² hay na'ta nigi ay bay Kristu, liyna kay tap hay jafna vi Israyel noŋɗi, nigi ay pulu hay bonota ta Lawna deŋa'ta. Nigi ay lakay bay cubta-sle'ta, bay Lawna kaw kay nagata.

¹³ May wulini hay Kristu Yesu, nigi sa jew ay goy gine'e, nigi maawa goboy hay busuwna vi Kristu.

¹⁴ Kay nam mi toyta vaya, nam ma muɗ sa ma'na goy kepe, ɦo gulmunna ma ɓuraw jaara hiɗi gawta gaa kaw.

¹⁵ Hay sliw-tuwamu nam vat gatta hiɗi dita-gatta kaf goyo, kay nam kay tuwamu fi muɗ nisi sa ma'na goy hay sa ma wulina kep hay li ma nam li toyta,

¹⁶ Kay toy sa ma'na hay Lawna hay tuwna kep hay gu-ma-grakŋa, hay li ma nam ci gawta goy hiɗi nam cina.

¹⁷ Nam maawa kay kus labara ma firina vi toyta tigi nigi sa ay goy gine'e, tam nisi sa ka goboyna kaw;

¹⁸ Kay hay namu nay kaf fi cuk kalaf kaf tam Bumna, hay Ŋusta kepe.

¹⁹ Nala nigi say sa pulla hiɗi sa rogoyna loɗi; may nigi kayn si sum sa lakay hay nagata kep hiɗi sum sa peldetna, sum sa vo hay ziyna vi Lawna.

²⁰ Nigi ini kulo kayn kay sem ziyna vi sa apostolayna hiɗi sa jobta-Lawna, Yesu Kristu kay tuwamu mi hiɗiyn ma gef-ziyna may.

²¹ Hay namu, ziyn kaf ma selem tuni gaa ŋaa'a, in kulo'o kay muɗ goy Tempel ma peldetna hay Bum-Sumuna.

²² Hay namu, nigi kaw inawa kulo kep kay ziyna ma musta vi Lawna hay Ŋusta.