DANIEL 9 - BIBALDA TA PELDETTA

Siɗawta vi Daniel

¹ Hay busata jewta vi Dariyus, goora vi Asuwerus, ma hay jafna vi sa Medena, namu ma muɗi mulla hay nagata vi sa Kaldeena,

² hay busata valam ta jewta hay mulda, nan Daniel, nan hum hay ɗerwella ala busat as li dok-siɗiya jew a Yerusalem ɦo gaa'a, busata na'ta ŋray hiɗi ŋaɓta vi busata ta Ma-Vatɗina da' mi sa ma jobta Yeremiyas.

³ Hay na'ta nan muɗ iran kir Bum-sumuna Lawna, kay garamu hiɗi siɗawta, hiɗi giɗel-delta, hay laata, jun sligar bolla tanu, ko butuw-kun kanu kaw.

⁴ Nan siɗaw Ma-Vatɗina Lawna vanu, nan ka tiy vokom ala: Hah! Bum-Sumuna Lawna ma ŋolla ma narta ka kuɗaŋ ŋolla, naŋ ma ŋom bonota hiɗi ŋaata vaŋu kat nisi sa minaŋu, sa ŋom vun-ma-gatna vaŋu.

⁵ Numa li sulukawa, li joowa kaw, numa ay joo'o, ŋel-gatta, numa calay goy hay vun-ma-gatna hiɗi ɗota-gatta vaŋu.

⁶ Slen ma sa sunda vaŋu sa jobta lawam hay semda vaŋu tam muliyana vuma'a, tam sa yerimana vuma'a, tam sumayma'a hiɗi sum sa hay nagat kaf numa min hum kuɗumɗi.

⁷ Ɗigerta taŋ naŋu Bum-Sumuna, may zulota vuma numa'a, ki hay buur ma wulini nala, tam sumuna vi Yuda, tam sum sa hay Yerusalemna hiɗi sa Israyel kafe, tam nisi sa ka goboyo hiɗi sa goy gine'e, hay nagat kaf sa naŋ digiɗsi goy haya'a kuɗ bay-vida visiya, ta nisi muɗ tuwsi joo'o vokaŋ hiɗi na'ta.

⁸ Ma-Vatɗina, zulota vi irma kayni kuma numa'a, kay muliyana vuma'a, kay yerimana vuma'a, tam sumayma'a kaw, kay numa li sulukawa kataŋu.

⁹ Slugota hiɗi gida ka taŋ naŋ Bum-Sumuna Lawna vuma'a, kay numa ŋelaŋ vunaŋ ŋolo.

¹⁰ Numa may hum vun Ma-Vatɗina Lawna vumaɗi, gatta valamu ta nam tun vokma'a hiɗi sa sunda valamu sa jobta numa min hum kuɗa'ɗi kaw.

¹¹ Sum sa Israyel kaf raw gatta vaŋawa goyo, min humaŋ vunaŋɗi. Ki kayn nala be'da hiɗi slen ma yi kamna ma ka ɗoy hay gatta vi Musus sa ma sunda vi Lawna nigawa kuma'a, kay numa li sulukawa tam Lawna.

¹² Slen ma nam dum kuma numa'a hiɗi sa ti mul kuma'na nam hobom vunamawa, hay li ma nan hin joo ta ŋolda nig gaa kuma'a, gaa kuɗ dukalawna pet va bay li ki van li tam Yerusalem nala tuwa.

¹³ Ki ɗo'ay hay gatta vi Musus nala, joot kayni kaf co kuma'a; numa min tiy vok Ma-Vatɗina Lawna vumaɗi, numa min hin joota vuma goyɗi, numa min poŋ ir gasita vaŋɗi kaw.

¹⁴ Kay na'ta Ma-Vatɗina ŋom joot na'ta kay hina' co kuma'a; kay Ma-Vatɗina Lawna vuma'a nam ɗigere hay lop ma nam lumna kaf, may numa min humum vunamɗi.

¹⁵ Wulin kayni, Bum-Sumuna Lawna vuma'a, naŋ ma kal sumuna vaŋ ay goy hay nagata Egipte pa hiɗi ɓaŋ ma donona, naŋ ma li a semda vaŋu tiya ki numa ka wi vaydi nala, numa li sulukawa, numa muɗi joo'o.

¹⁶ Bum-Sumuna, kuɗ lopna vaŋu ma ɗigera kaf, hin ɦiyda vaŋu hiɗi roŋŋa vaŋu raw goy tam hoyok-ziyna vaŋu Yerusalem, tam hiɗiyta vaŋu ta peldetta; kay kuɗ sulukŋa vuma'a hiɗi sulukŋa vi sumayma'a, Yerusalem hiɗi sumuna vaŋ kaf muɗi zulo'o vok ir sum sa ka ŋuymana.

¹⁷ Wulin kayni, Lawna vuma'a, humaŋ siɗawta hiɗi giɗel-delta vi sa ma sunda vaŋu, lo kuɗ slugota vaŋ naŋ Bum-Sumuna, hin vokaŋu wile gaa'a kay liyna vaŋ ma peldetna ma ɦoy gaana.

¹⁸ Lawna vanu, jakaŋ humaŋu, humanu. Malaŋ iraŋ goyo, ɗuwaŋ yam-jonona vuma'a hiɗi hoyok-ziyna vuma'a ma semda vaŋu ka yiy haya. Kay numa mar giɗel-delta vuma taŋ kayni may kuɗ lopna vuma'a ma ɗigeraɗi, may kuɗ slugota vaŋu ta ŋolda.

¹⁹ Bum-Sumuna humma humge, Bum-Sumuna, vulma gida tage. Ma-Vatɗina jakaŋ humaŋu. Laŋ lopna vaŋu, vi yaŋɗi, kuɗaŋ naŋu Lawna vanu. Kay semda vaŋu ka yiya hay hoyok-ziyna hiɗi sumuna vaŋu.

²⁰ Hay li ma nan ka law tuwa, nan ka siɗawa, nan ka ham sulukŋa vanu hiɗi sulukŋa vi sumuna vanu sa Israyella, hay li ma nan ka giɗel del Ma-Vatɗina Lawna vanu kay hiɗiyta ta peldetta valamu;

²¹ hay li ma nan ka law hay siɗawta van tuwa, Gabriel sa ma vul tuwam kiran jewna piray katanu, kayni hay liyna vi ɗifin ma vulatitna.

²² Nam hatanu, law hiɗi nanu kaw. Nam di tanu: Daniel, nan maawa wulini kay mal varta vaŋ goyo kay naŋ ma huma.

²³ Hay tun cawta vi siɗawta vaŋ pa, yoboyn kep kalay goyo, nan co kayni kay daŋ labara valamu; kay naŋ kayni mi sa ma nan minaŋ ŋolo, vaŋ yoboyna, humaŋ caw ɗekka kaw.

²⁴ Lumu dok-siɗiya ŋaɓay goyo, kay sumuna vaŋu hiɗi hoyok-ziyna vaŋ ma peldetna kaw, kay tew jiw-zlat goyo, kay vat sulukŋ goyo, kay por kay joota, kay mar ɗigerta ta vatɗita, kay hob vun wid-ŋayayta hiɗi vun-jobta, kay ɦok mul kay ma peldet suw kafna.

²⁵ Naŋ ma wi kayni hum kaw. Tun caw tam yoboyna ma hot in Yerusalem kulon pa, ta-ta tam mulla-Mesiyas, lumun liy siɗiya; jar lumun dok-karkiya yam ma' lo, baŋal-liyna hiɗi zulla ma hotis hay baŋalamu, ma inis kulo lo. May hay liyna vi yorta.

²⁶ Bugol lumu dok-karkiya yam ma', Mesiyas kep ma kaays goyo, sa ma kuɗum ma li loɗi. Sumuna vi mul mara kep ma co'o, nisi ma ɓulak hoyok-ziyna hiɗi liyn ma peldetna, dabta valamu ma li ki niy ma tina nala. Dita coli ala ɓulak-goyta ma mus ta-ta hay vatta vi duura.

²⁷ Nam ma vi bonot hiɗi sumun ŋolo ir lumut kep, hay galla vi lumuta, nam ma tel ɗifinna hiɗi vulda; sa ma ɓulak liyna ma tuɗ ta-ta co tam dabta vi liwista, ta-ta hay li ma ɦo-gaata hiɗi slen ma laway goyna nig gaa kay sa ma ɓulak liyna.