DANIEL 6 - BIBALDA TA PELDETTA

¹ Dariyus ma Medena sli mulda. Busata valamu hay na'ta ay dok-karkiya yam ma'.

Daniel hay zulla vi zlona

² Van kir Dariyus ŋaa'a kay tun sa ŋarmanna valamu kis kalam dok-ma' goy hay nagata valam kafe.

³ Nam tun sa ŋulon kisi ɦidi, Daniel ay jar sa ɦidina kay sa ŋarmanna as ŋa slen goy voksiya, a slena vi mulla ma baɗi.

⁴ Daniel kayni suw sa ŋulona hiɗi sa ŋarmanna kafe, kay ŋusta ta suw segena ka hayamu, mulla varay kay tunum ŋol kay nagata valam kafe.

⁵ Hay na'ta sa ŋulona hiɗi sa yerimana gar yali kay pi lawta kay Daniel, kay lopna vi mulda, may nisi may fi va noŋɗi, fi joo kalamɗi kaw, kay nam ɗigere, yam ma jokŋa hiɗi sle ma lum hay liyamɗina may hayam noŋɗi.

⁶ Sumun kayni di'e: Nay as fi yali kay pi lawta kay Daniel noŋɗi, la nay min vum hay lawta, nay ma garam hay gatta vi Lawna valamu.

⁷ Bugolda sa ŋulona hiɗi sa ŋarmanna pat ɦini-ɦini kalay kat mulla, nisi di talam ala: Mulla Dariyus, musaŋ iri musge.

⁸ Sa ŋulona hay mulda kaf, sa ŋom slena, sa vul-gatta hiɗi sa guvernera kaf min ala naŋ ma ɗo ɗerwel kep goyo, telda ma li haya' dono'o ala: Jar buur dok-ɦidi lakŋi, san gige kaw ma siɗaw Lawna valamɗi, siɗaw sa maraɗi kaw, say siɗawaŋgi mi naŋ mulla kepe, la naɗi ma gumis hay zulla vi zlona.

⁹ Wulin kayni mulla, ɗoŋ ɗerwelda vi telda na'ta goyo, tun seŋ gaa kuɗa'a kaw, kay sa as kus gatta na'taɗi, kuɗ gatta vi Medena hiɗi Persena ta sa as muɗa' ɗita.

¹⁰ Hay na'ta mulla Dariyus tun selem gaa kuɗ ɗerwelda vi telda na'ta.

¹¹ Hay li ma Daniel wi ala mulla tun selemawa gaa kuɗ ɗerwelda, nam kal kalaf hay ziyda valamu, ziyda kulota valamu ira' ka mali goyo hay gal Yerusalem; sem ɦidi hay buurta nam ka girif gaa'a, nam ka siɗaw Lawna, suburumu kaw, ki nam ka li jew nala.

¹² Hay na'ta sumun kayni zuk kalaf vi Daniel, nisi fi kayni Daniel ka girif gaa'a, ka siɗaw Lawna valamu.

¹³ Bugolda nisi kalay kat mulla, law talamu kay gatta ta nam vula'ta, nisi di'e: Mulla, naŋ ɗo ɗerwelda ta telda ala, jar buur dok-ɦidi lakŋi, san gigekaw ma girif Lawn maraɗi, girif sa maraɗi kaw, say girifaŋgi mi naŋ mulla kepe, la naɗi ma gum hay zulla vi zlona ɗisu? Mulla hot dita: Van kayni gasiya kuɗ gatta vi Medena hiɗi Persena, gatta ta sa as muɗa'ɗita.

¹⁴ Nisi hot ditiya, di tam mulla lo: Mulla humaŋu, Daniel, kep jar sum sa yawsi ay goy gorvo hay Yuda pana, nam min hum kuɗaŋɗi, min hum kuɗ gatta ta naŋ tun seŋ gaa kuɗa'taɗi kaw, nam li siɗawta valam sem ɦidi hay buurta.

¹⁵ Hay li ma mulla hum kayni, dikam muɗ yor ŋolo, nam var hay dikamu kay suɗ Daniel goyo, ta-ta hay ɗikka vi fatta, nam so tuwam dono'o kay but Daniel goyo.

¹⁶ Bugolda nisi zuk kalaf tam mulla hiɗi winekŋa, nisi di'e: Mulla, naŋ wi'e, gatta vi Medena hiɗi Persena min ala slen ma telemna hiɗi dita vi mulla kaf ta mulla tun selem gaa kuɗa'ta sa as muɗa'ɗi.

¹⁷ Bugol kayni mulla vul hagata kay nisi ma vi Daniel, gum hay zulla vi zlona. Mulla sli ditiya di tam Daniel: Lawna vaŋu ma naŋ ka sumun hiɗi so-tuwta ma suɗaŋ goy suɗge.

¹⁸ Nisi mar hiɗiyn kepe tunum vun zulla, mulla tun soona kalamu hiɗi wayta ɓalamta hiɗi sa ŋulona valamu kaw, kay va mara ma muɗ tam Danielɗi.

¹⁹ Bugol kayni mulla kalay hay ziy ma mulda valamu, nam bur tos hay laata, nam may hin hagata tam boy sa sunda kay co talamɗi kaw, senda pir goy kiramu.

²⁰ Ŋarpita hay li ma liyn tun caw fo'o, mulla fokay kulo'o, nam kalay gosoy vun zulla vi zlona.

²¹ Hay li ma nam co goboy tam zulla, nam yi Daniel hiɗi del ma hawna, di tam Daniel ala: Daniel, naŋ ma sunda vi Lawn ma irina, Lawna vaŋu ma naŋ sunum hiɗi so-tuwta nagawa kay butaŋ goy vun zlona su?

²² Daniel tun caw law tam mulla ala: Mulla, musaŋ iri ta-ta musge.

²³ Lawna vanu gi sunda-wuralawna valamiya kay duk vun zlona, ta-ta zlon lan va ma joo'o noŋɗi, kay kiram ala nan li va ma jooɗi, vokaŋ naŋ mulla kaw nan may li va ma joo noŋɗi.

²⁴ Hay na'ta mulla muɗ firi ŋolo, nam vul hagata kay nisi ma vit Daniel ay kulo'o hay zulla pa. Hay li ma nisi vit Daniel ay kulo hay zulla pa vitna, nisi fi kayni tuwam may kaay goy mil noŋ ne'ɗi, kay vida valam kuɗ Lawna valamu.

²⁵ Mulla vul hagata kay nisi mar sum sa pi lawta kay Daniel, kay nisi ma cuksi hay zulla vi zlona, nisiya hiɗi gurona visiya hiɗi boyna visi kaw. Zlon zlaksiya, jetsi pek-pek hay li ma nisi bay co gaa dew zulla tuwa.

²⁶ Bugol kayni mulla Dariyus ɗo tam sumun kaf, tam jaf-sumun kaf, tam sumuna kuɗ vunna visiya hay nagat kuɗulu ala: Toyta mus hiɗi nigi ŋolo musge.

²⁷ Nan vul dita ala: Hay yam nagata van kaf, sumuna ma li nari kay Lawna vi Daniel. Kay namu mi Lawn ma irina, nam mus iriya ta-ta hay vatɗita. Mulda valamu as ɦo gaa noŋɗi, kolda valamu ka ta-ta hay dabaŋ-gu'ta kaw.

²⁸ Namu mi ma suɗ sana, butum goyo kaw, namu mi ma li ɗekka hiɗi sle ma suw mu'da hay dukalawna, hay nagata kaw. Namu mi ma suɗ Daniel goy vun tirek zlona.

²⁹ Daniel kay tuwamu muɗ dono'o hay liyna vi mulda vi Dariyus, hay mulda vi Sirus ma Persena kaw.