DANIEL 5 - BIBALDA TA PELDETTA

Yuldeta vi Belsasar, ni-gaata vi mulda vi Babilon

¹ Mulla Belsasar li yuldeta ŋolda kay sa ŋulona valamu hiɗi sum sa gu' guna, nam ci dolayna kir sum sa gu' guna kaw.

² Hay li ma Belsasar jugo dolayn jugona, nam vul hagata kay nisi mar tasana ma ora hiɗi ma doorona ma bulumu Nebukadnesar yawamis goy hay Tempella hay Yerusalem pana, kay mulla hiɗi sa ŋulona valamu hiɗi boyna valamu, hiɗi boy sa sunumna kaw min ci hayamu.

³ Nala nisi mar tasana ma nisi yawamay goy hay Tempella, hay ziyda vi Lawna hay Yerusalem pana; mulla hiɗi sa ŋulona valamu hiɗi boyna valamu hiɗi boy sa sunumna ci hayamu.

⁴ Nisi ci vinna, subur lawayna ma ora, ma doorona, ma wayna, ma kawayna, ma guna hiɗi ma hiɗiyna.

⁵ Hay na'ta kayni, cita-ɓam sa'a ma goy kirsiya, nam ɗo kat gulmun ma koray haɓi hay ziyna vi mulla, ɗiger vok liyn ma tun fitilla. Mulla wi cita-ɓamta na'ta ta ka ɗo'o.

⁶ Hay na'ta vok mulla muɗi jafam valamu, varta valamu muɗum nar ŋolo, sutayna vi cilwamu muɗi maŋaya, ŋulofomu muɗi ci kat tuwam bat-bat' kaw.

⁷ Mulla siwel hiɗi dono'o kay nisi maram sum sa wi caw mislekŋa, sa Kaldeena hiɗi sa tun gireyta; mulla sli ditiya di tam sa yalla hay Babilon: Ɗot tani sa ma jaŋa'awa, danti cawa'awa goyo, ma cukum sligar-purpella talamu, ma gum jaɓ ma ora kelemu, nam ma mus mi ma mul ɦidina hay mulda vanu.

⁸ Hay na'ta sum sa yalla vi mulla cuk kalaf talam kaf; may nisi as kay jaŋ ɗot na'ta goyɗi, asay kay ɗeka' cawa' goy tam mullaɗi kaw.

⁹ Ki kayn nala mulla Belsasar muɗi nar ŋolo; iram liweka, sa ŋulona valam kaw varta visi muɗi ɦayam-ɦayam'.

¹⁰ Kuɗ dita vi mulla hiɗi sa ŋulona valamu, ca-mulda kal kalaf talam hay ziy ma yuldeta, na' sli ditiya di'e: Mulla musaŋ iri ta-ta musge. Hin varta vaŋu muɗaŋ narɗi, hin vokaŋ liwekɗi kaw.

¹¹ Hay nagata vaŋ tani sa mara ka kepe, ŋusta vi lawayn sa peldetna ka hayamu. Hay liyna vi buŋ kayni, haraŋa, wida-yalla hiɗi yalda (numa) fa' hayamu, ŋray ca hiɗi yalda vi lawayna. Kuɗ kayni buŋu Nebukadnesar tunum ŋolo kay sa li gul-yalda, sa wi-mislekŋa, sa Kaldeena, sa tun gireyta kaw.

¹² Kay Daniel namna ma mulla kaam selem ala Belsasar kayni, numa fi hayamu ŋusta ta suw kafta, wida-ŋolda hiɗi yamda-wida, hiɗi varta-ŋolda kay di caw duwayt goyo, di caw jobta-ŋayayta, di caw lawta ta lop ŋolda goyo kaw; yaŋ Daniel aya, nam ma da' cawa' goyo.

¹³ Hay na'ta nisi mar Daniel kalaf vok mulla, mulla sli ditiya di tam Daniel: Naŋ damni mi Daniel ma kep jar sa daŋgayna, sa bunu mulla marsiyay hay Yuda pan su?

¹⁴ Nan humi labara kaŋ ala naŋu ŋusta vi lawayn ka hayaŋu, haraŋa ka hayaŋu, yamda-wida hiɗi yalda ta ira' tayɗita ka hayaŋu kaw.

¹⁵ Nisi mar sum sa yalla hiɗi sa wi caw mislekŋa vokan tani, kay nisi ma jaŋ ɗot tani, kay danti cawa' goyo kaw; may nisi as kay da' cawa' goyɗi.

¹⁶ May nan humi ala naŋ di caw slen goyo, vat law ma zulla kaw; may wulin kayni la naŋ as jaŋ ɗot tani, la naŋ danti cawa' goyo kaw, nan ma cukaŋ sligar-purpella kataŋu, ma gaŋ jaɓta ta ora keleŋu, naŋ ma mus mi ma mul-ɦidina hay mulda vanu kaw.

¹⁷ Nala Daniel hot dit tam mulla: Sle ma vulda vaŋu naŋ ma ŋomom maŋu, vulaŋ sle namna mi sa mara'a, may ɗota nan ma jaŋaŋgi goyo, ɗekaŋgi cawa' goy lay.

¹⁸ Awa, mulla, Lawn ma Kulo-Jamna vul mulda, ŋolda, suburta hiɗi gajijita mi buŋu Nebukadnesar,

¹⁹ kuɗ ŋolda ta Lawn vulumtita, sumun kaf, jaf-sumun kaf, sumun hay vunna kaf, ka li nari, tuwsi ka visi vokom bat-bat', gige ma nam min cum mati, nam cumu, gige ma nam min hinim iriya, nam hinimu; gige ma nam min vulum ŋolda, nam vulumu, gige ma nam min kiɗam goyo, nam kiɗamu.

²⁰ May hay li ma dikamu sli ya' kulo'o, ŋusta valamu so'otiya, jigal tuwa'a kaw, nam zutis gaa'a hay zlamda-mulda valam pa, nisi yaw gajijita valam goy kalamu.

²¹ Nan digiɗis goy jar sumun pa, dikamu muɗi ki dikga vi muura nala, liy ma musta valamu muɗi jar kurona ma fulla, nam muɗi ti hatna ki luwayn nala, tuwam ŋuruɓiya kuɗ maɗayn ma dukalawna kaw, ta-ta nam wi ala Lawn ma Kulo-Jamna, ti mul kay sum sa hay nagat kaf, nam as mus san hay mulda ki nam min nala kaw.

²² May naŋu, Belsasar, goora valamu, naŋ wi kayni hiɗi iraŋ kaf, nir na'ta kep naŋ min hot yaŋ gaa'aɗi.

²³ May naŋ sli yaŋ kulo'o kat Ma-Vatɗina ma hay wuralawna, tasana ma yawamay goy hay ziyna vi Lawna pana naŋ hinsi maram vokaŋu, nigi ci vinnawa hayamu, naŋu hiɗi sa ŋulona vaŋu, boyna vaŋu hiɗi boy sa sunda vaŋu, naŋ subur lawayna ma doorona, ma ora, ma wayna, ma kawayna, ma guna, ma hiɗiyna kaw ma as ɗuwɗi, ma as humɗi, ma wida valam mayɗi. May Lawna ma sukka vaŋu hiɗi zewaŋ hay ɓalamna naŋ min slum yalam kuloɗi.

²⁴ Kuɗ na'ta kayni nam gi cita-ɓalamiya kay ɓir ɗot kayni.

²⁵ Ɗot tani ɗoy ala: Mene, mene, tekel hiɗi Parsin.

²⁶ Dit cani min ɗek ala: Mene: Lawn ŋa buura vi mulda vaŋawa, nam daba' ya'awa,

²⁷ tekel: Naŋ tuni kay va ma ŋa nekŋa, naŋ hefteŋe,

²⁸ Parsin: Mulda vaŋu ɓuraway goyo, vulis goy mi sa Medena hiɗi sa Persena.

²⁹ Wulini wulini Belsasar vul hagata kay cuk sligar purpella tam Daniel, gum jaɓ ma ora kelemu, siwel goy ala nam ma mus mi ma mul-ɦidina hay mulda valamu.

³⁰ Hay henjet na'ta kayni Belsasar mulla vi Kaldeena fi cita-goyta.