DANIEL 4 - BIBALDA TA PELDETTA

¹ Nanu, Nebukadnesar, nan musi kiliŋ hay ziyna vanu, li firiya kaw hay ziy ma mulda vanu.

² Hay na'ta duwayt danu, na' muɗan nari, varta ta nan fi'e hay liyn ma buura vanu muɗan nari, slen ma vul tuwam kiranu hay duwayta hoban hiɗi narta ŋolo.

³ Kay na'ta nan vul hagata ala nisi ma mar vokamu sum sa yalla kaf hay Babilon, kay nisi ma dan caw duwayt goyo.

⁴ Hay na'ta sum sa li gul-yalda, sa wi caw mislekŋa sa Kaldeena hiɗi sa tun gireyta co'o. Nan ɗeksi duwayta, may nisi fi kay danti cawa' goyɗi.

⁵ May bugolsi kafe Daniel co vokanu, namu ma yum Belsasar kuɗ semda vi lawayna vanu, namu ma ŋusta vi lawayn sa peldetna ay hayamna. Nan ɗekem duwayta.

⁶ Nan dumu: Belsasar, naŋ ma ŋolla vi sa li gul-yalda, nan wi ala ŋusta vi lawayn sa peldetna ka hayaŋu ŋayayta ta suwaŋ naŋ tayɗi kaw, slen ma nan wum hay duwayta naŋ ma danti cawam goyo.

⁷ Kayni mi sle ma vul tuwam kiranu hay li ma nan ka tun suk kay va ma buura vanu, hay wida vanu, nan wi gun kep coli jar nagata, gu namna fiyok ŋolo.

⁸ Gu namna ŋolo, dono'o kaw. Sinamu co ta-ta kulo dukalawna, hay sin-nagat kuɗulu ir sumun ka cuki kalamu.

⁹ Humumu jifiy ŋolo, nam vuɗ vuɗ-gun ŋolo ta-ta nam vul tin mi kafe. muuriyana mol gaa kuɗ ɗuŋusamu, layay ma dukalawna ka lak kulo humamu kaw; sle ma irin kaf ka fi tin kayn kuɗumu.

¹⁰ Hay slen ma vul tuwam kiranu kay va ma buura van kayni, nan wi sa ma ŋomda ma peldetna kep jikay gaa dukalawni pa,

¹¹ nam siwel hiɗi delem kulo dono ŋolo ala: Kaagi gun gaa'a, sletem ɓalam goyo, slorom humum goyo, cukum vuɗam goyo. Hin muuray ma gaa kuɗumna mun goyo, hin layay ma humumna mer goyo kaw,

¹² may hin gi duŋuslna valamu coli hay nagat zaw, juni jun' hiɗi jaɓna ma kawayna, hiɗi jaɓna ma wayna, jar usna ma hay liyn ma busiyana, nam ma fi lomgona kuɗ maɗayna ma dukalawna, nam ma fi galla valamu jar muuriyana ma ti hatna kaw.

¹³ Halla vi sana ma hayamna ma muɗa, halla vi muura ma vulis talamu, liyn siɗiya ma cap kalamu.

¹⁴ Kitata na'ta kayni cola' si nisi sa ka li ŋomda, lawta kayni cola' si nisi sa peldetna, kay sa irina kaf ma wi ala ma Kulo-Jamna koli kay mulda vi sumun kaf, nam as vula' mi gigekaw ma nam mina, sum sa cawna nam muɗsi kulo ŋulo'o kaw.

¹⁵ Kayni ti duwayta ta danta, nanu mulla Nebukadnesar. Naŋu Belsasar, danti cawa' goyo, kay sum sa yalla hay nagata van kaf as danti cawa' goyɗi, may naŋ asa, kay ŋusta vi lawayna sa peldetna ka hayaŋu.

¹⁶ Nala Daniel ma yum Belsasar viy goy diwiŋ' ir liyn neeɗa, varta valamu muɗum nari. Mulla sli ditiya di'e: Belsasar, hin duwayta hiɗi cawa' ma di goyna muɗaŋ narɗi. Belsasar hot dita: Hih mulla vanu! Duwayt kayni ma li kay sa gaw kaŋŋa lige, cawa' ma di goyna kaw ma li kay sa gawt kaŋŋa lige.

¹⁷ Guna ma naŋ wumna, ma muɗi ŋolo dono'o kaw, ma fiyokka valam co ta-ta kulo dukalawna, ma sum hay sin-nagat kuɗulu irsi ka cuki kalamna;

¹⁸ gu namna ma humam goɗay ŋaa'a, vuɗna valam ka ŋolo kaw, ma ka vul tin mi kafe kaw, ma muuriyan ma fulla ka lak gaa kuɗ ɗuŋusamu, layayn ma dukalawna ka lak kulo humamu kaw,

¹⁹ kayni mi naŋ mulla kay tuwaŋu ma muɗi ŋolo dono kaw, ma ŋolda vaŋu wuli ta-ta goboy co kulo wuralawna, ma kolda vaŋu co ta-ta hay sin-nagat kuɗulu.

²⁰ A naŋ mulla wi kep jar sa peldetna sa ŋomda jikay gaa dukalawn pa ka di ala: Kaagi gun gaa'a, ɓulakam goyo, may hin duŋuslamu hiɗi so'olomu gaa kay nagat zaw, hay jaɓna ma kawayna hiɗi wayna, jar us ma goy busiyana, nam ma fi lomgona kuɗ maɗayn ma dukalawna, nam ma fi galla valamu jar muuriyan ma ti hatna, ta-ta liyn siɗiya ma cap kalamu.

²¹ Kayni mi cawa'a ma diy goyna mulla, kitata vi ma Kulo-Jamna ma vaŋu:

²² Naŋ ma digiɗis goyo jar sumuna pa, musta vaŋu ma li jar muuriyan ma fulla, naŋ ma ti hatna ki luwayn nala, tuwaŋ ma li ŋuruɓiya hiɗi maɗayn ma dukalawna, liyn siɗiya ma cap kaŋu, ta-ta naŋ ma wi ala ma ŋol ma Kulo-Jamna koli kay sumun kafe, nam as vul mulda mi gigekaw ma nam mina.

²³ Ma dita ta vuli ala hin duŋuslna hiɗi so'olla vi guna coli gaa'a, cawa' kayni ala mulda vaŋu ma hin ti faŋ naŋga hay li ma naŋ ma wi ala nam ma kol kay slena ka hay wuralawna.

²⁴ Wulin kayni mulla vanu, hin gatta vanu li kiraŋ ŋaa'a lige. Vataŋ sulukŋa vaŋ goyo hiɗi lita-ɗigerta, vataŋ joota vaŋ goyo kaw hiɗi slugota tam sa hawna, la nala sle'ta vaŋu ma ɦur voko.

²⁵ Slen kayni kaf co kay mulla Nebukadnesar.

²⁶ Hay li ma til doogo yam ma' vatawana, nam poy kulo kay yam-ziy ma mulda valamu hay Babilon.

²⁷ Mulla sli ditiya di'e: Tan kayni mi Babilon ma ŋolla ma nan inimu kay tun ziyn ma mulda haya, nan inimu hiɗi gaŋeraŋa vi donota vanu, kay suburta vi gajijita vanu ɗisu?

²⁸ Hay li ma mulla bay vat dita valam tuwa, del may goy wuralawn pa di'e: Taŋ naŋu mulla Nebukadnesar yoboyn kayni diys goyo, mulda vaŋu sliy goy kaŋu.

²⁹ Naŋ ma digiɗis goy jar sumuna pa, musta vaŋu ma li jar muuriyana, naŋ ma ti hatna ki luwayn nala, liyn siɗiya ma cap kaŋu, ta-ta naŋ ma wi ala ma ŋol ma Kulo-Jamna nam koli kay mulda vi sumun kafe, nam as vula' mi gige ma nam mina kaw.

³⁰ Hay liy namna yoboyn kayni vunam hobi goyo tam Nebukadnesar, nam digiɗis goy jar sumuna pa, nam muɗi ti hatna ki luwayn nala, tuwam ŋuruɓiya hiɗi maɗayn ma dukalawna; ta-ta ɗuŋus ma kalamna wuliya ki zlimit bakŋa nala, tirekemu muɗi ki tirek layna nala.

³¹ May hay li ma buura asawana, nanu Nebukadnesar muɗ iran kulo'o hay wuralawna, ŋalda vanu hotay tanu lo, nan vul suburta tam ma Kulo-Jamna, nan gideɓe mi ma Kulo-Jamna, vulum suburta kaw, namu ma mus ta-ta hay vatɗita, namu ma kolda valamu ti kolda ta vatɗita, mulda valamu mus ta-ta tam jafsi voksi lo voksi lo.

³² Nisi sa kay nagat kaf nisi ki va ma waa; ɦawa nala, nam li va ma kiram ŋaa'a tam vok-ma-duura vi wuralawna hiɗi sum sa hay nagatna kaw, sa ma as col digamu dum ala «naŋ lum mi mige?» Mayɗi.

³³ Hay na'ta kayni, ŋalda hotay tanu, suburta, gajijita hiɗi wileta vi mulda vanu hot vuli tan lo, sa vulan gatta hiɗi sa ŋulona vanu hot garan kuɗan lo; nan hot kal hay mulda van lo. Ŋolda vanu ɦur voka' suwa kaw.

³⁴ Wulin kayni, nanu Nebukadnesar, nan subur mulla ma wuralawna, tiyim selemu slum yalam kulo'o kaw, kay lopna valam kaf gasiya, hagata valamu ɗigere, sum sa sli yisi kulona nam hotsi yisi gaa'a kaw.