DANIEL 3 - BIBALDA TA PELDETTA

Nuriyom Daniel sa ɦidina cuki hay kuta ŋolda

¹ Mulla Nebukadnesar in va ma sli tuw sana, nam inim hiɗi ora, fiyokom ma kulona ir goldoŋ dok-karkiya, buɗukŋa valamu ir goldoŋ karkiya. Nam inimu hay lokŋa vi Doura, hay nagata vi Babilon.

² Mulla Nebukadnesar yi sa ŋarmanna, sa ŋom-slena, sa guvernera, sa ɗiger-lawta, sa ŋom gurjuta, sa wi gatta, sa ka kitata, hiɗi sum sa ŋulona kuɗ nagat kafe, kay nisi ma co hay yuldeta vi malta vi vun va ma sli tuw-sana, ma nam inimna.

³ Ki kayn nala sa ŋarmanna, sa ŋom-slena, sa guvernera, sa ɗiger-lawta, sa ŋom gurjuta, sa wi gatta, sa ka kitata hiɗi sum sa ŋulona kuɗ nagat kaf, tok tuwsiya kay mal vun va ma sli tuw-sana ma mulla Nebukadnesar inim kulona. Nisi zlar goy vok va ma sli tuw-sana namna.

⁴ Sa ma siwelda vi mulla siwel hiɗi delem kulo'o ala: Dit kayni vuli tigiya, nigi sumuna, jaf-sumuna, sumun kuɗ vunna kafe!

⁵ Hay li ma nigi hum del gozona, zlekemna, dil-ŋolla, parwayna, dil gurayna, ɦuura hiɗi del sle ma li nullawa kafe, nigi ma dab vokgi gaa'a, kay girif va ma sli tuw-sana ma ora ma mulla Nebukadnesar inimna.

⁶ La gigekaw min girif gaa'aɗi, dab vokom gaa vokomɗi kaw, sa namna ma gumis hay zul ma kut ŋal ŋolo.

⁷ Kuɗ kayni, hay li ma sumun kaf hum tiyna vi gozona, zlekemna, dil-ŋolla, parwayna, dil gurayna, ɦuura hiɗi del sle ma li nullawa kafe, sumun kafe, jaf-sumun kafe, sumun kuɗ vunna kaf girif gaa'a dab voksi gaa'a vok va ma sli tuw sana ma Nebukadnesar inimna.

⁸ Hay liy namna de', sum sa Kaldeena segena co'o, nisi pi lawta kay sa Yudiyana.

⁹ Nisi sli ditiya di tam mulla Nebukadnesar: Mulla, musaŋ iri ta-ta musge.

¹⁰ Mulla, naŋ di goy ala san gigekaw ma hum tiyna vi gozonawa, hiɗi zlekemna, hiɗi dil ŋolla, hiɗi parwayna, hiɗi dil gurayna, hiɗi ɦuura hiɗi sle ma gi nulla kafe ni, nam ma girif gaa'a dab vokom gaa vok va ma sli tuw sana ma ora

¹¹ kuɗ dita vaŋu, la sa girif gaa'a kay dab vokom gaaɗi, ma gumis hay zul ma kut ma ŋal ŋolo naɗi su?

¹² Yudiyan sara ka'a sa naŋ vulsi ŋomda vi nagat Babilon hay ɓisiya, nisi kayni Sadrak, Mesak hiɗi Abed-Nego. Sum nisina may hum kuɗ gatta vaŋ naŋ mullaɗi, nisi may sun lawayna vaŋɗi, va ma sli tuw-sana ma ora ma naŋ kotomna nisi may girifimɗi.

¹³ Kay Kay na'ta Nebukadnesar hay ɦiyda hiɗi purcakka, vul hagata kay nisi maram Sadrak, Mesak hiɗi Abed-Nego, nala nisi marsi vok mulla.

¹⁴ Nebukadnesar sli ditiya di tisiya: Sadrak, Mesak hiɗi Abed-Nego, dikgi so'otaya kay girif lawayna vanɗi, kay girif va ma sli tuw sana ma nan inimnaɗi gasi su?

¹⁵ Wulin ɗawni, hay li ma nigi ma hum tiyna vi gozona, zlekemna, dil-ŋolla, parwayna, dil-gurayna hiɗi slen ma gi nulla mara'a mara'a, kotgi tuwgi kay girif gaa'a, kay dab vokgi gaa vok va ma sli tuw-sana ma nan inimna. May la nigi min girifimɗi, wulini wulini nigi ma cukis hay zul ma kut ŋal ŋolo, lawn ma suɗgi goy hay ɓanu nam gige?

¹⁶ Sadrak, Mesak hiɗi Abed-Nego hot dita tam mulla Nebukadnesar: Numa may hotaŋ dit kuɗ kaynɗi.

¹⁷ La slen kayni as li nala, Lawna vuma'a ma numa girifimna donota valam as kay suɗma goy hay zul ma kut ŋolo, nam as suɗma goy hay ɓaŋ naŋ mulla kaw.

¹⁸ La naɗi, naŋ mulla ma wi ala numa ma sun lawayna vaŋɗi, girif va ma sli tuw-sana ma ora ma naŋ kotomnaɗi kaw.

¹⁹ Hay na'ta Nebukadnesar hobay hiɗi ɦiyd ŋolo vokom muɗi ɗuw ir valamu vok Sadrak, Mesak hiɗi Abed-Nego. Nam vul hagata kay nisi ma ŋal kut hay zulla ŋolo sem siɗiya suw ma nisi lum jewna.

²⁰ Bugolda nam vul hagat tam soje segena sa donona jar sojena valamu, kay nisi ma jun Sadrak, Mesak hiɗi Abed-Nego, kay cuksi hay kuta ta lifik ŋolda.

²¹ Nisi jun sum nisina, sligara hiɗi sligar-tuwna visi ka cuki tisiya, hiɗi sligara visi hen kaf cuki tisiya, nisi cuksi hay kuta ta vidik ŋolda.

²² Kuɗ vun-ma-gatna vi mulla ma vuli dono ŋolla, kay kuta ka ŋalay dono ŋolo, sin-kuta ma tilekŋa ci goy sum sa cuk Sadrak hiɗi Abed-Nego haya'na.

²³ Nala Sadrak, Mesak hiɗi Abed-Nego cukis juni jun' hay zul ma kut ka lifik ŋolla.

²⁴ Hay na'ta Nebukadnesar muɗi nari, nam fok kulo gosoy wit; nam sli ditiya di tam sa vul gatta valamu: Nay may cuksi hay kut kayn sumun ɦidi juni jun ɗisu? Nisi di tam mulla: Awa gasi nala mulla.

²⁵ Nam sli diti lo di'e: May nan ka wi sumun fiɗi kalaf hay kuta, nisi ka poy goy butiya, sa may wi va ma ɓulakay tisiɗi kaw, ma fiɗina ɗuw ki goora vi lawayn nala.

²⁶ Bugolda Nebukadnesar tuɗ goboyo tam zulla ma kut ka ŋal hayna, nam sli ditiya di'e: Sadrak, Mesak hiɗi Abed-Nego, nigi sa sunda vi Lawna ma Kulo-Jamna, kalgiyay goyo, nigiyaya. Nala Sadrak, Mesak hiɗi Abed-Nego kalay goy hay kut pa.

²⁷ Sa ŋarmanna, sa ŋom-slena, sa guvernera hiɗi sa vul gatta vi mulla tok tuwsiya; nisi wi ala donota vi kuta may li va kat sumun lakŋi noŋɗi, ɗuŋus yisiya may warayɗi, sligara visiya may ɓulakay noŋɗi kaw, nisi may his no'os noŋɗi kaw.

²⁸ Nebukadnesar sli ditiya di'e: Suburta tam Lawna vi Sadrak, Mesak hiɗi Abed-Nego, namu ma gi sunda-wuralawna valamiya kay but sa sunda valam goyo. Nisi zamam ɓalamu, nisi ŋel gatta vi mulla, nisi hin tuwsi vun mitta, kay nisi min sun lawayn maraɗi, girif lawayn maraɗi kaw, may Lawna visi kepe.

²⁹ Wulin kayni nam col dita ala: La san gigekaw, jar jaf-sumuna hiɗi vun sumuna arige kaw, la nam di yoboyn joo'o kat Lawna vi Sadrak, Mesak hiɗi Abed-Nego, ma calamis goyo, ziyna valamu ma muɗ goy difir-fira kaw. Kay lawayn mara'a ma as suɗ san ki kayn nala mayɗi.

³⁰ Hay na'ta mulla Nebukadnesar ɦur ŋolda hiɗi suburta vi Sadrak Mesak hiɗi Abed-Nego hay nagata vi Babilon.

Daniel di caw duwayt goy mi mulla lo

³¹ Mulla Nebukadnesar tam sumun kaf, tam jaf-sumun kaf, tam sumuna kuɗ vunna kaf sa ka li ziy gaa kay nagat kuɗulu, toyta ma li hiɗi nigi ŋolo lige.

³² Van kiran ŋaa'a kay di goy kay ɗekka hiɗi sle ma suw mu'da ma Lawn ma Kulo-Jamna ɗekemawa kiranu.

³³ Ɗekka valamu na'ta ŋolo natige, sle ma suw mu'da valamu nam dono'o natige. Mulda valamu kayni ti mulda vatɗita, musta-mulda valamu ka'a tam jafsiya ta-ta tam jafsi lo.