DANIEL 11 - BIBALDA TA PELDETTA

¹ Nanu, hay busata jewta vi Dariyus ma Medena (hay mulda), nan ay coli hiɗi namu, kay gut kuɗumu, kay vulum donota kaw.

² Wulini nan min ɗekaŋ kay gasita. Humaŋu, muliyan segen ma co ɦidi lo, nisi ma ti mulda kay Persiya, bugolda mul ma sem fiɗina ma tok farayn ŋolo suw sa ɦidina, hay li ma nam ma muɗ dono'o hiɗi farayna valamu, nam ma yawsi kulo'o kaf kat mulda vi Yavan.

³ May mul ma dono ŋolo ma fok kulo'o, ma ti mulda hiɗi gaŋeraŋ ŋolo, nam ma li va ma nam mina.

⁴ Hay li ma nam ma sli yalam kulo'o, mulda valamu ma ɓet goyo, ma ɓuraw goy jar simeɗ ma fiɗina vi dukalawna, na' ma hin hay jafam loɗi, ma li dono'o ki nam ay naɗi kaw, kay mulda valamu ma jet goyo, na' ma vulis goy tam sara'a kaw.

⁵ Mul ma gal kayamna ma muɗ dono'o. May kep jar sa ŋulona valamu ma muɗ dono suwumu, ma kola kaw, kolda valamu ma lin ti kolda ta donota.

⁶ Hay vatta vi busat neeɗa, nisi ma jun bonota, goota vi mul ma kayamna ma co kat mul ma gal gaana kay jun bonota, may na' ma li va ma as mus ŋolɗi, nam kaw ma col ɗeŋɗi, namɗi kaw, glaŋamɗi kaw; na' ma vulis goyo hiɗi nisi sa mara'na, hiɗi bu'a kaw, hiɗi nam ma guti kuɗa'a hay liyn kayni kaw.

⁷ Ma giy-goyna vi sutayna valamu kep ma fok kulo'o hay baŋalamu; nam ma co kat sojena, nam ma kal hay gulmunna vi mul ma gal gaana, nam ma li ki nam min nala, ma muɗ dono suwa kaw.

⁸ Lawayna visiya, slen ma sli tuw sana ma yoray kawayna visiya hiɗi slen ma tek ŋolo ma doorona hiɗi ma ora kaw nam ma tum ɓuraŋi. Bugolda nam ma mus ir busat neeɗa goy gine hiɗi mul ma gal gaana.

⁹ Mul ma gaana ma hotay hay nagata vi mul ma kayamna, ma kayamna ma hot hay nagata valamu.

¹⁰ Gurona valamu ma tok tuwsiya kay li duura, nisi ma tok vok-ma-duura ŋolo ŋolo, kep jarsiya ma tuɗ vokomu, nam ma li duura, hiɗi sojena valamu nam ma kulfut goyo ki niy-ɓatna nala. Bugolda nam ma hotiya; nam ma tuɗ duura ta-ta kulo tam gulmunna valamu.

¹¹ Mul ma gal kayamna ma muɗ ɦiy ŋolo, nam ma kalay goyo kay dur mul ma gaana, mul ma gaana ma fokay hiɗi sumun kuɗum ŋolo, may vok ma kuɗum ŋol namna ma vulis goy hay ɓam mul ma kayamna.

¹² Hay li ma nam vat vok ma ŋolla namnawa, suburta ma kal hayamu; nam ma ci sumun ŋolo ŋolo, may nam ma kolɗi.

¹³ Kay mul ma gal gaana ma hotay lo, nam ma tok sumun ŋolo suw ma jewna; hay vatta vi liyn neeɗa, ir busata neeɗa, nam ma tuɗis vokomu hiɗi vok-ma-duura ŋolo, hiɗi farayn ŋolo kaw.

¹⁴ Hay na'ta ɗawni, sumun ŋolo ma yaw kulo'o kat mul ma gal kayamna, sum sa ɦawlana jar sumuna vaŋu ma yaw kulo'o kay li ɗekka, may nisi ma puk gaa'a.

¹⁵ Mul ma gal gaana ma ma'a, nam ma in damna, ma sli hoyok-ziy ma gulmun talamna. Sojen sa kayamna hiɗi sum sa wi duura visiya ma col digsiɗi, nisi ma fi donota kay col digsiɗi.

¹⁶ May nam ma min co kay durumu ma li va ma nam mina, sa ma as kay col digamu mayɗi, nam ma col hay nagata ta jifiy suwta, slen ma nam as kalamna nam ma ɓulakam goyo.

¹⁷ Nam ma tun varta valamu kay co'o hiɗi donota vi mulda valam kaf, kay jun bonot hiɗi namu, nam ma vul goota valam kuɗum ca'a kay bam goyo, may van kayni as liɗi, kay nam ma as kay kaynɗi.

¹⁸ Bugol kayni nam ma muɗ iramu tam jokona, nam ma yaw jokon ŋolo kaw, may mul ma duura kepe ma vat lop ma ŋulda valam goyo, nam as li lop ma ŋulda loɗi.

¹⁹ Hay na'ta nam ma muɗ iram hay hoyok-ziy ma donona ma hay nagata valamu; nam ma puk gaa'a, nam ma nig gaa'a, sa as kay fum loɗi.

²⁰ Sa ma min vurna baŋalamna ma mar sa ma joo'o kepe hay gal ma ŋaana vi nagata, may buur ne' ɦawa bugolda, nam ma toys goyo, kayni ma liys hiɗi ɦiydaɗi, hiɗi duuraɗi kaw.

²¹ Sa ma noyay goyo ma sli baŋalamu, nam ma cuk gaŋeraŋa vi mulda talamɗi; nam ma kal jar toyta, ma sli mulda hiɗi ɗutta.

²² Vok-ma-duura ma min kulfut goyo ki niy-ma-riŋŋa nalana, ma kulfutis goy vokomu, sa yerimana vi bonota kaw ma li nala,

²³ bugolda hay li ma sumun tapawa hiɗi namu, nam ma li ɗutta; nam ma fok kulo'o, ma muɗ dono'o hiɗi sumun neeɗa.

²⁴ Hiɗi ŋalda valamu, nam ma co hay liyn ma goɗayna vi nagata; nam ma li va ma sumiyam may lumɗina, ma sumay sumiyam may lumɗina kaw, nam ma ɓuraw sle ma ɓuraŋŋa, sligara hiɗi farayna, nam ma fok lawta kay dur hoyok-ziy ma donona, kayni ma li ir liyn neeɗa.

²⁵ Nam ma tun vok-ma-duura ma ŋolo, nam ma vul donota valamu hiɗi gaŋeraŋa valam kaf kay dur mul ma gal kayamna, mul ma gal kayamna kaw ma kot tuwamu kay duura hiɗi vok-ma-duura ŋolo ŋolo hiɗi sojen kuɗum ŋolo kaw; may nam ma asɗi, kay nisi ma ŋra lawt ŋolo ŋolo kalamu.

²⁶ Nisi sa ti tin ma jibetna kay tablena valamu ma cum goy si nisiya, nisi ma kulfut kay sojena valamu, mitta ma ci sumun ŋol suwa may.

²⁷ Muliyan sa ma'na ma gar hay diksiya kay li joota, nisi ma lak vok table ma kepna kay purat sinda, may nisi ma asɗi, kay dabta ma co'o hay liyn ma ŋaɓay ŋaɓna.

²⁸ Nam ma hot hay nagata valamu hiɗi farayn ŋolo; dikam ma fok kulo'o kat bonota ta peldetta, nam ma di joo'o kata'a, bugolda nam ma hot hay nagata valamu.

²⁹ Hay liyn ma kaay kaana, nam ma tuɗ dur mulda ta kayamta lo; may hay na'ta slen ma li ki sem ma jewna nala loɗi.

³⁰ Lumayna vi Kittim ma ŋuyumu, nam ma muɗ bay-kursuliya, nam ma hot bugolomu. Bugolda, hobay hiɗi ɦiyda, nam ma fok kulo kat bonota peldetta. Nam ma hotay lo, ma tun ŋalda valamu kay sum sa noy bonota ta peldetta goyo.

³¹ Vok-ma-duura ma co'o kuɗ dita valamu; nisi ma muɗ liyn ma peldetna goy liwisi, nisi ma bulak hoyok-ziyna kaw, nisi ma tel ɗifin ma dok-dokŋa goyo, ma tun liwista vi ɓulak-goyta kaw.

³² Nisi sa di newta kay bonota nam ma ɗutsi goy hiɗi law ma sinna. May sum sa wi Lawna visiya ma col dono'o,

³³ sum sa wi voksina jar sumuna ma ɗek sumun ŋolo. Sum segena ma puk gaa'a ir neeɗa kuɗ kew-gaferaŋa, kuta-ŋalta, gorvota hiɗi ɓuraŋŋa.

³⁴ May hay li ma nisi ma puk gaa ɗawni, nisi ma fi gutda neeɗa, sumun ŋolo ma tap kuɗsiya, may hiɗi ɗutta ɦawa.

³⁵ Segena jar sa wi voksina ma puk gaa'a, kay nisi ma fi wakka, fi poora hiɗi muz goyo kaw, ta-ta hay dabta vi liyna, kay dabta vi liyna ma co hay liy ma liyn kaay kaana.

³⁶ Mulla ma li va ma nam mina, nam ma fok kulo'o, nam ma sli yam tuwam kulo'o kat lawayn kaf, nam ma di sle ma san as dumɗina kat Lawna vi lawayna; nam ma muɗ dono'o ta-ta ɦiyda (vi Lawna) ma hoba, kay slen ma ay diy dina ma li goyo.

³⁷ Nam ma tun ŋalda valam kay lawayna vi sumiyamɗi, kay lawayn sa jifiyna vi boynɗi, nam ma tun ŋalda valamu kay lawayn mara kep noŋɗi, kay nam ma sli yam tuwamu kulo kay kafe.

³⁸ Hiɗi kayni kaf hay baŋalsiya nam ma sli yam lawayna vi hoyok-ziy ma donon kulo'o, lawayna sa sumiyam may wisi'aysɗi, nam ma slum yalam kulo'o hiɗi ora, doorota, hiɗiy ma ŋaana hiɗi sle ma tekŋa kaf.

³⁹ Nam ma li duur kat hoyok-ziy ma donon ɗawn hiɗi laway sa pulla; sum sa tap kuɗumna nam ma hobsi hiɗi gajijita, nam ma vulsi kolda kay sumun ŋolo, nam ma ɓurawsi nagata ki wurakŋa visi nala.

⁴⁰ Hay vatta vi liyna, mul ma gal kayamna ma li duura hiɗi namu. Mul ma gal gaana ma co kalamu ki ɦiwliŋŋa nala, hiɗi keke-ma-duura, sa ɓe kulumayna, hiɗi lumayna ŋolo; nam ma teris vokomu gaa kay nagata; ma kulfut kalamu ki niy-ma-riŋŋa nala, ma capa.

⁴¹ Nam ma tuɗ vokomu hay nagata ta jifiyta; sumun ŋolo ma puk gaa'a, may Edom, Mowab hiɗi sa ŋulona vi Amonitna ma pir goy vun ɓalamu.

⁴² Nam ma meɗ ɓalam goy kay nagat ŋolo, nagat Egipte kaw as hulot goyɗi.

⁴³ Nam ma yaw timgil ma hiɗi ora, ma hiɗi doorona hiɗi sle ma tek ŋolo ma hay Egipten kaf. Sum sa Etiopiya hiɗi sum sa Libiya kaf ma tuɗ hay baŋalamu.

⁴⁴ May labara ma co hay gal ma kuɗuwna hiɗi gal ma gaana pa kay muɗum nari, nam ma kal hiɗi purcakka ŋolda kay ɦilif jaf-sumun goy ŋolo.

⁴⁵ Nam ma pi guɗukŋa vi ziy ma mulda valamu goy jar niy-ŋolla, hay galla vi hiɗiyta ta gajijita ta peldetta. Bugol kayni nam ma co tam dabta valamu, sa ma as kay co gut kuɗumu may loɗi.