DANIEL 10 - BIBALDA TA PELDETTA

Sunda-wuralawna vul tuwam kir Daniel kay ɗekem Kay slen ma min li hay buur ma cawna

¹ Hay busata ɦidita vi Sirus mul ma Persiya, yoboyn kep ɗeki kir Daniel ma yum Belsasar. Yoboy namna kayni gasiya, duura ŋolla ma li'e, nam vi yoboy namna, hum caw slen ma vul tuwam kiramna.

² Hay li namna kayni, nanu, Daniel, nan mus hay do'olla ir lumu ɦidi.

³ Nan min ti tin ma jibet noŋɗi, sliwna hiɗi vinna nan min tunum hay vunanɗi, nan min set tuwan hiɗi mulɗi kaw, ta-ta lumu ɦidi vatay vat'.

⁴ Hay buurta dok-ma' yam fiɗita vi til ma jewna, nan ka colay deŋel niy-lum ma ŋolla ma yum Hiddekel.

⁵ Nan poŋ iran kulo'o, nan ɗuw kayni, iran wi sa kep cuki hiɗi sligar ma haɓna, furamu ay juni hiɗi kanti ma ora vi Ufas.

⁶ Tuwamu ay ki hiɗiyn krisolit nala, vokomu sli va ma wile'e nala, iramu ki sin-kuta nala, ɓalamu hiɗi selemu ki wayta ta golɓotta nala, delem ma dina ŋray ca ki sumun ŋol dak-dak nala.

⁷ Nanu Daniel, van kayni vul tuwam kiran nan van kepe, kay sum sa ay hiɗi nanu may wi van kaynɗi, may narta ŋolda bowsiya, nisi mun jaŋi kay ŋay tuwsiya.

⁸ Nan hin coli van kep zaw, nala wida ŋolda na'ta vul tuwa' kiranu; dono ma tanna vat goyo, iran zoɓa, vokan muɗ mirwiki, donota vanu vat goyo.

⁹ Nan ka hum delem ma di yoboyna; hay li ma nan hum delem ma di yoboyna, nan ŋel goy diwiŋ', nan dab vokan gaa'a kay nagata.

¹⁰ Ɗuw na kayni, ɓam tara kep tun tanu, musan kulo kay ŋulofonu hiɗi gifanu, tuwan ka van bat-bat'.

¹¹ Bugolda nam di tanu: Daniel, sa ma hayan kaŋŋa, humaŋ yoboyna ma nan min di taŋu: Colaŋ kulo kay seŋu hay liyn ma naŋ hayamna zawni; kay nan gi'ay taŋ wulini. Hay li ma nam dan yoboyn kayni dina, nan col kulo'o hiɗi tuwan van bat-bat'.

¹² Nam di tanu: Daniel, laŋ narɗi; kay tun caw tam buurta jewta ta naŋ fi hay dikaŋu kay huma, kay hot yaŋ gaa vok Lawna vaŋ pa, yoboyna vaŋ humisawa, nan co tan kayni kuɗ yoboyna vaŋu.

¹³ Mulla vi nagata vi Persiya col diganu ir buur dok-ma' yam kep; may wulin kayni Mikayel, kep jar sa ŋulona coowa kay gut kuɗanu, nan musi tani kat muliyana vi Persiya.

¹⁴ Wulini nan coowa kay ɗekaŋ kay slen ma min li tam sumuna vaŋu hay buur ma min co voko; kay va min ɗek tuwam kiraŋ lo kay buur namna cani.

¹⁵ Hay li ma nam ka dan yoboyn kayni, nan jak iran gaa kay nagata, nan mus ŋal kiliŋi.

¹⁶ Ɗuw na kayni, kepe ma sli goora vi sana nala jon vunanu. Nan mal vunan goyo, nan lawa, nan di tam nam ma ka coli vokanu ala: Mulanna, kuɗ slen ma vul tuwam kiranu, nan kalay hay yorta ŋolo, dono may tan ne' noŋɗi.

¹⁷ Nanu sa ma sunda vi mulanna as law hiɗi mulanna ɗawni ir nanige? Kay dono tara kep kaw tay tan loɗi, sukan may loɗi.

¹⁸ Nala nam ma sli san nalana jon mara lo, muɗan dono'o.

¹⁹ Bugolda nam di tanu: Laŋ narɗi, sa ma hayan kaŋŋa. Toyta mus hiɗi naŋ musge. Vaŋ dikaŋu, vaŋ dikaŋu. Hay li ma nam ka law tanu, nan hot fi dono'o, nan di'e: Mulanna, daŋu kay naŋ lanawa dono'o.

²⁰ Nam di tanu: Naŋ wi va ma nan co tani kalamna su? Wulini nan min hota kay dur mulla vi Persiya; hay li ma nan min tuɗa, mulla vi Yavan ma co'o.

²¹ May nan min daŋ goy jewe kay slen ma ka ɗoy hay ɗerwella vi Gasita. Sa kep kaw ma as gut kuɗanu kay dur sum nisin lakŋi mayɗi, may mi Mikayel mulla vigi kepe.