CAWA'TA TUNITA 9 - BIBALDA TA PELDETTA

Bonota vi Lawna hiɗi Nuwa

¹ Lawn gi bol kay Nuwa hiɗi gurona valamu; nam disiya: Biyagi ŋolo, ligi ŋolo, hobgi nagata.

² Muuriya ma kay nagat kaf ma li nar kuɗgiya, layayn ma dukalawn nala kaw, slen ma ka gi suk gaa kay nagat kaf, kuluf ma goloŋ hay niyn kaf kaw. Nan vulumawa hay ɓigi kafe.

³ Slen kaf ma ka hiɗi sukka hayamna ma lin mi tina vigiya, nan vulgitawa ki nan vulgi hadaf ma goɗayn nala kaw.

⁴ May nigi ma ti sliw ma hiɗi busuwnɗi, kay irita ka hay busuwna.

⁵ Nan ma job yam busuwna vigiya ma irit ka hayamna. Nan ma jobom yalam tam muuriyan kaf ma min cigi goy mati, nan ma job irita vi sana tam sana kaw, tam ɓasulumna ma min cum goyo kaw.

⁶ Sa ma ɦok busuw san goyna, sa mara ma ɦokom busuwan nam goy kaw, kay Lawn kot san kayni ki nir tuwam nam nala.

⁷ May nigiya, biyagi ŋolo, ligi haca-haca', mergi goy kay nagat noŋ kuɗulu, hobgi yam nagata.

⁸ Lawn hot di tam Nuwa hiɗi gurona valam ala:

⁹ Humgiya, nan min jun bonot hiɗi nigiya, hiɗi jafna vigi ma bugolgin kaw;

¹⁰ nan min jun bonot hiɗi sle ma irina ma ka hiɗi nigi wulini, layayna hiɗi farayna hiɗi muuriyan ma gaa kay nagat pete, kayn di ala muuriyan ma irina ma cukay goy hiɗi nigiya hay lumna pete.

¹¹ Nan jun bonota van hiɗi nigi ɗawni, sle ma gi suk kaf niyn as de' gaa kay nagata kay vatam goy loɗi. Niyn ma de ŋol kay ɓulak nagat goy loɗi.

¹² Lawn hot di'e: Nan min tun va ma ɗek bonota ta nan juna' jaran hiɗi nigiya hiɗi slen ma irina ma ka hiɗi nigi kaf, ta-ta tam jaf ma vokŋ ɗaw.

¹³ Nan ma gi kelkedekŋa van kulo'o hay ɗugulla, nam ma ɗek goy kay bonota van ta nan juna' jaran hiɗi nagata;

¹⁴ vok ɗawni, hay li ma nan hin ɗugullawa ma kay nagata, kelkedekŋa ma vul tuwamay goy hay ɗugulla,

¹⁵ human ma gan kay bonota ta jaran hiɗi nigita, hiɗi sle ma irin kaf, hiɗi sumun noŋ kaf, nala niy namna ma de ŋolo kay vat jaf sum sa gaa kay nagat goy loɗi.

¹⁶ Kelkedekŋa ma bur kulo jar ɗugulla, hay li ma iran wumawa, human ma gan kay bonota vatɗita ta juni jaran hiɗi sle ma gaa kay nagat kafna, hiɗi sum sa gaa kay nagat kafna kaw.

¹⁷ Lawna hot di Nuwa: Kelkedekŋ kayni mi va ma ɗek kay bonota ta nan juna' jaran hiɗi sum sa gaa kay nagat kafna.

¹⁸ Gurona vi Nuwa sa cukay goy hiɗi nam hay lumna pana yisi ala Sem, Kam hiɗi Yafet. Goora vi Kam yum ala Kanaan.

¹⁹ Sumun oyi kay nagat kel-kel' kayni may goy hay gurona vi Nuwa sa ɦidin lakŋi.

²⁰ Nuwa tun caw zum slen gaa kay nagata. Nam zum gulda-guldana.

²¹ Nam ci dolayna, dolayn vum li'e. Nam bur goy nala'a kalaf hay guɗukŋa valamu.

²² Kam bum Kanaan maawa, nam fi bulum goy nala waŋ', nam kaliya, di ɓosiyom sa ma' sa ay goy jiyna.

²³ Sem hiɗi Yafet yaw sligara, nisi watam kulo pelsiya, nisi dak bugolsiya, bar sligar kay busiya; kay irsi ay goy muɗiya, nisi co a wi nalata vi busiɗi.

²⁴ Hay li ma dolayn vatawa goy tam Nuwa, nam hum kay lawta ta goora valam ma goor la'ta.

²⁵ Nam di'e: Kanaan beɗi goyo, nam ma muɗ goy gorvona vi guro fukunayna vi ɓosiyomna.

²⁶ Nam hot di lo: Bolda ka kay Ma-Vatɗina, Lawna vi Sem, may Kanaan ma muɗ mi gorvona visiya.

²⁷ Lawna vul liyn ŋolo mi Yafet nam musum hay guɗukŋa vi Sem, Kanaan ma li mi gorvona visiya.

²⁸ Bugol niy ŋol ma dena, Nuwa li busat kis-ɦidi hiɗi diram dok-vasl lo.

²⁹ Busata vi Nuwa li noŋ pet kis-zleeŋe hiɗi diram dok-vasl, bugol kayni nam mita.