CAWA'TA TUNITA 16 - BIBALDA TA PELDETTA

Hagar. Vu'da vi Ismayel

¹ Saray cata vi Abram may vuɗum goorɗi, goota ta Egipteta ta suna'ta ka kepe, ya' Hagar.

² Saray di tam Abram: wulin kayn ɗuwaŋu, Ma-Vatɗin lan gediya. Nala nan siɗawaŋu kay naŋ ma kal kalaf kuɗ goota ta sunanta, kay nan ma fi goor hiɗi na' man klasige. Abram hum vun Saray cata valamu.

³ Saray vi goota ta Egipteta ta suna'ta, na' vula' kuɗ jufa' ca'a. Kayni hay li ma busata vi Abram liy doogo hay nagat Kanaan.

⁴ Nam bur tam Hagar, na' sli haya. Hay li ma na' wi ala, na' ka haya, na' tun caw ɗuw mula'ta birek-ceke.

⁵ Nala Saray di tam Abram: Panta na'ta kayni nekka va' kaŋu, cata van ta sunanta vulaŋgi ti nanu, hay li ma na' wi ala na' vaawa haya, na' tun caw ɗuwan birek-ceke kuma! Lawn ma ka kitata ta jaran hiɗi naŋga.

⁶ Abram hot dit mi Saray: Humagu, na'a ti goot ta sunakga, da' lawa' ti nakɗi su? nak as li ta'a va ma nak mina! Nala Saray tun caw curoɗa'a, Hagar pir goyo.

Vu'da vi Ismayel

⁷ Sunda-wuralawna vi Ma-Vatɗina fi Hagar goboy hiɗi liyn ma niyn riŋ goyna hay fulda, goboy hiɗi liyn ma niyn riŋŋa ma ka hay hagata vi Sur.

⁸ Sunda-wuralawna di ta'a: Hagar, naku ta sunda vi Saray, nak may arige? nak min tuɗ arige? na' di'e: nan piray goyo kay mulanta Saray.

⁹ Sunda-wuralawna da'a, hotag vo tam mulakga, nak ma hot yag gaa kuɗa'a.

¹⁰ Sunda-wuralawna di ta'a: Nan ma biya jafna vag ŋol haca-haca', jafna vag ma li ŋolo ta-ta sa as ŋaɓamɗi.

¹¹ Sunda-wuralawna vi Ma-Vatɗina di ta'a: Humagu, nak ka hiɗi hayna, nak ma vuɗ goor ma jufu, nak ma tunum selem ala Ismayel, kay hay lasta vagu Ma-Vatɗin humag delagawa.

¹² Nam ma muɗ ŋray ca ki kuro ma piri goy fulla nala, nam ma sli ɓalam kulo kat sumun kaf, sumun kaf ma sli ɓisi kulo katam nam lay, hay musta valam ɗawni hiɗi guro-biyomna jarsi ma tapɗi.

¹³ Ma-Vatɗin ma kus yoboy hiɗi na'a hay liy namna na' tunum selem ala Ata-El-Roy, kay na' di'e: Bugol a nam wan kayni, nam may wi va tan jewɗi su?

¹⁴ Kay na'ta nisi yi kaat na'ta ala kaata vi Lahay-Roy, kaat na'ta ka jar Kades hiɗi Bared.

¹⁵ Hagar vuɗ goor ma juf mi Abram, goor namna ma na' vuɗumna nam tunum selem ala Ismayel.

¹⁶ Hay li ma Hagar vuɗ Ismayel kayni, busata vi Abram coy dok-glafandi yam karkiya.