AMOS 6 - BIBALDA TA PELDETTA

Joot kay sa farayna hiɗi sa ŋulona vi sa Israyel

¹ Joot kay sum sa lakay hay Siyon kiliŋ lakŋa, joot kay sum sa ŋayay kulo kay hiɗiyt Samariyana. Joot kisi nisi sa ŋulona, nisi sa vok sum segen hay nagat kafna, nisi sa jafna vi Israyel tun ŋalda visi kisina.

² Jikgi hay Kalne ɗuwgi tige, Fokgi ays tan pa tuɗgi hay Hamat ta ŋolda, jikgi ta-ta hay Gad goy gal vi sum sa Filistina, hoyok-ziy namna cani, faray ŋol suw nagata vigi ma' lakŋi su? Nagana visi cani beɗay ŋol suw figin su?

³ Nigi var ala buur ma joot co kigina hinawa goy gine'e, may mulda ta las sumuna nigi mara'awa tigi goboyo.

⁴ Va ma buura visiya koti hiɗi siy-slokŋa, nisi ka buri goy danani kay va ma buura visiya, nisi mutum mi guro fok ma jakayna, ma ɗoray ŋaa'a hay farana,

⁵ Nisi gi nul ma dobna kuɗ dilla, nisi var ala delsi ma li sawal ki David nala, hay li ma nam ka li nulla hiɗi dilla.

⁶ Nisi ci vinna hiɗi tasa ma beɗayna, setem tisi mi mul ma ŋaa suw kafna, tuwsi may wirsi kay ɓulakka vi jafna vi Yosef noŋɗi.

⁷ Kuɗ kayni, hay li ma yaw sumun goy gorvon ɗawni, nisi ka tuni vok tiwe-tiwe', sum nisin sa goslna firita visi ma vat goyo.

⁸ Bum-Sumuna Ma-Vatɗina yi va kalamu hiɗi selem namu, Bum-Sumuna, Ma-Vatɗina vi vok-ma-duura di'e: Sumuna vi Yakub suburta visi kiran bisi, mulda visi kiran ŋaaɗi kaw, hoyok-ziyna visiya hiɗi sle ma hayam kafna, nan min vulum goy mi sumuna.

⁹ La sum sara hinawa vutoŋ doogo hay ziy ma kepna, nisi ma mit goyo.

¹⁰ Hay li ma san sli sana valam ma mitinawa, kay tuɗ ŋalam goyo, hay li ma nam yawam zokomawa goy hay ziyna, nam ma di tam sa ma ka hini hay ziyn ala: Sa mara ka hini taŋ waŋ' lo su? San kayni ma hotom dit ala: Sa mayɗi. Hen ma hotom diti lo ala: Baŋ vunaŋu, nay ma yi sem Ma-Vatɗina hay vunay loɗi.

¹¹ Kay humgiya, Ma-Vatɗina col lawtawa, ziy ma ŋulona nam min ɦom gaa'a, ziy gurayna nam min gurum goy lutut'.

¹² Kulumna jaŋ kulo kay hiɗiyn lay su? Luwayna zum kulo kay hiɗiyn lay su? A nigi ma muɗ ɗigerta goy narsaki kay mige? Vuɗna vi ɗigerta nigi min muɗum goyo-goyo kayn kay mige?

¹³ Nigi li firiya hiɗi sle ma gasiyam mayɗina, nigi di'e: numa li faray ŋol kayn hiɗi donota vuma kay tuwma'a.

¹⁴ Kuɗ kayni nan min fok sum sara kulo katgiya, nigi jafna vi Israyella. Kayni mi dita vi Ma-Vatɗina Lawna vi vok-ma-duura, sum sara ma lasgiya, tun caway hay vun Hamat pa, ta-ta hay liyn ma niyn riŋ goy hay fulda.