AMOS 1 - BIBALDA TA PELDETTA

Law kat Damas, Gaza, Tirus, Edom, Amon, Mowab, Yuda hiɗi Israyel

¹ Kayni ti dita vi Amos, san kep jar sum sa ŋom farayna hay Tekowa, van vul tuwam kiramu kay nam ma law sa Israyella, kayni hay buur ma Oziyas ka ti mulda hay Yuda, buur ma Yerobowam goora vi Yowas ka ti mulda hay Israyel, busat ma' jew wiira vi nagata.

² Nam di'e: Ma-Vatɗina, ka ci gumu hay Siyon pa, goy hay Yerusalem pa nam ka di delemu; liyn ma farayn ti hayamna soy goyo, yam hiɗiyt Karmel kaw soy goyo.

³ Ki kayn nala Ma-Vatɗina di'e: Kuɗ jiw-zlata ɦidita vi sum sa Damasna, kuɗ jiw-zlata visi ta fiɗita kaw, nan min hot bugolan tam ɦiyda vanɗi, kay nisi sab sum sa Galaadna gaa kuɗsiya, hiɗi silik ma tuwam jarkayna.

⁴ Nan min gi kuta hay ziyna vi Hazayel, kut na'ta ma ŋal ziy ma mulda vi Ben-Hadad goyo.

⁵ Nan min kus gulmun ma tam Damasna goyo, sum sa hay Bikat-Aven nan min vatsi goyo, nam ma vi zugulda-mulda vi Bet-Eden hay ɓalamna kaw, sum sa Siriyana ma kal goy gorvo'o hay Kir, Din mi Ma-Vatɗina.

⁶ Ma-Vatɗina di'e: Kuɗ jiw-zlata ɦidita vi sum sa hay Gazana, kuɗ jiw-zlata visi ta fiɗit kaw, nan min hot bugolan tam ɦiyda vanɗi, kay nisi yaw sumun gorvo ŋolo, kay tuɗ vulsi mi sa Edomna.

⁷ Nan min gi kut kuɗ gulmunna vi Gaza, na' ma ŋal ziy ma mulda.

⁸ Nan min vat sum sa hay Asdod goyo, sa ma zugulda-mulda hay ɓalamu hay Askalon kaw. Nan min muɗ iran tam sum sa Ekronna, dir sum sa Filistina ma hinna ma vat goyo, Din mi Bum-Sumuna Ma-Vatɗina.

⁹ Ma-Vatɗina di ki kayn nala: Kuɗ jiw-zlata ta ɦidita vi sum sa Tirusna, kuɗ ta fiɗit kaw, nan min hot dita van goy bugola'ɗi, kay nisi yaw sumun ŋolo kay tuɗ vulsi mi sa Edomna, humsi may gisi kay bonota ta jar ɓosiyom-tuwsin noŋɗi.

¹⁰ Nan min gi kuta kat gulmunna vi Tirus, na' ma ŋal ziy ma mulda goyo.

¹¹ Ki kayn nala Ma-Vatɗina di'e: Kuɗ jiw-zlata ta ɦidita vi sum sa Edomna, kuɗ ta fiɗit noŋ kafe, nan min hot bugolan tam ɦiyda vanɗi, kay nisi digiɗ guro-biyosina hiɗi kew-gaferaŋa; kay kir-hawt may kirsiɗi, kay ɦiyda visi jet slen goy dok-doko, nisi ŋom ɦiyd hay diksi dok-doko.

¹² Nan min gi kut hay Teman, na' ma ŋal ziyna vi muliyana vi Bosra goyo.

¹³ Ki kayn nala Ma-Vatɗina di'e: Kuɗ jiw-zlata ta ɦidita vi gurona vi Amon, kuɗ ta fiɗit noŋo, nan min hot goy bugolan tam ɦiyda vanɗi, kay boyna vi Galaad sa ka hiɗi hayna nisi ɓetsi haysi goyo, kay hoyok-ziyna visi ma li goy ŋolo.

¹⁴ Nan min tun kut kuɗ gulmunna vi Rabba, na' ma ŋal hoyok-ziy ma mulda visiya, Luluna ma ci'e hay buura vi duura. Billa ma li ŋolo hay buura vi simeɗ ma biwna.

¹⁵ Mulla visi ma kal goy gorvo'o, namu hiɗi muliyan sa kuɗumna kaf, din mi Ma-Vatɗina.