ABDIYAS 1 - BIBALDA TA PELDETTA

Abdiyas di kay slen ma min li kay Edom

¹ Abdiyas di kay slen ma min li'e: Kayni mi va ma Bum-Sumuna Lawna di'e tam nagata Edom: Numa hum labara ma may goy vi Ma-Vatɗina pa, sa ma sunda nam gumi jar sumuna; nam di'e: Fokgi kulo'o, yaway kulo'o! Tuɗay mokay nagata Edom kay dura'a!

² Ɗuwgiya nan min muɗgi guroyo jar jaf-sumuna, nigi ma muɗ ɗawn kir sumun bisi.

³ Subur-tuwta vi dikgi viygiyawa goyo, nigi ma li ziy jar holokŋa vi hiɗiyna, sa lakay kulo kay yam-hiɗiyna, sa di jar-tuwgi ala zutma gaa ɗawn gigena.

⁴ La nigi tun ziyna vigi kulo gine'e suw tokosayna vi bakŋa kaw, la tunum migi kulo jar mislekŋa kaw, nan ma zutgi gaa'a. Din mi Ma-Vatɗina.

⁵ La sum sa kuliyana hiɗi sum sa vurum slen co kigi henjet kaw, nisi ma fi slen ɓulakay goy kafe, nala nisi as yaw slen ki nisi min nala lo su? La sum sa ja gulda-guldana co hay sinena vigi kaw, nisi ma fum ɗawn mi ɦele ɦawa'a ɗisu?

⁶ Haha! Esaw sumun vurumumawa, farayna valam diram patawa goyo.

⁷ Sum sa dirsi kuɗgin kaf, digiɗgiyawa goy bugol vun-nagata, boniyogina liwawa hiɗi nigiya, ti muldawa kigi yo. Sa ti funa vigin gan jawtawa vokgiya. May nigi may gar kay wi yal noŋ ne'ɗi.

⁸ Ma-Vatɗina ka di'e: Hay buur namna ɗawni, sum sa yalla hay Edom kaf nan ma vatsi goyo, sum sa wida kulo kay hiɗiyta vi Esaw kaw ma vat goy lay.

⁹ Hoyok-ziyn Teman, sum sa wi duura sa hayaŋŋa tuwsi ma muɗ visi bat-bat', sum sa kulo kay hiɗiyna vi Esaw kaf ma cim goyo.

¹⁰ Kuɗ joo ma nigi lum tam guro-biyogina sa gurona vi Yakub, zulot ma vigiya kuɗ kayni. Nigi ma hosis goyo kay dok-doko.

¹¹ Buur hena ma nigi cigeɗsi goy hay hagata, buur hena ma sa gawt kisina tuɗ sojena visi goy gorvo'o, buur hena ma sa gawta cuk kalaf hay vun-galana visiya, buur ma sumun ɓuraw Yerusalem jarsina, nigi kaw ay jar sum nisina.

¹² Nigi ma cuk irgi kay buura vi guro-biyoginɗi, buur ma nisi ay vun lasta, Nigi ma li firi kuɗ gurona vi Yudaɗi, buura ma ɓulakka visiya, buur ma nisi kal vun zlat kayni, nigi asay a cen kuɗsiɗi.

¹³ Buur ma sumun ɦo hoyok-ziyna visi gaan kayni, nigi asay a cuk kulo hayamɗi. Buur ma zumalda co kay guro-biyogin kayni, nisi asay a sar lasta visiɗi. Buur ma nagata visi to gaan kayni, nigi kaw asay a vurum farayna visiɗi.

¹⁴ Nigi kaw asay a lak goy jar hagana kay vatsi dirsi ma pir goynɗi, lebo sa ŋayay goyna kaw nigi asay a yawsiya, kay vulsi goy hay ɓam sa gawtnɗi.

¹⁵ Wulin kayni buura vi Ma-Vatɗina coowa goboyo kay nagat kuɗulu; va ma li tigi ki nigi li nala kaw, sle ma nigi lumna ma hot nig kigiya.

¹⁶ Awa, ki nigi ci hay tasata kulo kay hiɗiyta van ta peldetta nala, jaf-sumun kaf ma ci tasa na'ta dok-doko. Nisi ma ci'e, nisi ma ligim gaa'a, nala nisi ma ɦas goyo.

¹⁷ May su'da ma mus kay hiɗiyta Siyon, na' ma li peldete. Jafna vi Yakub kaw ma hot lak hay nagata visiya.

¹⁸ Ziyna vi Yakub ma li ɗawn ki kut nala, ziyna vi Yosef ki sin-kuta ta ŋalta nala may. May ziyna vi Esaw ma li ɗawn mi hoso'o, nisi ma do kut kuɗumu kay ŋalam goyo; va mara ma hin kuɗ ziyna vi Esaw mayɗi; kay Ma-Vatɗina di nala.

¹⁹ Sa hay gal ma kayamna ma sli hiɗiyta vi Esaw, sa hay liyn ma beɗna vi nagata ma sli nagata vi sa Filistina, nisi ma sli nagata vi Efrayim hiɗi nagat Samariya. Jafna vi Benyamin ma sli nagat Galaad.

²⁰ Sojena vi gurona vi Israyella sa ay yaway goy gorvona ma hot sli nagata ta sum sa Kanaaniyana ka lakay haya, ta-ta hay Sarepta, sa gorvona vi Yerusalem sa ka hay Sefarad ma hot sli hoyok-ziyna ma gal kayamna.

²¹ Sum sa but sumun goyna ma jik kulo kay hiɗiyta vi Siyon, kay ka kitata kay sum sa lakay kulo kay hiɗiyta vi Esaw. Mulda ma hin dok-dok vi Ma-Vatɗina.