2 YOHANA 1 - BIBALDA TA PELDETTA

Ɗek-goyta hiɗi gi-deɓta

¹ Sa ma maara ɗo tam Kiriya ta vilekay-goyta hiɗi gurona va'a, sa nan minsiya hay gasita. May mi nan kepɗi, may tam nisi kaf sa wi gasitawa kaw.

² Kuɗ gasita ta ka musi hayaya, ta min mus hiɗi naya ta-ta hay vatɗita:

³ Slugota, lamanda, hiɗi toyta ma lak hiɗi nigiya, kay kayni may vi Bumna hiɗi Yesu Kristu, Goora vi Bumna hay gasita hiɗi minda.

Minda jar ɓosiyom tuwsina

⁴ Nan ka firi ŋolo kay nan fi gurona vag sara'a ka poy hay gasita, kuɗ vun-ma-gatna ma numa'a fumay vi Bumna pa.

⁵ Wulin kayni, Kiriya, va ma nan ɗo tag tan kayni may mi vun-ma-gat ma wuliɗi, mi vun-ma-gatna ma nay fum hay cawa'ta tuniti pa, ala nay ma li hiɗi minda jar-tuwaya tuwaya.

⁶ Ŋaata vi minda kayn ala nay ma poy hay vun-ma-gatna valamu. Kayni mi vun-ma-gatna ma nigi as poy hayamna, ki nigi hatawa hay tun cawta pa nala.

Sa hat hatta ta bay-gasita

⁷ Wulini sum sa ɗut sumun goyna ŋolo dusiyawa goy kay nagata, nisi may vi ala Yesu ma hay nagata hay sliw-tuw sanaɗi. Nisi kayni si sa ɗut sumuna hiɗi anti-kristuwayna.

⁸ Ŋomgi tuwgi ŋaa'a kay vuɗna vi lopna vuma'a ma ba goyɗi, may kay nigi ma fi wurakŋa hay liyam kafe.

⁹ Sa ma cal hagata goyo, mus hay hatta vi Kristuɗi, Lawna may hayamɗi; sa ma mus hay hatta, Bumna hiɗi Goora ka hayamu.

¹⁰ La sa co katgiya, may nam mar hatta kayn kalamɗi, nigi ma vum vo hay ziyna vigiɗi; nigi ma gum deɓɗi kaw,

¹¹ kay sa ma gum deɓna ka tap hiɗi namu hay lopna valamu ma joona.

¹² Slen ŋolo ka kanu kay ɗo tigiya, may nan min ɗom hay ɗerweldaɗi, ɗom hiɗi aŋkrenɗi kaw may nam min coys goy vigiya, lawgi hiɗi vunan noŋo, kay firita vaya fi hob kulo'o.

¹³ Gurona vi ɓasukga ta vilekay-goyta ka gag deɓisa.