2 TIMOTEWUS 4 - BIBALDA TA PELDETTA

¹ Nan daŋ gasita vok ir Lawna, vok ir Kristu Yesu kaw, nam ma ka kitata kay sa irina hiɗi sa mitina, hay semda vi mata valamu hiɗi mulda valamu,

² kusaŋ yoboyna, lawaŋ ɗeŋe hay liyn kaf, hay li ma ŋaana lebo marige kaw, muɗaŋ varta vi sumuna, disi kirsiya gatsiya, hatsi hiɗi ŋalda kaw.

³ Kay liyn ma sumun ziy hatta ta bay-gesta loɗin ma ma'a; may kuɗ darta visiya, hiɗi humsi ma mutsi siy kay hum slena, nisi ma jok kuɗ sa hatta sara'a sara'a;

⁴ nisi ma muɗ humsi goy tam gasita, ma muɗ humum mi kasla ma jew ɓa-ɓana.

⁵ May naŋu, laŋ ŋali hay slen kaf, ziyaŋ lasta, laŋ lopna vi evanzelistena, hobaŋ vun lopna vaŋ hay liyam ŋaa'a.

Paulus ka var kay mitta valamu, nam yi Timotewus aya

⁶ May nanu, wulini tuwan vuli goy ɗifin vatiya, liyna vi kalta vanu coowa goboyo.

⁷ Nan dur duur ma ŋaanawa, nan vat jaŋŋawa, nan ŋom vidawa.

⁸ Bogorayna vi ɗigerta ka ŋomay kulo'o kay cubanu, Bum-Sumuna ma ka kitat ɗigere ma vulan bogoray namna hay buur namna ɗawni, may man nan kepɗi, may mi nisi sa ka cub mata valam kafe.

⁹ Garaŋ hagata kay ma tan gosoyo,

¹⁰ kay Demas hinanawa, kay dikam minim mi sle ma hay nagat tanna, nam kalay hay Tesalonika, Kreskens kalay hay Galatiya, Titus kalay hay Dalmatiya.

¹¹ Hini hiɗi nan mi Lukas kepe. Naŋ ma vi Markus maram kuɗaŋu, kay nam ŋaa'a kanu kay sunanu.

¹² May Tikikus nan gum sunu hay Efesus.

¹³ Hay li ma naŋ payawa, sligar-tuwna ma nan hinim ay hay Trowas vo vi Karpus, naŋ ma yawamiya, hiɗi ɗerwella kaw, suw pet ɗerwel ma ɗigiyna.

Vatta

¹⁴ Aleksander ma zli cafna lan joo'o ŋolo. Bum-Sumuna ma wurakam kuɗ lopna valamu.

¹⁵ Naŋ ma li ŋal hiɗi namu kaw, kay nam ci way ŋolo hiɗi yoboyna vaya.

¹⁶ Hay li ma nan vi sem lawta van goyo hay sem ma jewna, sa may gut kuɗanɗi, may nisi kaf hinan goyo. Lawt kayni ma ŋaɓ kisiɗige!

¹⁷ May Bum-Sumuna mi ma gut kuɗanu, nam vulan donota, kay nan ma nar kusta vi labara ma firina goy tam sumun kaf hay asta valamu, a sum sa waana ma humum kafe kaw. Bum-Sumuna butan goyo hay vun zlona kaw.

¹⁸ Bum-Sumuna ma butan goyo hay lop ma joon kaf, ma suɗan goyo kaw, kay naran kulo hay mulda valamu hay wuralawna. Tam namu gajijita hay vatɗita vatɗita Amen.

¹⁹ Naŋ ma gi deɓ mi Priskila hiɗi Akuilas, hiɗi jafna vi Onesiforus.

²⁰ Erastus ay hini hay Korinte, Trofimus nan hinim ay moyo hay Miletus.

²¹ Naŋ ma gar hagata a co tani jew cayda. Eubulus hiɗi Pudens hiɗi Linus hiɗi Klawdiya hiɗi ɓosiyayn kaf gaŋ deɓe.

²² Bum-Sumuna mus hiɗi ŋusta vaŋ musge. Slugota mus hiɗi nigi musge.