Biblia Todo Logo
Bìoball air-loidhne

- Sanasan -

2 TIMOTEWUS 3 - BIBALDA TA PELDETTA

1 May naŋ ma wi ala, hay buur ma cawn ɗawni, liyn ma joona ma ma'a.

2 Hay na'ta ɗawni sumun ma muɗ jowo, min gurju'u, jigal tuwsiya, ŋula, ŋel vun sumaysiya, gi deɓ mi saɗi, bay-peldete,

3 murliya, kirkiliya, sa yaw diira, tel tuwsiɗi, muɗi muuru, ka gawt tam ŋaata,

4 di newta, tap waa'a, irsi duki kay subur-tuwta, min darta vi tuwna ŋolo suw Lawna.

5 Sa li ki nisi vi kuɗ Lawn nala, may puw vunsi kay donota valamu, sum sa ki kayni nala naŋ ma muɗ bugolaŋ tisiya.

6 Segen jarsiya cuk kalaf hay ziyna, nisi ɗut boyn sa hobay hiɗi sulukŋa, sa ka hiwir kuɗ darta vi sliwna tara'a tara'a,

7 hat dok-doko, may co tam wida vi gasita noŋɗi.

8 Ki Yanes hiɗi Yambres yaw kulo'o kat Musus nala, sum nisina yaw kulo'o kat gasita nala kaw, nisi kayni si sum sa varta visi ɓulakiya, vida visiya may ziy wakkaɗi.

9 May nisi as wul voksi loɗi, kay ɦoyta visiya ma vul tuwa' goy kir sumun kafe, ki sum sa ma'an lakŋi nala.


Gatta tam Timotewus
2 Kor 3:6-10 ; 2 Pet 1:19-21

10 May naŋu, naŋ hum hatta vanawa hiɗi poyta vanu, sle ma nan col kalamna, vida vanu, zigin-zlata vanu, minda vanu, so-tuwta vanu,

11 zumalda vanu, lasta vanu kaw. Lasta ta nan ca' hay Antiokiyaɗi ti tarige? Hay Ikoniyum hiɗi Listra kaw? Zumalda ta nan ziya'ɗi ti tarige? May Bum-Sumuna butan goy vunam kafe.

12 Nisi kaf sa min lak hay vida kuɗ Kristu Yesu nisi ma fi zumalda.

13 May sum sa joona hiɗi sa ɗut sumuna ma tuɗ voksi dok-dok hay joota, hay li ma nisi ɗut sumuna, ɗut tuwsi nisi kaw.

14 May naŋu, musaŋ hay sle ma naŋ hatamna, ma naŋ wum goy gasina kaw, kay naŋ wi nam ma naŋ hat kuɗumna.

15 Kay hay goorta vaŋ pa, naŋ wi ɗota peldetta, kay na' as vulaŋ yalda kay naraŋ tam su'da kuɗ vida vaŋu hay Kristu Yesu.

16 Ɗota kaf Lawna gi suk ka'a, na'a ŋaa'a kay hata, kay muɗ varta, kay ɗiger sana, kay hat san hay gasita,

17 kay sana vi Lawna ma li nagay nag', asay kay lop ma ŋaana pet kaw.

BIBALDA TA PELDETTA © L'Alliance Biblique du Cameroun, 2001

Bible Society of Cameroon
Lean sinn:



Sanasan