2 SAMUEL 7 - BIBALDA TA PELDETTA

David min in Tempella, may Lawn minɗi

¹ Hay li ma mulla musawa gaa hay ziyna valamu, hay li ma Ma-Vatɗin vulum tun-sukka, bugol nam butum goy hay ɓam sa gawta sa ŋuyi talamna butna,

² nam di tam Natan ma jobta: Humaŋ tige, wulini nan musi kayni hay ziy ma koti hiɗi gamna, timgilla vi Lawn kaw tuni kayni hay guɗuku.

³ Natan hot dit tam mulla: Tuɗaŋu, laŋ va ma kuɗ hayaŋ kafna, kay Ma-Vatɗin ka hiɗi naŋu.

⁴ Hay buurta ka'ta, Ma-Vatɗina di yoboyn tam Natan ala:

⁵ Tuɗaŋu, daŋ tam sa ma sunda vanu David ala: Humaŋ va ma Lawn di'e: Inan ziyna kay nan mus hayam kayn mi naŋ su?

⁶ May hay li ma nan yaw sum sa Israyel ay goy hay Egipte pa ta-ta vaydi, nan bay mus hay ziy tuwa, nan poy hiɗi nisi kayn hay guɗukŋa, hay tabernaklena kaw.

⁷ Hay liyn kaf ma nan poy hiɗi gurona vi Israyel kayni, sum sa nan vulsi hagata kay ŋom sa Israyel kayni, buur mara kep nan disi ala nigi min inan ziy ma koti hiɗi gamnaɗi kay mige nan disi nala su?

⁸ Wulin kayni naŋ ma di tam sa ma sunda vanu David: Humaŋ va ma Ma-Vatɗina vi vok-ma-duura di'e: Nan vaŋay kayni goy bugol fok-dimin ŋom kila', kay naŋ ma li mi ma ŋolla vok sumuna vanu sa Israyella;

⁹ hay liyn kaf ma naŋ poy hayamna nan ay hiɗi naŋu, sum sa gaw kaŋŋa nan vatsi goy vokaŋ kafe, nan muɗaŋ seŋ tiya ki sum sa ŋulona gaa kay nagata nala;

¹⁰ nan vul ziyna mi sumuna vanu sa Israyella, nan pisi dirsi gaa kayni kay nisi ma pi gaa ɗeŋe, ge'ɗi, kay sum sa joona ma curoɗsi ki jew nala loɗi,

¹¹ ki hay liyn ma nan tun sum sa ka kitata kay sumuna van Israyel nala, nan vulaŋ tun-sukka hay li ma nan butaŋ goy hay ɓam sum sa gaw kaŋŋa kafe. Ma-Vatɗina di taŋ ala nam min cukaŋ ziya.

¹² Hay li ma buura vaŋ vatawa, naŋ tapawa kuɗ sumiyaŋu, naŋ ma fok sa mara kulo bugolaŋ hay jafna vaŋu, ma li mi sa ma vuɗum mi naŋ kay tuwaŋ noŋo, nan ma muɗ mulda valam dono'o.

¹³ Ma in ziyna hay semda van ɗawn mi namu, nan ma muɗ mulda valam dono'o kay dok-doko.

¹⁴ Nan ma li ɗawni mi bulumu, nam ma lin mi goora van may, la nam li va ma joo'o, nan ma watam ɗawni ki sumayna ka wat gurona visi hiɗi libetna nala.

¹⁵ Nan ma yaw slugota van goy kalamu ki nan yaw slugota van goy kay Sawul naɗi, ki nan gum goyo vurnaŋ baŋalan naɗi kaw.

¹⁶ Ziyna vaŋu hiɗi mulda vaŋu ma li ka dok-dok, zlamda-mulda vaŋu ma muɗ dono dok-doko.

¹⁷ Yoboy ma Natan humumna hiɗi sle ma nam wumna kaf nam maram mi David.

¹⁸ Nala mulla kalay vok ir Ma-Vatɗina, nam di'e: Nanu mi gige, Bum-Sumuna Ma-Vatɗina, ziyna vanu asay mige a naŋ muɗanu ki nan ka vaydi nala?

¹⁹ Bum-Sumuna Ma-Vatɗina, ziyna van kiraŋ kaw mi va ma goor ɦawa'a a naŋ di kalamu kay liyn ma vokŋa, naŋ miniya kay ɗek san kay slen namna cani Bum-Sumuna Ma-Vatɗina.

²⁰ David as daŋgi ŋol suw ɗawn mi mige? Naŋ kay tuwaŋ wi sa ma sunda vaŋu, Bum-Sumuna Ma-Vatɗina.

²¹ Kuɗ yoboyna vaŋu, kuɗ minda vaŋ kaw, slen namna ma ŋulon kaf lakŋi naŋ lumu kay ɗekem goy kir sa ma sunda vaŋu.

²² Naŋ ŋolo natige, Ma-Vatɗina Lawna, kay sa ma ŋray hiɗi naŋ mayɗi, lawayn mara'a ma ki naŋ nala mayɗi, ki numa hum slen kaf hiɗi humma nala.

²³ Gaa kay nagat kaf kayni, jaf mara kep ma ki jaf-sumuna vaŋ Israyel nala, sa naŋ co'o kay gussiya kay nisi muɗ goy jafna vaŋu, kay tiysi sesiya, kay li ɗekka hiɗi gul-yalda tisiya, tam nagata visi kaw, hay li ma naŋ digiɗ sa gawt goyo vok sumuna vaŋu, sa naŋ gussi goy hay Egipte pana, sum sara sa ki kayn nala ka su?

²⁴ Naŋ vul donot mi sumuna vaŋ sa Israyella, kay nisi ma lak dok-dok si sumuna vaŋu; naŋ Ma-Vatɗin Lawna, naŋ muɗi mi Lawna visiya.

²⁵ Wulin kayni, Ma-Vatɗin Lawna, yoboy ma naŋ dum kay sa ma sunda vaŋu hiɗi ziyna valamna naŋ ma hinim mus ta-ta dok-doko, naŋ ma li kuɗ va ma naŋ dumna lige.

²⁶ Hin semda vaŋu fi gajijit dok-doko, a sumun ma di ala Lawna vi vok-ma-duura mi Lawna vi Israyel, a ziyna vi sa ma sunda vaŋu David ma fi donot vok iraŋu.

²⁷ Kay naŋ kay tuwaŋu, Lawna vi vok-ma-duura, Lawna vi Israyel, naŋ ɗek tuwaŋ goyo kir sa ma sunda vaŋu, kay naŋ di ala: Nan min cukaŋ ziya. Kuɗ na'ta sa ma sunda vaŋu va' talamu kay siɗawaŋu.

²⁸ Wulin kayni, Bum-Sumuna Ma-Vatɗina, naŋ mi Lawna, yoboyna vaŋu mi gasita kaw, slugota na'ta naŋ da'awa goy voko tam sa ma sunda vaŋu.

²⁹ Wulin kayni gaŋ bolo kay ziyna vi sa ma sunda vaŋu, kay nam ma mus ta-ta vok iraŋu, kay di kayni mi naŋu, Bum-Sumuna Ma-Vatɗina, kuɗ bolda vaŋu, ziyna vi sa ma sunda vaŋu ma fi bolda ta-ta hay vatɗita.