2 SAMUEL 5 - BIBALDA TA PELDETTA

David mulla vi Yuda hiɗi Israyel kafe. Nisi sli Yebus ta ya' Yerusalemta

¹ Jaf-sum sa Israyel kaf co kat David, hay Hebron, nisi di'e Humaŋu, numa kayn si sliwaŋu.

² Hay ɓa-ɓat kayni hay li ma Sawul ay ti mul kuman kayni, tuɗ sum sa Israyel goyo, hotsiyaya kayn mi naŋu. Ma-Vatɗin daŋ ala: Sumuna valam sa Israyella ŋomsi ɗawn mi David, nam ma li mi ma ŋolla vi sa Israyella.

³ Ki kayn nala sum sa maariyana vi Israyel kaf co kat mulla hay Hebron, mulla David jun bonot hiɗi nisiya hay Hebron, vok ir Ma-Vatɗina. Nisi tun David mulu kay sa Israyella.

⁴ Hay li ma David tun mul kayni, busata valam asay dok-ɦidi. Nam ti mulda ir busat dok-fiɗi.

⁵ Hay Hebron, nam ti mulda kay jafna vi Yuda ir busat siɗiya hiɗi til karkiya, hay Yerusalem nam ti mulda ir busat dok-ɦidi yam ɦidi kay sa Israyel hiɗi Yuda kafe.

David digiɗ sa Yebusna goyo, nam mus hay Yerusalem

⁶ Mulla hiɗi sumuna valamu kalay mok sum sa Yebusna hay Yerusalem, sa Yebusna kayni si gurona vi nagata. Nisi di tam David: Naŋ as jikay kulo tan noŋɗi, kay sum sa dukina hiɗi sa dirlayn kaw ma digiɗaŋu. Kayn min di ala David as jik kulo tan noŋɗi.

⁷ May David sli ziy ma gulmun talamna ma yum Siyon, kayni mi hoyok-ziyna vi David.

⁸ David di hay buur namna ala: La sa jikawa hay zulla, nam cal sum sa Yebusnawa, la sa cal sum sa dukina hiɗi sa dirlayn lakŋawa, nisi sa gaw kay Davidna lakŋi. Kuɗ na'ta kayni nisi ka di ala sa dirlayna hiɗi sa dukina may cuk vo hay ziyn noŋɗi.

⁹ David mus hay ziy ma gulmun talamna, nam tunum selem ala: hoyok-ziyna vi David. Nam in ziyn goy galam kafe, goy bugolo hiɗi kalaf dik Millo kaw.

¹⁰ David ka muɗ vokom ŋolo ŋolo suwa, Ma-Vatɗina Lawna vi vok-ma-duura ay hiɗi namu kaw.

Lawna muɗ mulda vi David dono voka'a

¹¹ Hiram mul ma Tirusna cuk sumun kat David, hiɗi gu-gamna, hiɗi sum sa har guna, hiɗi sa ceɗ hiɗiyna, nisi kot ziy mi David kepe.

¹² David wi ala Ma-Vatɗin ka muɗum ŋolo kay nam ti mul kay sa Israyella, Ma-Vatɗin ka ɦur mulda valam kulo'o kuɗ sumuna valam sa Israyella.

¹³ David yaw boyn sa gorvona, yaw boyna kaw hay Yerusalem, kayni bugol mata valamay goy hay Hebron pa, nam vuɗ guro-jufayna hiɗi guro-boyna kaw.

¹⁴ Kayni semda vi gurona valamu sa vuɗ hay Yerusalemna: Samuwa, Sobab, Natan, Salomon,

¹⁵ Yibhar, Elisuwa, Nefeg, Yafiya,

¹⁶ Elisama, Eliyada, hiɗi Elifelet.

¹⁷ Sum sa Filistin hum ala David tuni mulu kay sa Israyella, nisi kaf kalay kulo'o kay garamu. Hay li ma David hum labar kayni, nam kal kulo hay gulmunna.

¹⁸ Sum sa Filistin co'o, nisi mer goyo hay liyn ma beɗna vi Refayim.

¹⁹ David job Ma-Vatɗina di'e: Nan ma tuɗ dur sa Filistin su? Naŋ ma vulsi hay ɓan su? Ma-Vatɗina di tam David: Tuɗaŋ dursiya, kay nan vulsi hay ɓaŋu.

²⁰ David co'o hay Baal-Peratsim, nam cisiya. Bugolda nam di'e: Ma-Vatɗin digiɗ sa gaw kannawa goy vokanu, ki niy ma liyah goyn nala. Kuɗ na'ta kayni liy namna nisi tunum selem ala Baal-Peratsim.

²¹ Sum nisin hin lawayna visi gaa hay liy namna, David hiɗi sumuna valam kalay hiɗi namu may.

²² Sum sa Filistin yaway kulo mara lo, nisi mer goyo hay liy ma beɗna vi Refayim.

²³ David job Ma-Vatɗina. Ma-Vatɗin di'e: Naŋ as tuɗ dursiɗi, naŋ ma hinsi gal ŋoroŋu, naŋ ma co kisi ɗawni ɗiger vok gu-ganaŋŋa.

²⁴ La naŋ hum suwana hay hum gu-ganaŋŋa ki san ka tuɗ nala, laŋ tuwaŋ koloyo, kayn di ala tuɗ vokaŋ kilan mi Ma-Vatɗina, kay nam min kol kay sojena vi sa Filistina.

²⁵ David li va ma Ma-Vatɗin dumtina, nam ci sum sa Filistina, tun cawis hay Geba pa ta-ta hay Geser.