2 SAMUEL 3 - BIBALDA TA PELDETTA

¹ Duur mus noŋ ta-ta jar jafna vi Sawul hiɗi jafna vi David. David ka muɗ dono vokomu vokomu suwa, may jafna vi Sawul ka muɗ maŋay suwa.

² David vuɗ guro segena hay Hebron. Goor ma vuɗ jewna yum Amnon, vuɗum ti Ahinowam ta Yisreelta;

³ ma ma'na yum Kiliyab, vuɗum ti Abigayil ta Karmelta, ti cata vi Nabal; ma ɦidina yum Absalom, goora vi Maaka, goota vi Talmay, mulla vi Gesur;

⁴ ma fiɗina mi Adoniya, vuɗum ti Haggit; ma vaslna mi Skefatiya, vuɗum ti Abital;

⁵ ma karkiyana mi Yitreyam, vuɗum ti Egla, cata vi David. Nisi kayni si sa David vuɗsi hay Hebronna.

Yowab ci Abner, Is-Boset fi cita-goyta kaw

⁶ Hay li ma duur ka li jar jafna vi David hiɗi jafna vi Sawul kayni, Abner col dono'o kay jafna vi Sawul.

⁷ Hay li ma Sawul ays irina, nam sli cat ta gorvota kepe ya' Rispa, na' ti goota vi Ayya. Is-Boset di tam Abner: Naŋ kal kuɗ cata ta gorvota vi bunu kay mige?

⁸ Abner dikam ɓulak ŋolo kay dita vi Is-Boset, nam hot dita: Nan mi yam diya kay gi diran kuɗ Yuda su? Vaydi kayni nan ka li ŋaata tam jafna vi Sawul buŋu, tam guro-biyomna hiɗi boniyomna, nan min vulaŋ goy hay ɓam Davidɗi, may vaydi naŋ lawan ɦiya kay kal ma nan kal kuɗ cata vi buŋŋa kay mige?

⁹ Lawn ma lan joo'o hiɗi dikam kafe, la nan li tam David ki Ma-Vatɗin yi va kalamu kay David naɗi;

¹⁰ kay nam di ala nam ma jok mulda vi jafna vi Sawul mi David, ala nam min tun zlamda vi David kay Israyel hiɗi Yuda kafe, tun cawis hay Dan pa ta-ta hay Ber-Seba.

¹¹ Is-Boset min hot di va mi Abner kep noŋɗi, kay nam li nar kalamu.

¹² Abner cuk sumun tam David kay dum ala: Nagata na' vi gige? Vaŋ bono hiɗi nanu, nala nan ma gutaŋu kay muɗ mulda vi Israyel kaf goy maŋ naŋu.

¹³ Nam hot dita: ŋaa'a, nan min li bonot hiɗi naŋu, may va ma nan min joboŋ ka kepe, la naŋ min co vok iranu, naŋ ma maran Mikal goota vi Sawul tuwa.

¹⁴ David cuk sumun tam Is-Boset goora vi Sawul, kay dum ala: Naŋ ma vulan cata van Mikal, ta nan ɗuma' hiɗi vun yuw sum sa Filistin kista.

¹⁵ Is-Boset kal va'ay hay ziyna vi jufa' Paltiyel goora vi Layis.

¹⁶ Jufa' tap kuɗa' hiɗi tiyna ta-ta hay Basurim, bugol kayni Abner di talamu. Tuɗaŋu, hotaŋu! Nala nam hotiya.

¹⁷ Abner tok sum sa maariyana vi Israyel, nam di tisiya: Jew ɓa-ɓa kaw nigi ka gar kay David ma li mi mulla vigiya ɗisu?

¹⁸ Wulin kayn tungit mul yo, kay Ma-Vatɗin di kalam ala: Nan ma but sumuna van sa Israyella goy hay ɓam sa Filistina hiɗi sa gaw kisin kaf ɗawni hiɗi ɓam David.

¹⁹ Abner di sle namna tam sa fi Benyamin kaw, nam kalay tam David hay Hebron kay dum sle ma sum sa Israyel dum kafna, hiɗi jafna vi Benyamin kaf kaw.

²⁰ Nam co kat David hay Hebron, sumun tapay kuɗum dok-ma', David li yuldeta kay Abner hiɗi sum sa kuɗumna kafe.

²¹ Abner di tam David: Nan min fok kulo'o, nan min tok sa Israyella kaf kat Mulla vanu; nisi ma jun bonot hiɗi naŋu, naŋ ma ti mul kisi kafe ki naŋ min nala. David tun ir Abner, nam kalay hay sle'ta.

²² Ɗuw na kayni, Yowab hiɗi sumuna vi David may goy ti ɓuraŋ pa, nisi mar sle ma ɓuraŋ kisi ŋolo. Abner may kat David hay Hebron loɗi, kay David gum iram gi, nam kalay malam hiɗi sle'ta.

²³ Bugol kayni Yowab hiɗi vok ma kuɗumna kaf cooya, nisi ka vul labara mi Yowab ala: Abner goora vi Ner co tani kat mulla, mulla tunum hay hagata, nam kalay malam hiɗi sle'ta.

²⁴ Yowab kalay kat mulla, nam di'e: Mulla, naŋ lum na kayni mi mige? Wulin kayn Abner co kataŋu; may naŋ gum iramu, hinim kala kay mige?

²⁵ Naŋ wi Abner goora vi Ner! Nam co kayni kay ɗutaŋu. Kay ɗuw gul liyn ma musta vaŋu, kay wi sle ma naŋ lum kafna.

²⁶ Hay li ma Yowab hin David hinna, nam cuk sumun kuɗ Abner, sum nisin hotomay hay zul hiɗiyna vi Sira pa: David may hum noŋ ne'ɗi.

²⁷ Hay li ma Abner hoti hay Hebron, Yowab yum goy ŋayaya hay vun-ziyna, ki nam min dum va goy ŋayaya nala, nam jikim hayam kip', cap cum goy mati, kay job yam ɓasulumna Asayel.

²⁸ Bugolda David hum labar namna, nala nam di'e: Vok Ma-Vatɗina, Abner goora vi Ner busuwam may kanɗi, mulda van kaw hayɗi lay.

²⁹ Busuw namna ma nig kay Yowab hiɗi jafna vi bulum kafe nig ge, a hay jafna vi Yowab dok-dok kayni, sa mara ma li kep hiɗi busuwn jaŋ goy kuɗumu lebo, moy-kuturu talamu lebo, ma tubal hiɗi zugulu lebo, kew-gaferaŋ ma cum goyo lebo fi va ma tiɗige.

³⁰ Ki kayn nala Yowab hiɗi ɓasulumna Abiskay ci Abner goyo, kay Abner ci ɓasusin Asayel hay Gabawon, vun duura.

³¹ David di tam Yowab hiɗi sum sa ay kuɗumna kaf ala: Jetgi sligara vigi goyo, tungit haygi mi sligar-bolla, tiygi kay Abner. Mulla David ka tuɗ bugol tuwna may.

³² Nisi pi Abner hay Hebron. Mulla pat delem kulo'o, tiy kulo kay yam-usta vi Abner, sumun kaf mun tiyna.

³³ Hay tiyta valamu mulla ka di ala: Abner as mit ki sa ma jiw-zlat na ɗawn mittige?

³⁴ Baŋ may juniɗi lay, jaɓ may cuki seŋɗi lay, naŋ puki gaa'a ki san puk gaa vok sum sa joon nala.

³⁵ Ki kayn nala sumun kaf tiy mara lo kay Abner. Sumun kaf co tam David kay vulum va ma ti neɗe, hay li ma fatta ka tuwa; may David yi va kalamu, nam di'e: La nan tun fu vunanu lebo tum mi mige kaw jew ɗikŋa vi fatta ni, Lawn ma ka kitat kan hiɗi dikam kafe.

³⁶ Lawt kayni sumun kaf wa'a, haysi li ŋaa'a, law ma mulla lumna cuk kuɗ haysiya.

³⁷ Hay buur namna sumun kaf hiɗi sa Israyella wi ala, David may vul hagat (tam Yowab) kay ci Abnerɗi.

³⁸ Mulla di tam sa sunda valamu: Vaydi kayni, sa ma vok sumuna, sa ma ŋolo mitawa hay Israyel nigi may wi naɗi su?

³⁹ Wulin kayn nan ka tuni mulu, may nan ka maŋay tuwa; sum nisin sa gurona vi Seruyan lakŋi nisi dono suwanu. Sa ma li joona Lawn ma hot wurakam joota valamu.