2 SAMUEL 23 - BIBALDA TA PELDETTA

Dita vi David ta cawta

¹ Kayni mi yoboyn ma cawna vi David, goora vi Isay, dita vi sa ma musi kulo vokŋa, ma mul hoki kalamna vi Lawna vi Yakub, dita vi sa ma gi nul ŋaa'a ŋolo hay Israyel.

² Ŋusta vi Ma-Vatɗina law hiɗi delanu, yoboyna valamu ka hay vunanu kaw.

³ Lawna vi Israyel daawa, hiɗiyna vi Israyel danawa, nam ma ti mulda jar sumun hiɗi ɗigerta, nam ma ti mulda hay narta vi Lawna,

⁴ Ŋray ca hiɗi fatta ta day hay graw culumta hiɗi haraŋa nala, hay dukalawna ma graw culumta ma ɗugul may hayɗina, hay li ma sutaya' cuk gaa'a bugol niy ma sina, us ma goɗayn day kulo kay nagata.

⁵ Jafna van kaw nisi vok Lawn ki kayn nala ɗisu? Kay nisi jun bonota vatɗit hiɗi nanu. Koti hiɗi gatta ta coli hay liya' dok-doko ta va as geɗa'ɗi, nam ma hin su'da vanu hiɗi darta van kaf day kulo'o ɗisu?

⁶ May sa joon kaf nisi ŋray ca hiɗi zigiyna ma san gum goyo, ma san as slum hiɗi ɓalam loɗi;

⁷ La sa min tun ɓalam talamu, nam as slum hay ɓalam mi kawaya lebo gu-yakana, ŋalam goy hay kuta hay liy namna de' may.

Sum sa jufayna vi David

⁸ Kayni mi sem sum sa donona sa ay sun Davidna: Yoskeb-Baskebet, ma Taklemonna, kep jar sa ŋulona vi sojena, nam weɗ sumun kis-glafandi hiɗi kawayta valamu, cisi goy vun tuwsi kirap'.

⁹ Hena mi Eliyazar goora vi Dodo, goora vi Akoki, namu mi ma jar sojen sa duura ɦidi, sa tap tuwsi hiɗi David kay dur sa Filistina, kayn hay li ma sa Israyel segena ka pir kulo kay hiɗiyna,

¹⁰ Nam fok kulo'o, nam cal sa Filistina ta-ta ɓalam maka, na' hormos kulo tam kewta valamu. Hay buur na'ta kayni Ma-Vatɗin li butta-goyta ŋolo hay Israyel. Sum segen co bugol Eliyazar kayni kay yaw sle ma ɓuraŋŋa ɦawa.

¹¹ Hena mi Samma, goora vi Age, ma hay Harar. Sum sa Filistin tok tuwsi hay Lehi, hay liyn namna sine mara ka'a hobay hiɗi naayna; sumun ka jaŋ vok sa Filistina.

¹² Samma col goy way sinena, nam telemu, nam kol kay sum sa Filistina, Ma-Vatɗin li butta-goyta ŋolo kaw.

¹³ Hay liyna vi feɗna, muliyan ɦidi jar sa dok-ɦidina co tam David hay zul-hiɗiyta vi Adullam, kayni hay liyn vokŋa vi sa Filistina ka tuni hay lokŋa vi Refayim.

¹⁴ Hay na'ta David ay ŋayay hay gulmunna, sojena vi Filistin segena ka tuni hay Betlehem.

¹⁵ Darta kal hay David: Nam di'e: Niy ma hay kaata ta vun Betlehemta sa ma vulanti a ci ɗawn mi gige?

¹⁶ Ki kayn nala sum sa ɦidi sa donona jik jar kaŋŋa vi Filistina, nisi go niy ma hay kaata ta ka vun Betlehemta. Nisi maramu vulum mi David; may nam min ciɗi, nan yamam goy vok ir Ma-Vatɗina.

¹⁷ Nam di'e: Ma-Vatɗina, varta kay li van kayni na' gine'e hiɗi nanu. Sum nisina sa hin irita visi goy vun mitta kayni nan as cisi busuwsi su? Nam min ci niy namnaɗi. Kayni mi va ma sum nisi sa ɦidin lumna.

¹⁸ Abiskay ɓasum Yowabna goora vi Seruya, nam mi ma ŋolla vi sum sa ɦidina. Nam weɗ sumun kis-ɦidi hiɗi yakata valamu, nam cisi goy mati; selem tiy ŋolo jar sum sa ɦidina.

¹⁹ Nam kayni mi ma selem tiy ŋolo jar sa ɦidina, nam mi ŋolla visi kaw, may sum sa jew ɦidina nam may ŋra hiɗi nisiɗi.

²⁰ Benaya, goora vi Yehoyada, goora vi san kep hay Kabseel, hobay hiɗi nagga, selem tiy ŋolo kuɗ sle ma nam lumna. Zlon ma hay Mowab ma'na nam cum goyo. Nam jik gaa hay kaata, hay na'ta nam cal zlona, kayni hay buur ma niyn ka si'e.

²¹ Hiɗi kawayta valam hay ɓalam kay', nam ci sa ma Egiptena ma laŋ ɦuyum' ŋolo, nam tuɗ talam hiɗi zugulda hay ɓalamu; kawayta ta hay ɓam sa ma Egiptena nam sla'a, cap ci sa ma Egipten hiɗi na'a.

²² Kayni mi va ma Benaya goora vi Yehoyada lumna; selem tiya jar sum sa jufayna sa ɦidina.

²³ Nam kayni mi ma sumun slum yalam kulo ŋolo jar sa dok-ɦidina; may sum sa ɦidi sa jewna nam may ŋra hiɗi nisiɗi. David vulum liyn jar sa li dakka valam ta goy ŋayayta.

²⁴ Asayel, ɓasum Yowabna, nam ŋaɓay kuɗ sa dok-ɦidina. Elhanan, goora vi Dodo, ma Betlehemna.

²⁵ Samma, ma Harodna, Elika, ma Harodna.

²⁶ Heles ma Peletna, Ira goora vi Ikes ma Tekowana.

²⁷ Abiyezer ma Anatotna, Mebunay, ma Husana,

²⁸ Talmon, ma Ahowana, Maharay, ma Netofana,

²⁹ Heleb goora vi Baana, ma Netofana, Ittay goora vi Ribay ma hay Gibeya vi gurona vi Benyaminna.

³⁰ Benaya, ma Piratonna, Hidday ma hay Nakale-Gaasna.

³¹ Abi-Albon ma Arabana, Azmavet ma Barkumna.

³² Eliyaba, ma Kaalbonna, Bene-Yaken, Yonatan.

³³ Samma ma hay Harar. Akiyam, goora vi Sarar, ma hay Arar.

³⁴ Elifelet, goora vi Ahasbay, goor-ŋolona vi sa ma Maaka. Eliyam goora vi Akitofel, ma Gilona.

³⁵ Hesray, ma Karmella, Paaray, ma Arabna.

³⁶ Igal, goora vi Natan ma Sobana, Bani ma Gadna.

³⁷ Selek, ma Amonna, Naharay, ma Beerotna, goora vi Seruya, namu mi ma ziy sle-ma-duura vi Yowab goora vi Seruya.

³⁸ Ira goora vi Yeter, Gareb goora vi Yeter.

³⁹ Uriyas ma Hititna. Nisi noŋ pet dok-ɦidi yam siɗiya.