2 SAMUEL 22 - BIBALDA TA PELDETTA

Nulla vi David, hay li ma nam but goy hay ɓam sa gawt kalamna

¹ David gi nulla ki kayn nala tam Ma-Vatɗina, hay li ma Ma-Vatɗin butum goy hay ɓam sa gawt kalamna, butum goy hay ɓam Sawul kaw.

² Nam di'e: Ma-Vatɗina mi hiɗiyna vanu, mi gulmun ma ŋuyi tanna, mi ma butan goyna,

³ Lawna mi hiɗiyna vanu, liyn ma ŋayna vanu. Mi marayta vanu, mi donota ta suɗanta kaw. Mi liyn ma nan pir goyo kay ŋay hayamna. Naŋ sa ma su'da vanu, naŋ tel sumun kay lan joo'o.

⁴ Nan ka siwel ala: Suburta ka kay Ma-Vatɗina, nan buti goy hay ɓam sa gawt kanna.

⁵ Kay billa mi mitta sluɓanawa, Niy-ɓatna vi ɓulak-goyta muɗanawa nari;

⁶ Zigewna vi zul ma pi sumun ŋuyanawa, jawta vi mitta vanawa.

⁷ Hay li ma nan ka vun zlata, nan yi sem Ma-Vatɗina, nan yi sem Lawna vanu, goy hay zlamda-mulda valam pa, nam human delanawa, tiyta van coowa talamu kaw.

⁸ Nagat muɗ geɗa, na' wir kaw, dir dukalawn ma tuni gaan tun caw wira, nam tun caw geɗa, kay nam muɗi ɦiya.

⁹ Nukŋa ka cukay goy hay cinam pa: Kuta ŋalta kalay goy hay vunamu, veŋŋa ma sliy kuna ka jaŋay goyo.

¹⁰ Nam tun dukalawn gaa'a, nam jikay gaa'a kaw, ɗugulla ka moki gaa kuɗ selemu.

¹¹ Nam ka musi kulo'o kay kerubena, keruben ka fok hiɗi namu. Nam ka kal goyo hay gilaŋat simeɗna.

¹² Guɗuk ma ini talamna ti jufunda, tuwam ŋuyi hiɗi niy ma toki hay liyn kepna hiɗi ɗugul ma jufun nilla.

¹³ Veŋ ma kuta ka kal goy hay wileta ta tuɗ vokomta.

¹⁴ Ma-Vatɗin di delemay kulo hay wuralawn pa, ma Kulo-Jamna di delem goyo;

¹⁵ Nam ɓe ɓarawta, mer sa gawt kanna goyo, niy-ma-bayna viysi hagat kirsiya.

¹⁶ Torɓok ma gaa kuɗ niy-lum ma ŋolla wizik kulo'o, dir nagat ma tuni gaana vul tuwam goy haraŋi, kuɗ donota ta Lawn ɗeka' goyta, kuɗ suwana vi simeɗ ma cinamna.

¹⁷ Nam meɗ ɓalamay kulo pa, nam bowonu, nam vanay goy hay niy-lum ma ŋulon pa;

¹⁸ Nam butan goy hay ɓam sa ma gawta ma donona hay ɓam sa gawta sa dono suwan nanu.

¹⁹ Nisi ŋuyanu hay buur ma nan ka hay vun-zlata. May Ma-Vatɗina namu mi ma gut kuɗanna.

²⁰ Nam muɗanawa goy ŋolo, nam suɗanawa, kay nam minanu.

²¹ Ma-Vatɗin li tanu kuɗ ɗigerta vanu, nam vulanu kuɗ bay-gesta vi ɓanu;

²² Kay nan poyay hay gatta vi Ma-Vatɗina, nan may li va ma joo'o kir Ma-Vatɗina vanɗi.

²³ Dita valam kaf ka gaa vokanu, nan bay cal goy hay gatta valam tuwa.

²⁴ Joota van vok iram tayɗi, nan tel tuwanu kay li jiw-zlata.

²⁵ Ki kayn nala Ma-Vatɗina vulanu kuɗ ɗigerta vanu, kuɗ bay-gesta vanu vok iramu.

²⁶ Hiɗi sa ma ŋaana naŋ ɗek tuwaŋ goy ŋaa'a, hiɗi sa ma ɗigera naŋ li kuɗ ɗigerta,

²⁷ hiɗi sa ma bay-gesna, naŋ ɗek tuwaŋ goy bay-gese kaw, hiɗi sa ma yalam ɓulakayna, naŋ li kuɗ yamda ɓulakayta kaw.

²⁸ Sum sa hot yisi gaan naŋ suɗsiya, hiɗi iraŋ ma ɗuwna kaw, naŋ hot yam sum sa subur tuwsin gaa'a:

²⁹ Awa, naŋu mi haraŋa vanu, Ma-Vatɗina, Ma-Vatɗina muɗ jufunda van goy haraŋi.

³⁰ Hiɗi naŋu nan mok sum sa tuwsi ganay hiɗi sle-ma-duura, hiɗi Lawna vanu nan jik goy kay gulmunna.

³¹ Hagata vi Ma-Vatɗina ka ɗigere, yoboyna vi Ma-Vatɗina waki-wak; namu mi marayta vi nisi kaf sa ŋay talamna.

³² Lawn ma kepna kayn mi Ma-Vatɗina ɗisu? Hiɗiyna vaya mi Ma-Vatɗina vaya ɗisu?

³³ Ma-Vatɗina mi gulmunna van ma donona, namu mi ma naran hay hagata ta ɗigerta.

³⁴ Nam muɗan sen ŋray ca ki sem dukka nala, nam colan hay liyna van ma kulo ɗiŋiriŋŋa.

³⁵ Nam hatan ɓan kay li duura, glaŋan nir diŋ-diŋ ɓaraw ma wayna.

³⁶ Naŋ vulan marayta vi su'da vaŋu, nan muɗi ŋolo kuɗ ŋaata vaŋu.

³⁷ Hagat ta nan tuɗ haya'ta naŋ muɗa' goy buɗuku, sen may geɗ goy noŋɗi.

³⁸ Nan digiɗ sa gawt kanna, nan vatsi goyo; la nan bay vatsi goyo, nan hot bugolanɗi.

³⁹ Nan vatsi goyo, nan kirapsi gaa'a, nisi may fok kulo loɗi; nisi yak gaa kuɗ senu.

⁴⁰ Naŋ junan furan hiɗi donota kay li duura, sa gawt kanna naŋ hotsi yisi ka kuɗanu.

⁴¹ Sa gaw kanna naŋ muɗsi ŋorsi kiranu. Sa kan gawna nan vatsi goyo.

⁴² Nisi ɗuw goy galsiya, sa ma suɗsi goy mayɗi, nisi siwel tam Ma-Vatɗina, nam may hotsi ditɗi.

⁴³ Nan lutsi goyo ki butuw ma gaa kay nagatna nala, nan kirapsi gaa'a, nan taysi gaa'a ki butuw ma hay hagatna nala.

⁴⁴ Naŋ butan goyo kay cirepta vi sumuna vanu; naŋ ŋomanu kay nan ma li mi ma ŋolla vi jaf-sumuna; sum sa nan wisiɗin muɗi si sa sunanna.

⁴⁵ Gurona vi sum sa pulla giɗelan delanu, vunan di kep kayn nisi hum de'.

⁴⁶ Gurona vi sum sa pulla tuwsi ka visi bat-bat'. Nisi cuki goy hay hoyok-ziyna visi hiɗi tuwsi visi bat-bat'.

⁴⁷ Bolda kay Ma-Vatɗina, suburta tam hiɗiyna vanu. Lawna, hiɗiyna vi su'da vanu, seŋ ma tiy ŋol tiy ge.

⁴⁸ Lawna ma joban yanna, ma hot yam sumun gaa kuɗanna,

⁴⁹ Ma hulotan goy ɓam sa gawt kanna, naŋ wulan kulo'o kay sa gawt kanna, naŋ butan goy hay ɓam sum sa ɦawlana.

⁵⁰ Kuɗ kayni, Ma-Vatɗina, nan ma subur semda vaŋu jar jaf-sumuna, nan ma gi nul kay gajijita vi semda vaŋu.

⁵¹ Naŋ vul butta-goyta ta ŋolda mi ma naŋ tunum mulla, naŋ li slugota tam faŋŋa ma mul ɦoki kamna, Mi David hiɗi jafna valamu, kay dok-doko.