2 SAMUEL 21 - BIBALDA TA PELDETTA

Mayta li ir busat ɦidi

¹ Hay liyna vi David kayni, mayt li ir busat ɦidi. David job tam Ma-Vatɗina, Ma-Vatɗin dum ala: Mayt li kayni kuɗ Sawul hiɗi jafna valamu, kay busuw ma nisi ɦokom goy ŋolla, kay nam vat sum sa Gabawonna goy ŋolo.

² Mulla yi sum sa Gabawonna kay law hiɗi nisiya, hay na'ta sum sa Gabawonna say si gurona vi Israyel loɗi, may nisi kayni mi caw sa Amoriyana ma hinina ɦawa; gurona vi Israyel yi va kisi kay jun hiɗi nisiya, may hiɗi kayni kaf Sawul mini kay vatsi goy kafe, kuɗ ciwerta valamu kay jafna vi Israyel ɦidi Yuda.

³ David di tam sum sa Gabawonna: Wulin kayni nan ma lum tigiya kay porgi ɗawn mi mige? Kay porgiya, kay a nigi ma gi bol kay sumuna vi Ma-Vatɗina?

⁴ Sum sa Gabawonna hot dita: Numa may min gurju hiɗi or kat Sawul hiɗi ziyna valamɗi, numa may min a ci sa goy hay Israyelɗi kaw. Nala mulla di'e: Nigi min ala nan ma ligit ɗawn mi mige?

⁵ Nisi hot dita: Kay san kayni loɗma jafna goyo, nam vari kay cum goy kafe, kay jafna ma vat goy kay nagata vi Israyel kafe,

⁶ nala naŋ ma vulma sumun siɗiya kuɗ gurona valamu, numa ma ɓalsi kulo kat guna vok ir Ma-Vatɗina hay Gibeya vi Sawul, ma vilekayna vi Ma-Vatɗina. Mulla di'e: Nan as vulsiya.

⁷ Mefiboset goora vi Yonatan mulla hinim goyo, kayni kuɗ va ma David hiɗi Yonatan goora vi Sawul yum kisi vok ir Ma-Vatɗina.

⁸ May Rispa goota vi Ayya, gurona va' sa na' vuɗsi mi Sawul ma'na, Armoni hiɗi Mefiboset, mulla yawsiya, tapsi hiɗi gurona vi Merab sa vaslna. Merab kayn ti goota vi Sawul, guro nisina si sa na' vuɗsi mi Adriyel ma Meholana, goora vi Barzilay.

⁹ Nam vulsi hay ɓam sum sa Gabawonna, nisi tuɗ ɓalsi tam gun kulo kay hiɗiyna, vok ir Ma-Vatɗina. Nisi siɗiya kaf mit kuɗ tuwsiya, nisi fi mitta hay buurta jewta vi feɗna, hay tun cawta vi feɗna vi orgena.

¹⁰ Rispa goota vi Ayya yaw sak kepe, baram kulo kay hiɗiyna, tun caw hay feɗn pa, ta-ta niy ma dukalawn si kisiya, hay falayta na' ka tel layay ma dukalawna kay co katsiya, hay henjeta na' ka tel muuriyan ma fulla may.

¹¹ Va ma Rispa goota vi Ayya, gorvota vi Sawul lumna nisi maram labaram tam David.

¹² Nala David kalay yaw zokŋa vi Sawul hiɗi zokŋa vi Yonatan goy vi sum sa Yabes hay Galaadna, kay sum sa Yabesna kal yawsi zoksi ay hay Bet-San pa, hay li ma sa Filistin ɓalsi kulo hayamna, kayni hay li ma nisi kol kay Sawul hay Gilbowa.

¹³ Ɗawni nisi kaliya, yaw zok Sawul hiɗi zok Yonatan, goora valamu; sum sege sa nisi ɓalsi kulon kaw nisi yawsi zoksiya.

¹⁴ Zokŋa vi Sawul hiɗi zokŋa vi goora valam Yonatan nisi pum hay Sela hay nagata vi Benyamin, hay zulda vi Kis, bum Sawul, slen ma mulla dum kafna nisi li kuɗumu. Bugol kayni Lawn dikam sleɗ tam nagata.

Duura hiɗi sa Filistina

¹⁵ Sum sa Filistin li duura hiɗi sa Israyel mara lo. David kalay ɗawni hiɗi sa sunda valamu. Nisi dur sa Filistina. David ay makiya.

¹⁶ Ɗuw na kayni, Yikbi-Benob, kep jar gurona vi Rafa, var hay dikam kay ci David goyo. Kaway ta hay ɓalamta nekka va' ir sikel kis-ɦidi. Kew-gaferaŋ ta juni furamta na' wuliya kaw.

¹⁷ Abiskay goora vi Seruya co'o kay gut kuɗ David, nam cal sa ma Filistina, cum goy mati. Nala sumuna vi David yi va kisiya, ka dum ala: Naŋ ma kalay goy hiɗi numa'a kay li duura loɗi, kay naŋ ma tew fitilla vi Israyel goyɗi.

¹⁸ Bugol kayni lo duura li mara'a hay Gob hiɗi sum sa Filistina. Ki kayn nala Sibbekay ma Husana, nam ci Saf, ma kep jar gurona vi Rafa.

¹⁹ Duura li mara hay Gob lo hiɗi sum sa Filistina. Nala Elhanan, goora vi Yaare-Oregim ma Betlehemna, nam ci Goliyat ma Gatna, kaway ta duura valamu gu ma kuɗa'na ŋray ca hiɗi gu-malla.

²⁰ Duura li mara'a lo hay Gat. Hay liyn kayni sa mara ka kep wuli fiyok ŋolo, cita-ɓalam karkiya karkiya, cita-selem karkiya karkiya lay. Cita-ɓalam hiɗi cita-selem tapay kaf dok-ma' yam fiɗi. Nam may goy hay Rafa pa.

²¹ Nam tun caw gufut sa Israyella, nala Yonatan goora vi Simeya ɓasum Davidna cum goy mati.

²² Sum nisi sa fiɗin kayni si gurona vi Rafa hay Gat. Nisi mit kayni cisi mi David hiɗi sa sunda valamu.