2 SAMUEL 2 - BIBALDA TA PELDETTA

David mulla vi Yuda hay Hebron, Is-Boset tun mul hay Mahanayim kay sa Israyella. Duura fok jar gurona vi nagata

¹ Bugol kayni, David job Ma-Vatɗina, nam di'e: Nan ma tuɗ hay hoyok-ziyna vi Yuda mara kep su? Ma-Vatɗin dumu: Tuɗaŋu. David di'e: Nan ma tuɗ hay hoyok-ziy marige? Ma-Vatɗin hotom dit ala hay Hebron.

² David kalay haya, hiɗi boyna valam sa ma'na: Ahinowam ta Yisreelta, hiɗi Abigayil ta Karmelta, cata vi Nabal.

³ Sum sa ay hiɗi Davidna nam yawsi kuɗum kaw, gigekaw hiɗi ziyna valamu valamu; nala nisi lakay hay hoyok-ziyn Hebron.

⁴ Sum sa hay Yuda co'o, nisi tun David mul kay jafna vi Yuda. Nisi mar labara tam David ala Sawul pum kayni si sum sa Yabesna hay Galaad.

⁵ David cuk sumun sunu tam sum sa hay Yabes hay Galaad, kay disi ala: Vigi bolda vi Ma-Vatɗina, kay nigi li ŋaat kat Sawul mulla vigiya kay pum si nigiya.

⁶ Wulin kayni, Ma-Vatɗin li ŋaata hiɗi ɗigerta tigiya, nan kaw, nan ma ligi ŋaata, kuɗ slen namna ma nigi lumna kayni.

⁷ Donot kigi na kay', muɗgi si sum sa manjufu; kay mulla vigi Sawul mitiya, sum sa Yudan tunanti mul kay jafna vi Yuda kayn mi nanu.

⁸ Hay na'ta kayni, Abner goora vi Ner, ma ŋolla vi sojena vi Sawul, nam vi Is-Boset goora vi Sawul, nam kalam hay Mahanayim.

⁹ Nam tunum mul kay Galaad, kay sa Gersuriyena, kay Yisreel, kay Efrayim, kay Benyamin, kay sa Israyel kafe.

¹⁰ Is-Boset goora vi Sawul busata valam asay dok-fiɗi, hay li ma nam tun mul kay sa Israyel kayni. Nam ti mulda ir busat ma'. Hin tapay kuɗ David kayni mi jafna vi Yuda tuta.

¹¹ David ti mulda kay jafna vi Yuda kayni ir busat siɗiya hiɗi til karkiya.

¹² Abner goora vi Ner, hiɗi sumuna vi Is-Boset kaf, nisi kalay goyo kay tuɗ sli Gabawon.

¹³ Yowab, goora vi Seruya, hiɗi sumuna vi David kaw cukay goy kirsiya. Nisi ŋaf tuwsi goboy hiɗi goloŋga vi Gabawon. Nisi laka, segen lak hay gal hena vi goloŋŋa, segen hay galam hena may.

¹⁴ Abner di tam Yowab: Hin guro sa joriyon lakŋi fok kulo'o kay ci tuwsi vok iraya. Yowab ala hinsi yaw kulo'o.

¹⁵ Nisi yaway kulo'o, kalay kat tuwsi vok tuwsi ca ca', doogo yam ma' kay jafna vi Benyamin hiɗi Is-Boset, doogo yam ma' kuɗ sumuna vi David may.

¹⁶ Gigekaw vi sa ma nam ŋafamna kay yalamu, jikim kuɗ mokom hiɗi kewta, nisi kaf cuk gaa'a. Liyn nam na ma goboy hiɗi Gabawonna, nisi tunum selem ala Helkat-Hatsurim.

¹⁷ Hay buur namna kayni, duura li dono ŋolo, hay buur namna sumuna vi David kol kay Abner hiɗi sum sa Israyella.

¹⁸ Gurona vi Seruya sa ɦidin ay hay liy namna: Si Yowab, Abiskay hiɗi Asayel. Asayel nam koloy ŋolo ki duk ma fulla nala.

¹⁹ Nam tun kay Abner ɗiger, min cal goy gal jufɗi lay, min cal goy gal gulɗi lay.

²⁰ Abner ɗuw bugolomu di'e: Kilan mi naŋ Asayel su? Nam hot dit ala awa mi nanu.

²¹ Abner dumu: Muɗaŋ iraŋ goy gal gulu lebo gal jufu, guro-joriyon cani vaŋ mara kuɗsi kepe, yawaŋ jakŋa valamu. May Asayel min cal goy kalamɗi.

²² Abner di tam Asayel lo: Vaŋ tuwaŋ goy ŋoranu, naŋ min ala nan ma calaŋu kay gaŋ goy gaa kay nagata kay mige? La nan caŋawa, bugolda nan ma poŋ iran kulo kir ɓasuŋŋa Yowab ɗawn poŋtige?

²³ May Asayel min cal goyɗi, nala Abner jikim hayam hiɗi giɗer kawayta valamu, kawayt duɓ goy bugolomu. Nam nig gaa hay liy namna, cap mita, sumun kaf sa co hay liyn ma Asayel ka giy gaa hayam mitin kayni, nisi cola.

²⁴ Yowab hiɗi Abiskay jaŋ kuɗ Abner, nisi co hay jiŋiliŋŋa vi Amma hay li ma fatta ka ɗiga, ma ka ɗiger vok Giyah, hay hagata vi fulda vi Gabawon.

²⁵ Gurona vi Benyamin mok yam tuwsiya, tap kuɗ Abner, nisi lak kulo'o kay jiŋiliŋŋa.

²⁶ Abner yi Yowab nam di'e: Kew-gaferaŋa ma cal dok-dok su? Naŋ may wi ala yorta ma li bugol kayni ɗisu? Naŋ ma di tam sumun ala nisi ma digiɗ guro-biyosin loɗi ɗawn lancitige?

²⁷ Yowab hot dita: Lawn ka iriya, la naŋ di diyɗi, ta-ta goy grawt kaw numa ka digiɗgiya.

²⁸ Nala Yowab buw togolomna, sumun kaf lakaya; nisi min digiɗ sa Israyel loɗi, nisi min tuɗ vok hiɗi duur loɗi.

²⁹ Abner hiɗi sumuna valam bur tuɗ hay fulda talal', nisi ɦaw Yordan kulo'o, nisi ɦaw Bitron kulo kafe kaw, bugolda nisi co hay Mahanayim.

³⁰ Hay hotta vi Yowab vun duur kayni, nam tok sumun kaf, sumuna vi David sum say kuɗsiɗi doogo yam zleeŋe, hiɗi Asayel kaw.

³¹ May sumuna vi David ci sumun kis-ɦidi hiɗi diram dok-karkiya kuɗ sumuna vi Benyamin hiɗi Abner.

³² Nisi sli Asayel, tuɗ pum hay zulda vi bulumu hay Betlehem. Yowab hiɗi sumuna valam bur tuɗ talal', hay li ma fatta day kayni, nisi co hay Hebron may.