2 SAMUEL 16 - BIBALDA TA PELDETTA

Boniyom Davidna hiɗi sa gaw kalamna

¹ Hay li ma David suw goy kay vun hiɗiyt neeɗana, ɗuw na kayni, Siba, ma sunda vi Mefiboset co goy vokomu hiɗi kuron ganay ma', fun kis-ma' ka kay kuro namna, gulda-gulda ma sorin kis, soy goyo, vuɗna vi gu ma vuɗ mendan kis, hiɗi genda ta vinna kepe may.

² Mulla di tam Siba: Naŋ min lum hiɗi nam mige? Siba hot dita: Kuron kayni kay sumuna vi mulla ma ɓe kalamu, funa hiɗi vuɗna vi gu ma vuɗ menda kayni kay guro-joriyon tumu, vinna kayni kay vat laata vi sum sa maki kay tu'da hay fulda may.

³ Mulla di'e: Goora vi mulaŋŋa ka arige? Siba hot dit tam mulla ala: Humaŋu, nam ay hini hay Yerusalem, kay nam di ala: Vaydi jafna vi Israyel ma hotan mulda vi bunu.

⁴ Mulla di tam Siba: Humaŋu, slena vi Mefiboset kaf nam vaŋu. Nala Siba di'e: Nan dab vokanawa gaa'a. Nan fi slugotawa vok iraŋu, mulla vanu.

⁵ David co ta-ta hay Bakurim. Ɗuw na kayni sa mara kalay goy hay liy namna pa, nam hay jafna vi Sawul, semda valam ala Simey nam mi goora vi Gera, nam ka tuɗ kuɗ David kay ŋulumu,

⁶ David hiɗi sa sunda valam kaf nam ka gisi hiɗi goorhoyona, may sumun kaf hiɗi sum sa donona kaw ka kuɗ David, ka ŋuyi galam juf lay galam galam lay.

⁷ Hay li ma Simey ka ŋula, nam ka di ala: Kalaŋu, kalaŋu, naŋ sa ma ɦok busuwn goyna, naŋ sa ma joona!

⁸ Ma-Vatɗin gi busuwna vi jafna vi Sawul kaŋu, kay naŋ mus kay zlamda-mulda valamu. Wulin kayni Ma-Vatɗin vul mulda vaŋawa goy hay ɓam goora vaŋu Absalom; naŋ nagay a hin goy ti haw ki kayn nala yo, kay naŋu mi sa ma jaŋ busuw goyo.

⁹ Ki kayn nala Abiskay goora vi Seruya di tam mulla: Mulla, diy ma mitin zawni ŋulaŋ kayn kay mige? Nan siɗawaŋu kay naŋ hinan tuɗ talamu kay kaam yalam goyo.

¹⁰ May mulla di'e: Nigi gurona vi Seruya, jaran nan hiɗi nigi noŋ kayn mi mige? La nam ka ŋulanu, dum ala nam ŋulanu kayn mi Ma-Vatɗina. Sa ma as dum ala naŋ li nala zawn kay mige kayn gige?

¹¹ Nala David di tam Abiskay hiɗi sa sunda valam kafe: Humgiya, goora van ma nan vuɗumna kaw min can goyo, may sa ma Benyaminna zawni as lan joo suwa sem gaage? Hinim ŋul ki nam min nala, kay dum kayni mi Ma-Vatɗina.

¹² La li ŋalɗi Lawn ma wan lasta vanu, nam ma laŋ ŋaata hay baŋal ŋulda ta vaydita klasige.

¹³ David hiɗi sumuna valamu ka tuɗ voksiya, may Simey ka tuɗ goy kay gaŋ hiɗiyna gal David, hay tu'da valamu, nam ka ŋula. Nam ka gi David hiɗi goorhoyona, ka yak butuwn kulo'o.

¹⁴ Mulla hiɗi sum sa kuɗumna kaf co hay Eyafim, ɗawni nisi tun suksiya.

Absalom hay Yerusalem, gatta vi Akitofel hiɗi Husay

¹⁵ Absalom hiɗi sum sa Israyel kaf kalay kulo'o hay Yerusalem; Akitofel ka kuɗ Absalom kaw.

¹⁶ Husay ma Arkina, ma bana Davidna, hay li ma nam co kat Absalom, nam dumu: Mulla mus iri musge, mus iri mus ge!

¹⁷ Absalom di tam Husay: Banaŋŋa naŋ juni hiɗi nam ŋolo ɗi su? Naŋ min kal kuɗumɗi kay mige?

¹⁸ Husay hot dit mi Absalom: Nan minim kayni mi sa ma Ma-Vatɗin vilekem lay, sumun kaf vilekem lay, Israyel kaf vilekem layna. Nan min mus kayn hiɗi namu.

¹⁹ La naɗi kaw, nan sunaŋgi ɗawn mi naŋ Absalom ki nan ay sun buŋ nala lay.

²⁰ Absalom di tam Akitofel: Jobgi Ma-Vatɗin kuɗ tuwgi tige, nay lum wulin ɗawn mi mige?

²¹ Akitofel di tam Absalom: Tuɗaŋ buraŋ hiɗi boy sa sunda vi buŋu sa nam hinsiyays kay ŋom ziyna; ki kayn nala sum sa Israyel kaf ma wi ala naŋ muɗ tuwaŋawa bis kir buŋu, ki kayn nala sum sa hiɗi naŋŋa kaf ma muɗ dono'o.

²² Nisi kot guɗukŋa mi Absalom kulo kay yam-ziyna, Absalom kalay bur hiɗi boy sa sunda vi bulumu, goy haraŋ kir sa Israyel kafe.

²³ Hay na'ta kayni, yal ma Akitofel ɗekemna gaŋeraŋ kuɗum ŋolo ki nisi jobom kayn mi Lawn kay tuwam nala. Yal ma Akitofel ɗekemna nam ay ki kayn nala. La mi yal ma nam ɗekem mi Davidna lebo mi Absalomna kaw nam nala.