2 SAMUEL 14 - BIBALDA TA PELDETTA

David var kay Absalom

¹ Yowab goora vi Seruya wi ala mulla dikam tun caw min Absalom.

² Nam gi sunda hay Tekowa kay gar cat ta yal ay kepe. Nam di tam cata: Lag tuwag hawi, cukag sligar ma do'olla tagu; set mul tagɗi, lag tuwag ki cat ta ka ti do'ol sa ma miti ɓa-ɓa nala.

³ Nak ma tuɗ tam mulla ki kayn nala, kayni ti lawta ta nak ma dumtita. Yowab da' law ma na' as dumtina.

⁴ Cata ta Tekowat kalay di law namna mi mulla. Na' dab voka' gaa kay nagata, girif mulla. Na' di tam mulla ala: Mulla, gutan gutge.

⁵ Mulla di ta'a: kag mi law mige? Na' hot dit ala: Awa, nan ti cata duhulta, jufan mitiya.

⁶ Gurona van ay ma', nisi li tuwsi ɦiy goy hay sinena, sa ma yawsi goy mayɗi, ma kepn cal hena, cum goy mati.

⁷ Wulin kayni sum sa hay jafna visina yaway kulo katanu, ala nan vulsi goora vanu ma ci ɓasulumn goyna, kay nisi min cum goyo kuɗ ci ma nam ci ɓasulumna. Nam ma yaw vocota numa min cum goyo, ki kayn nala vun guna van ma hini ŋal waŋŋa nisi tewem ɗawn goyo, kay semda vi jufan ma hin gaa hay nagatɗi lay, sa valam mara hin iri gaa kay nagatɗi lay.

⁸ Mulla di tam cata: Tuɗag vo hay ziyna vagu, nan ma vul hagat kay vat lawta vagu.

⁹ Cata ta Tekowata di tam mulla: Mulla vanu, kitat kayni nig ɗawn kan nanu hiɗi ziyna vi bunu, naŋu hiɗi zlamda-mulda vaŋu na' as nig kigi noŋɗi.

¹⁰ Mulla di'e: La sa di va ma joo'o katagu, nak maranta, nala nam as tun ɓalam tag noŋɗi.

¹¹ Na' di'e: Mulla, humaŋ ma gaŋ kay Ma-Vatɗina Lawna vaŋ gi ge, kay a sa ma job yamna ma ɓulak slen vokom suwɗi, kay a nisi ma can goora van goyɗi. Nam di'e: Ma-Vatɗin ka iriya, goora vagu ɗuŋus ma kalam kep kaw as nig gaaɗi.

¹² Nala cata di'e: Nan gorvota vaŋu, naŋ ma vulan hagata kay nan di va taŋ kepe. Nam di'e: Dagiya.

¹³ Cat di'e: Naŋ var ki kayn nala kat sumuna vi Lawn kayn kay mige? Kay yoboy ma may goy hay vunaŋ pana ɗek ala naŋ kaw joo'o lay, kay sa ma naŋ noyom goyna humaŋ may gaŋ kalam loɗi.

¹⁴ Lalinige kaw nay kaf ma mita, nay ma muɗ ɗawni ki niy ma yamam goy kay nagata, ma as tok kulo hay liy kep loɗin nala; Lawn may yaw irit goyɗi, may nam may min ala sa ma piri goyna ma mus goy gine'e hiɗi namuɗi.

¹⁵ Wulini la nan co kayni kay di slen kayni tam mulla vanu, kayn kuɗ ta ala sumun muɗan tuwan nari, nala nan di ala nan min law tam mulla, kay la li ŋalɗi, mulla ma hum dita van klasige.

¹⁶ Awa, mulla ma hum dita vi gorvota valamu, kay butan goy hay ɓam nisi sa gar kay can nan hiɗi goora van goyo, kay numa ma yaw vocota vi sumuna vi Lawnɗi.

¹⁷ Gorvota vaŋ di ala: Dita vi mulla vanu vulan tun-sukka vulge, kay naŋu mulla vanu, naŋ ki sunda-wuralawn nala, naŋ musi jigere kay hum law ma ŋaana hiɗi ma joona. Ma-Vatɗin Lawna vaŋu mus hiɗi naŋu kaw.

¹⁸ Mulla hot dita, nam di tam cata: Slen ma nan min jobakgin ɗawni nak ma ŋayam kanɗi. Cata di'e: Daŋ va namna, mulla vanu.

¹⁹ Nam da'a: Slen namna kaf ma nak dumna kayni, Yowab vunam may hayɗi su? Cat hot dita: Gasi wete, mulla vanu, ki naŋ ka iriya nala, slen ma naŋ dum kafna ma cal goy badal mayɗi. Vulan hagati kayni mi gorvona vaŋ Yowab, tun lawti hay vunan kaf kayn mi namu.

²⁰ Gorvona vaŋ Yowab li nala kayni kay ŋuy lawt goy gala' ɦawa'a. May naŋu, mulla vanu, yalla vaŋ ŋray hiɗi sunda-wuralawna, naŋ nagay kay wi sle ma ka li gaa kay nagatna kafe.

²¹ Mulla di tam Yowab: Awa nan min li slen kayni, tuɗaŋu, maraŋ goor ma joriyona Absalom aya.

²² Yowab dab vokom gaa kay nagata, nam girif mulla. Nam subur sem mulla. Bugolda nam di'e: Vaydi nan gorvona vaŋu wi ala naŋ lan slugotawa, kay naŋ vi dita vi gorvona vaŋawa.

²³ Bugolda Yowab fokay kulo'o, nam kalay hay Gesur, nam mar Absalom hay Yerusalem.

²⁴ May mulla di'e: Nam musis goy hay ziyna valamu, kay nam ma wan iran noŋɗi. Nala Absalom mus malam goy hay ziyna valamu, nam may wi ir mulla noŋɗi.

²⁵ Hay Israyel noŋ kaf, kayni, sa mara ma selem tiy kuɗ jifiyta valamu ki Absalom nala mayɗi, tun caway gaa selem pa ta-ta kulo kalam dab' kayni, va ma joo may talam noŋɗi.

²⁶ Hay li ma nam wel ɗuŋusamu, hay busat kaf kayni nam ka wel ɗuŋusamu, kay ɗuŋusam cum neke, nekka vi ɗuŋus ma kalamna ir sikel kis-ma', ŋray hiɗi va ma ŋa nekka vi mulla.

²⁷ Absalom vuɗ guro-jufayn ɦidi, hiɗi goot-cat kep ya' Tamar, na'a ti cat ta jifiy ŋolo.

²⁸ Absalom li busat hay Yerusalem ma' bay wi ir bulumu,

²⁹ nam gi sunda tam Yowab ala nam co'o kay naram tam mulla, may Yowab min co talamɗi. Nam gi sunda tam Yowab sem ma ma'na, may Yowab min co noŋɗi.

³⁰ Bugolda Absalom di tam sa sunda valamu: Ɗuwgiya, sinena vi Yowab ka goboy tam sinena vanu, orgen ka haya; tuɗgiya, dogi kut kuɗumu. Nala sa sunda vi Absalom do kut kuɗ sinena.

³¹ Yowab fokay kulo'o, kalay kat Absalom hay ziyna valamu. Nam dumu: Sa sunda vaŋu do kut kuɗ sinena van kayn kay mige?

³² Absalom hot dit tam Yowab: Nan gi sundis taŋ ala naŋ co tanu, kay nan min gaŋ sun tam mulla, kay naŋ dum ala: Nam hotanay hay Gesur pa kay mige? Lali nan ay ɗawni ta-ta wulini, kayn kiran ŋaa'a suwa. Wulin kayni nan min wi ir mulla, la nan li va ma joo'o, nam can goy mati.

³³ Yowab kalay kat mulla, nam vum labar namna. Nala mulla yi Absalom, Absalom co talamu, nam dab vokom gaa kay nagata. Mulla bowomu may.