2 PETER 2 - BIBALDA TA PELDETTA

Sa jobta-Lawna sa bay-gasina

¹ Hay jewe sum sa jobta-Lawna sa bay-gasina ay dusi goy jar sumuna ŋolo, nala kaw sum sa hat hatta ta bay-gasita ma mar hatta ta ɓuraw vun sumuna hiɗi hatta ta mar ba-goyta jarsiya, nisi ma puw vunsiya kay mulla visiya ma butsi goyna, nisi ma mar ba-goyta kisi gosoyo.

² Sumun ŋolo ma tap kuɗsiya hay raw-goyta visiya, kuɗsi nisiya kaw, hagata vi gasita ma fi ŋulda,

³ Kay garta vi slena hiɗi yoboy ma sinna, nisi ma muɗgi goy ki slen ma gusna visi nala, may kitat kisiya hay jeway pa, ba-goyta visiya may kal senɗi kaw.

⁴ Kay la Lawna hin sa sunda-Wuralawnɗi hay li ma nisi li suluku, may cuksi gaa hay zul ma wiŋŋa vi jufunda kay cub kitata;

⁵ la nagata ta jewta nam may hina' goyɗi, may la nam suɗ sumun goy kuɗsi glafandi, jarsiya mi Nuwa sa ma kus labara kay ɗigerta, hay li ma nam hin niyn si gaa kay sum sa liwisna,

⁶ la nam ka kitat kay Sodoma hiɗi Gomora, la nam tom goyo, muɗum goy butuw-kuwa, nam vulum goyo kay ɗek va tam sum sa liwisna sa min co bugolo,

⁷ may la nam suɗ Lot sa ma ɗigera goyo, sa ma dikam ka las ŋolo kuɗ poyta gunita vi sum sa jiw-zlata,

⁸ kay nam sa ma ɗigera ma ka musi jarsina ka mak ciwta valam ta ɗigerta hay buurta kaf, hay li ma nam ka wi hiɗi iramu, hum kaw kay lop ma joona visiya,

⁹ Kay nisi sa vi kuɗ Bum-Sumuna nam wi kay suɗsi goy hay wakka pa, nam as ŋom sa bay-ɗigera kaw kay watsiya hay buura vi kitata,

¹⁰ suw pet nisi sa poy kuɗ sliwna hay darta liwista, sa ɗuw gaŋeraŋa vi Bum-Sumuna kaw birek-ceke, sa li wasna, sa sli yam tuwsi kulona, nisi sa may li nari kay ŋul gaŋeraŋ ma ŋulonɗi,

¹¹ may sa Sunda-Wuralawna sa ŋulo hiɗi donota hiɗi gaŋeraŋa kaw, min nar kitata ŋulda kisiya vok Bum-Sumunɗi!

¹² Nisi kayni ŋray ca ki muur ma bay-varta, ma koti kayni kay san vumu, cum goyo tuta, kay nisi ŋul va ma nisi wumɗina, nala nisi ma ba goyo hay joota visiya.

¹³ Bay-ɗigerta ma fi wurakŋa vi bay-ɗigerta. Haysi firiya hay li ma nisi vul tuwsi goyo kay liw gijum-gijum hay falayta. Nisi kayni si sa liwisna hiɗi sa gesayna, nisi hob haysi hiɗi ɗutta hay li ma nisi li yuldet hiɗi nigiya.

¹⁴ Irsi hobay hob hiɗi zlata-bulota, nisi may mak kay li sulukŋaɗi, sum sa bay vi dono'o nisi ɗutsi goyo, diksi hatay kay darta vi farayna, nisiya si gurona vi be'da.

¹⁵ Hay li ma nisi cal goy hay hagata ta ɗigerta pa calla, nisi viy tuwsiyawa goyo hay li ma nisi sli hagata vi Balaam, goora vi Bewor, nam ma hayam min wurakŋa vi bay-ɗigerta,

¹⁶ may nam fi wurakŋa vi ŋel-gatta valamu, kurota numulta law talamu hiɗi della vi sana, na' tel lop ma ɦay-ɦayna vi sa ma jobta-Lawna kaw.

¹⁷ Nisi kayni mi kaara ma bay niyna, ɗugulla ma simeɗn dolom vokomna, jufunda ta nilta koti kisiya.

¹⁸ Hiɗi ɓakŋa visi ma golɓotna ma waana, nisi nem sumun goyo hiɗi darta ta liwista vi sliwna, sa suɗay goy wulini hay ɓam sum sa lakay hay viy-goyta.

¹⁹ Nisi disi ala nisi buti goyo, may nisi kay tuwsiya si gorvona vi joota, kay san gigekaw mi gorvona vi va ma nam juni gaa kuɗumna.

²⁰ Kay na'ta la nisi hin liwista vi nagatawa goyo kuɗ wida vi Bum-sumuna ma su'da Yesu Kristu, may bugolda la nisi hin tuwsi hot hay mara lo, nisi ma fi lawt ŋolo suw ta jewta.

²¹ Lali nisi wi hagata vi ɗigerta jewɗi, kayn ŋaa'a kisiya suw ma nisi wa'na, may nisi cal goy hiɗi vun-ma-gatna ma peldetna ma vuli tisina.

²² Van li tisiya ki law ma nir-niramna ma gasina di nala ala: Diyna hot ti vinna valamu, bagumda muz tuwa' goyo, may hot goɓ tuwa' hay torɓok ma liwisna.