2 MULIYANA 6 - BIBALDA TA PELDETTA

Ceɗna vi goora vi sa ma jobta mara kep

¹ Gurona vi sa jobta di tam Elise ala: Humaŋu, liyn ma numa lakay hayam vok iraŋ tan kayni, nam hebiya.

² Tuɗay ta-ta kel Yordan, gigekaw kuɗaya ma ka gu-malla kalam kep kep, nala nay ma kot liy ma musta. Elise hot dit ala: Tuɗgiya.

³ Kep jarsiya di'e: Tapaŋay kuɗma'a. Nam hot dit ala: Nan naysa.

⁴ Nam kalay kuɗsiya may. Hay li ma nisi co kel niy-lumna Yordan, nisi ka guna.

⁵ Kep jarsiya, hay li ma nam ka ka gu-malla, ceɗn nig goloŋo. Nam ka siwel ala: Yayya! Ma-Vatɗina vanu, baŋalayn kayn nan slumi sliy kay sa'a!

⁶ Sana vi Lawn di'e: Nam nig kayn gal arige? Nam ɗekem kay liy ma ceɗn nig hayna. Ki kayn nala Elise ka gu-kuɓulusna, gum gaa hay liy namna, nala ceɗn duɓay kulo.

⁷ Bugolda nam di'e: Slaŋga goyo. Nam meɗ ɓalamu slum kulo'o may.

Sum sa Siriyan irsi duk goyo

⁸ Mulla vi Siriya duur ka jaram hiɗi sa Israyella, nam ŋra vunam hiɗi sa ŋulona vi sojena valamu. Nam disi kay liyn ma nam ma tun vokŋa valam hayna.

⁹ May sana vi Lawna gi sunda tam mulla vi Israyel ala: Naŋ ma li ŋali kay jik hay liyn tani, kay sum sa Siriyan ka co mol hayamu.

¹⁰ Nala mulla vi Israyel cuk sumun hay liy ma sana vi Lawn ɗekem kalamna, kay nisi ma sar liy namna. Van kayni may li sem kep ɦawaɗi, sem ma' ɦawaɗi kaw.

¹¹ Mulla vi Siriya muɗ ɦuyum kuɗ lawt kayni, nam yi sa sunda valamu, ka disi ala: Nigi may dan goy kay sa ma jaraya ma diram giy kuɗ mulla vi Israyelɗi kay mige?

¹² Kep jar sa sunda valamu hot dit ala: Sa mayɗi mulla vanu; may Elise ma jobta hay Israyel, sle ma naŋ ka dum kalaf hay liy ma buura vaŋ kaw dum tam mulla kayn mi namu.

¹³ Mulla di'e: Tuɗgi ɗuwgi liyn ma nam hayamna, kay nan ma cuk sumun kay vumu. Nisi mar labara tam mulla ala nam ka hay Dotan.

¹⁴ Nam cuk kulumayna, cuk keke-ma-duura hiɗi sumun kuɗum ŋolo kaw, nisi co hay henjeta, nisi ŋuy hoyok-ziyna.

¹⁵ Sa ma sunda vi Ma-Vatɗina fok kulo graw culum culum, nam kal goyo; ɗuw na kayni, hoyok-ziyn ka ŋuyi kay sumun cusl', hiɗi kulumayna hiɗi keke-ma-duura kaw. Ki kayn nala sa ma sunda vi sana vi Lawna di talamu: Hih! Mulanna, nay ma li linige?

¹⁶ Nam hot dita: Laŋ nar noŋɗi, kay sa ka hiɗi nayna ŋol suw sa ka hiɗi nisina.

¹⁷ Elise siɗaw Ma-Vatɗina, nam ka di ala: Ma-Vatɗina, malam iram goy malge, kay nam ma wi'e. Ma-Vatɗina malam iram goyo, nam wi hiɗiyta hobay hiɗi kulumayna, hiɗi keke-ma-duura ma tuwam zakay ku keŋ', ka ŋuyi kat Elise.

¹⁸ Sum sa Siriyan co goboy tam Elise. Ki kayn nala nam ka siɗaw tam Ma-Vatɗin ala: Ma-Vatɗina, sumun kayni naŋ ma duksi irsi goyo, Ma-Vatɗina duksi irsi goyo, kuɗ yoboy ma Elise dumna.

¹⁹ Elise di tisiya: Hagat tay tanɗi, hoyok-ziyn may tanɗi kaw, tapgiyay kuɗanu, nan min nargi tam sa ma nigi garamna. Nam kalsi ta-ta hay Samariya.

²⁰ Hay li ma nisi kal kulo hay Samariya, Elise di'e: Ma-Vatɗina, malaŋ ir sum nisin goyo kay nisi ma wi'e. Ma-Vatɗina malsi irsi goyo. Nisi wi kayni, nisi coy kulo hay Samariya.

²¹ Hay li ma mulla vi Israyel wisiya, nam di tam Elise: Nan ma calsi su? Nan ma calsi su bunu?

²² Elise hot dit ala: Sum sa naŋ yawsi daŋgay hiɗi kew-gaferaŋa vaŋu hiɗi ɓarawta vaŋu naŋ as calsi su? Vulsi fuwa hiɗi niyo, kay nisi ma ti'e, ci'e; bugolda nisi ma kal kat mulsina may.

²³ Mulla vi Israyel kot ti ma ŋolla kisiya, nisi ti'e ci'e, bugol kayni nam gisi irsiya, nisi kalay kat mulsina. Sojena vi sa Siriyana min hotay hay nagata vi Israyel loɗi.

Mayta li hay Samariya

²⁴ Bugol kayni Ben-Hadad mulla vi Siriya tok sojena valam yam tuwsi kaf, nam kaliya, ŋuy Samariya.

²⁵ Mayta ŋolda li hay Samariya, nisi ŋuy Samariya, ta-ta muɗ kayni, yam kuro ma kepna gusta valam ir gurjut sikel dok-glafandi. Gal ma fiɗina vi gay-gukŋa gus ir sikel vasl.

²⁶ Fat tara kep mulla vi Israyel ka tuɗ kulo kay gulmunna, cat kep ka siwel talam ala: Naŋ suɗan goy suɗge mulla vanu.

²⁷ Nam hot dita: La Ma-Vatɗin suɗ san goyɗi, nan kay tuwan suɗ san goy ɗawn hiɗi mige? ɗawn hiɗi mige? Hiɗi wa'a lebo hiɗi gulda-gulda su?

²⁸ Mulla hot joba' ala mayɗin mige? Na' hot dit ala: Cat zawn dan ala: Vulay goora vag aya, nay mutum vaydi, jifin ɗawni nay ma mutay goora vanu.

²⁹ Numa zal goora vanu, numa mutumu. Hay buurta ka'ta, nan ka da' ala vulay goora vag aya, nay mutayta. May na' ŋay goora va'awa goyo.

³⁰ Hay li ma mulla hum dita vi cat kayni, nam jet sligara valam goyo hay li ma nam ka tuɗ kulo kay gulmunna, sumun kaf wumu, nam ka hiɗi sligar-bolla cuki talamu.

³¹ Mulla di'e: Vaydi kayni, la nan ka yam Elise goora vi Safat goyɗi, Lawn ma ka kitat kanu hiɗi dikam kafge.

³² Hay na'ta kayni, Elise ka musi vo hay ziyna valamu, sa maariyana ka toki talamu. Mulla gi sa mara vokomu. May jew a sa nam cuksin co kayni, Elise di tam sa maariyana: Nigi ma wi ala, goora vi sa ma vat sumun goyna gi sa' ay tanu kay kaan yan goyo. Humgiya hay li ma sa ma sunda coyawana, nigi ma duk vun ziyna, nigi ma zutumis goy hiɗi vun-ziyna, mulamna kaw ka tuɗay bugolom lay.

³³ Hay li ma vunam bay vat tuwan kayni, sa ma sunda coy talam vatiya. Sa ma sunda ka di ala: Joo na'ta may kayni hay ɓam Ma-Vatɗin pa, nan cubum hay ɓam Ma-Vatɗina ɗawn meloge?