2 MULIYANA 3 - BIBALDA TA PELDETTA

Yoram mulla vi Israyel, duura hiɗi sa Mowabna

¹ Yoram goora vi Akab ti mulda kay sa Israyella hay Samariya. Kayni hay busata doogo yam glafandita vi Yosafat, mulla vi Yuda. Nam ti mulda ir busat doogo yam ma'.

² Nam li va ma joo'o kir Ma-Vatɗina, may ki bulum hiɗi sulum noŋ naɗi, kay lawayna vi Baal ma bulum kotomna nam ɦom gaa'a;

³ may nam kal tuwam hay sulukŋa vi Yerobowam, goora vi Nebat, ma kal sum sa Israyel hay sulukŋa, nam min ja jaram goy hiɗi sulukŋɗi.

⁴ Mesa mulla vi Mowab farayna valam ka ŋolo, hay busat kaf kayni nam wurak mulla vi Israyel hiɗi guro fok-dimin birim kis, fok-gamalan birim kis, hiɗi ɗuŋus ma talamna lay.

⁵ Hay mitta vi Akab kayni, mulla vi Mowab fok kulo'o kat mulla vi Israyel.

⁶ Mulla Yoram kalay goy hay Samariya pa, nam li ŋaɓta vi sum sa Israyel goyo.

⁷ Nam fok goyo kay tuɗ vun duura, nam gi sunda tam Yosafat mulla vi Yuda ala: Mulla vi Mowab foki kulo'o katanu; naŋ min tapay hiɗi nanu kay tuɗ dur Mowab su? Yosafat hot dita: Nan min tuɗisa. Nan hiɗi naŋ kepe, sumuna van si sumuna vaŋu, kulumayna van mi kulumayna vaŋu kaw.

⁸ Nam hot dumu: Nay ma jik hay hagat tarige? Yoram di'e: Hay hagata vi fulda vi Edom.

⁹ Mulla vi Israyel hiɗi mulla vi Yuda hiɗi mulla vi Edom kaf kaliya; bugol nisi tuɗ ir buur siɗiya tuɗna, niy ma sojena hiɗi kulumay ma kuɗsin ci'e may loɗi.

¹⁰ Ki kayn nala mulla vi Israyel di'e: Yayya! Muliyan sa ɦidina Ma-Vatɗin yisi ay goy kayni kay vulsi hay ɓam sum sa Mowabna.

¹¹ May Yosafat di'e: Sa ma jobta vi Ma-Vatɗina ma nay as job Lawn vunamu may tan kep noŋɗi su? Kep jar sa sunda vi mulla vi Israyel hot dita: Elise goora vi Safat, namu ma ay sun Eliyasna ka tani.

¹² Yosafat di'e: Yoboyna vi Ma-Vatɗin ka hay vunamu. Mulla vi Israyel hiɗi Yosafat hiɗi mulla vi Edom kalay talamu.

¹³ Elise di tam mulla vi Israyel: Va ma ka jaran nan hiɗi naŋu mi mige? Tuɗaŋ garaŋ sa jobta vi buŋu hiɗi sa jobta vi suŋu. May mulla vi Israyel dumu: A'a, kay muliyan sa ɦidin lakŋi Ma-Vatɗin yisi ay goy kayni, kay vulsi hay ɓam sum sa Mowabna.

¹⁴ Elise di'e: Ma-Vatɗina vi vok-ma-duura ma nan sunumna ka iriya, nan tun ŋalda van ɗawni kay Yosafat mulla vi Yuda, la li kaŋ naŋu, nan as tun ŋalda vanɗi lay, ɗuw kaŋ noŋ ne'ɗi lay.

¹⁵ Wulin kayni nigi maran sa ma ci dil kepe, hay li ma sa ma ci dilla tun caw liwa, donota vi Ma-Vatɗin cuk kay Elise.

¹⁶ Nam di'e: Ma-Vatɗina di ala: Jugoɗgi zul gaa hay liy ma beɗn tani! Jugoɗgi zulu!

¹⁷ Kay Ma-Vatɗin di ala: Liy ma beɗn tani niyn hobom ɗawni bay nigi wi simeɗn biwa, bay nigi wi niyn si'e kaw; nigi ma ci niyo, nigiya hiɗi farayna vigiya kaw.

¹⁸ May kayni mi va ma gooro kir Ma-Vatɗina, kay nam ma vul sum sa Mowabna hay ɓigiya.

¹⁹ hoyok-ziy ma donona hiɗi hoyok-ziy ma ŋaana nigi ma tom gaa kafe, nigi ma ka guna visi ma ŋaan gaa kafe, nigi ma tos kaara visi goy kafe, sinena visi ma ŋaana nigi ma ɓulakam goy hiɗi goorhoyon kafe.

²⁰ Co hay graw culumta hay li ma sumun li vulda kayni, niyn coy goy hay hagata vi Edom pa, nagat hob hiɗi niyna may.

²¹ Hay li ma sum sa Mowabna hum ala muliyan ka tuɗis dursiya kayni, sum sa busata visi asay kay ziy sle-ma-duura hiɗi sa busata visi suwna kaf nisi yisiya, nisi lak goy hay jaara vi nagata.

²² Nisi yaw kulo graw culum culum, hay li ma sum sa Mowabna wi wilena vi fatta kay niyna, nisi ɗuw niy ma voksin kayni nam cori slaw keŋ' ki busuwn nala.

²³ Nisi di'e: Kayn mi busuwu, ma fi ɗawni muliyan tuwsi calay jar-tuwsi hiɗi kew-gaferaŋa, wulin kayni, nigi sa Mowabna, tuɗay vurumsiya.

²⁴ Nisi kaliya kay mok kaŋŋa vi sa Israyella. May sum sa Israyella fokay kulo'o cal sa Mowabna, sum sa Mowabna mun voksi jaŋi. Nisi cuk kulo hay nagata, nisi cal sum sa Mowabna.

²⁵ Nisi to hoyok-ziyn gaa'a, nisi kaf cuk goorhoyon hay sine ma ŋaana, hobom cep-cep', nisi tos kaar noŋ kafe, nisi ka guway ma ŋaan gaa'a; sum sa gi hiɗi tiwlekŋa kaw, ŋuy kir-Hareset, ci sum sa hayna, nisi hinim kulo kayn mi hiɗiyna tuta.

²⁶ Hay li ma mulla vi Mowab wi ala donota vi segen suwumu, nam yaw sum sa wi cal kew-gaferaŋa kis-siɗiya, tun caw hulot baŋa'a kay na cal mul ma Edomna; may nisi fi baŋa noŋɗi.

²⁷ Ki kayn nala nam sli goora valam ma vuɗi jewna, ma min ti mulda hay baŋalamna, nam burum kulo kay gulmunna, ŋalam goy ɗifini. ɦuyumda ŋolda kal hay dik sa Israyella, nisi vi tuwsi goy tam mul ma Mowabna, hot hay nagata visiya.