2 MULIYANA 25 - BIBALDA TA PELDETTA

¹ Co hay buurta doogota vi til ma doogona vi busata zleeŋeta vi mulda vi Sedekiyas kayni, Nebukadnesar mul ma Babilonna co hiɗi sojena valam kaf, nisi mok Yerusalem; nam vi guɗukŋa valam goy vok Yerusalem, ŋuy zlaɓn ta' noŋ kafe.

² Nam ŋuy hoyok-ziyna ta-ta co hay busata doogo yam kepta vi mulla Sedekiyas.

³ Co hay buurta zleeŋeta vi tilla kayni, mayt li dono'o hay hoyok-ziyna, fu ma sum sa hay nagat tumna mayɗi.

⁴ Ki kayn nala sumun co ir gulmunna; mulla pira hay henjeta, sum sa wi duura pir jaŋi hay henjeta, nisi jik hay hagata vi vun-galana, jar gulmun ma ma'na, goboy hiɗi jardeŋŋa vi mulla, kayni hay liy ma hoyok-ziyna ka ŋuyi kay sum sa Kaldeena. Sum sa mun jaŋŋa sla' ti hagata ta kal hay fulda.

⁵ May sojena vi sa Kaldeena jaŋ kuɗ mulla, nisi fum hay fulda vi Yeriko, sojena valam sa kuɗumna mun goy talam jaŋi.

⁶ Nisi vi mulla, tuɗum kulo kat mulla vi Babilon hay Ribla; nisi ka kitat kalamu.

⁷ Nisi ŋat gurona vi Sedekiyas goyo hay li ma nam ka wisi hiɗi iramu; bugol kayni nisi co ir Sedekiyas goyo, nisi junum hiɗi jaɓna ma kawayna, nisi kalam kulo'o hay Babilon may.

Sum sa hay nagata vi Yuda yaway goy gorvo'o

⁸ Hay buurta siɗiyata vi til ma vaslna, kayni ti busata ta doogo yam zleeŋeta vi mulda vi Nebukadnesar, mulla vi Babilon, Nebuzaradan, ma ŋolla vi soje sa ŋom mulla, ma sunda vi mulla, nam kal kulo'o hay Yerusalem.

⁹ Nam ŋal ziyda vi Ma-Vatɗin goyo, ŋal ziyda vi mulla goyo, nam ŋal ziy ma hay Yerusalemna goy kaf kaw, ziy ma ir ŋaana nam ŋalam goy kafe.

¹⁰ Sojena vi Kaldeen kaf sa ay tapay kuɗ ma ŋolla vi soje sa ŋom mulla, nisi ɦo gulmun ma ŋuyi tam Yerusalemna gaa kafe.

¹¹ Nebuzaradan ma ŋolla vi sa ŋom mulla, yaw sum sa ay hini hay hoyok-ziyn kafe nam kalsi gorvo'o, hiɗi sa vul tuwsi mi mulla vi Babilon kaw, hiɗi dir sumun ma hinin kaw.

¹² Hiɗi kayni kaf, sara sa haw co'-co' hay nagatna, Nebuzaradan hinsi kulo hay hoyok-ziyna kay nisi ma pi gulda-guldana, kay zum kaw.

¹³ Dolla ma kawayna ma ka hay ziyda vi Ma-Vatɗina sum sa Kaldeen kusum gaa'a, cawam ma ini gaana, ŋarak ma kawayna ma ka hay ziyda vi Ma-Vatɗina kaw nisi tom goyo, kawayna nisi kalam hay Babilon.

¹⁴ Nisi yaw ganuna, pella, kewna, tasana hiɗi jakŋa ma kawayna ma li lop hiɗi namna kaf.

¹⁵ Ma ŋolla vi sojena hot yaw ganuna hiɗi kaway-ma-cina, slen ma koti hiɗi ora, ma hiɗi dooron kaw,

¹⁶ dolla ma ma'na, ŋarak ma muzna, hiɗi diram ma yori gaana, ma Salomon kotomis hay ziyda vi Ma-Vatɗina, jak namna ma kawayn kaf kayni nekka valam sa may wa'ɗi.

¹⁷ Dol kep kayni, fiyokka valam ta kulot as ir goldoŋ doogo yam glafandi, yalam ma dilari kulona mi kawaya, fiyokka valam ir goldoŋ ɦidi, kulo kat yalam ma dilarin kayni, zigew ma ciliyna hiɗi sle ma moki kolo-kolona, kaf koti hiɗi kawayna; dolla ma ma'na ma hiɗi zigewn ciliy kulo kalamna ay ki kayn nala kaw.

¹⁸ Ma ŋolla vi sojena vi Seraya, mul ŋol ma-ɗifinna, Sofoniya mul-ma-ɗifinna ma ma'na, hiɗi sum sa hiɗi sa ŋom vun-galana.

¹⁹ Hay hoyok-ziyn kayn nam vi sa ma patayn kepe, ma sum sa duura ka gaa kuɗ gaŋeraŋa valamu, sum sara vasl jar sum sa vul gatta mi mulla, sa nisi fisi kulo hay hoyok-ziyna, sa ma ɗo slena vi ma ŋolla vi sojena, ma lopna vuli hay ɓalamu kay yaw sumun hay duura, hiɗi sumun dok-karkiya jar sum sa hay nagatna sa ka kulo hay hoyok-ziyna.

²⁰ Nebuzaradan ma ŋolla vi sojen yawsiya, tuɗsi kat mulla vi Babilon hay Ribla.

²¹ Mul ma Babilonna calsiya, nam cisi goy mati hay Ribla, hay nagata vi Hamat.

²² Ki kayn nala sumuna vi Yuda kalay gorvo'o, goy gine hiɗi nagata visiya. Nala dir sum sa hin hay nagat Yudana Nebukadnesar mul ma Babilonna laksi gaa kuɗ gaŋeraŋa vi Gedaliya, goora vi Ahikam, goora vi Skafan.

²³ Hay li ma sa ŋulona vi vok-ma-duura kaf hum kayni, nisi hiɗi sumuna visi kaw, hay li ma nisi hum ala mul ma Babilonna tun Gedaliya Guverner kay nagata, nisi kalay kat Gedaliya hay Mispa: Nisi kayni Ismayel, goora vi Netaniya, Yohanan goora vi Kareyak, Seraya goora vi Tanhumet, goora vi Netofa, hiɗi Yaazaniya goora vi sa ma Maakatiyena, nisi hiɗi sumuna visi kaw,

²⁴ Gedaliya yi va kalam voksiya, voksi nisi lay vok sumuna visi lay, nam ka disi ala: Nigi ma li nari kay sa sunda vi sa kaldeena noŋɗi, lakgi hay nagata, sungi mul ma Babilonna, nigi ɗawn ma lak sleɗe.

²⁵ May hay til ma siɗiyana, Ismayel goora vi Netaniya, goora vi Elisama, ma hay jafna vi muldana, nam co'o, sumun kuɗum doogo, nisi cal Gedaliya cum goyo, sa Yudiyana hiɗi sa Kaldeena sa ay hiɗi namu hay Mispa kaw nisi calsi goy kafe.

²⁶ Ki kayn nala sumun kaf, tun caw tam sa gurayn pa ta-ta tam sa ŋulona, sa ŋulona vi vok-ma-duura, kaf yawaya kalay hay Egipte, kay nisi ka li nari kay sa Kaldeena.

²⁷ Co hay busata dok-ɦidi yam siɗiyata ta nisi vi Yoyakin mulla vi Yuda kayni, co hay buurta dok-ma' yam siɗiyata vi til ma doogo yam ma'na, Evil-Merodak, mul ma Babilonna, hot sli yam Yoyakin mulla vi Yuda kulo'o, kayni hay busata valam ta jewta hay mulda. Nam kalamay goy hay daŋgayna.

²⁸ Nam lawam hiɗi ŋaa'a, nam tun zlamda-mulda valamu kulo kay zlamda-mulda vi muliyan kaf sa ay hiɗi namu hay Babilon.

²⁹ Sligara valam ma daŋgayna nam fokom goy talamu, Yoyakin ti kayn dok-dok kay tablena valamu ta-ta tam mitta valamu.

³⁰ Hay buur ma nam ka irin kaf kayni mulla ka vulum sle ma tina hay buurta buurta kaf.