2 MULIYANA 23 - BIBALDA TA PELDETTA

Yosiyas to lawayn ma waan goyo

¹ Mulla Yosiyas tok sum sa maariyana vi Yuda hiɗi Yerusalem talam kafe.

² Bugol kayni nam kal kalaf hay ziyda vi Ma-Vatɗina, hiɗi sum sa hay jafna vi Yuda kaf, hiɗi sum sa hay Yerusalem kaf, muliyan-sa-ɗifinna, sa jobta-Lawna, hiɗi sumun kaf, tun caw tam sa gurayn pa ta-ta tam sa ŋulona, yoboyn ma hay ɗerwelda vi bonota ma fum hay Tempella nam jaŋam goy voksi kafe.

³ Mulla col kulo kay jaŋgalla, nam jun bonota vok ir Ma-Vatɗina, yi va kalamu kay tuɗ hay hagata vi Ma-Vatɗina, kay li kuɗ sle ma nam dum kafna hiɗi gatta valamu, hiɗi dikam kaf, hiɗi ciwta valam kaf, kay li kuɗ yoboyna vi bonota na'ta ta ka ɗoy hay ɗerwelda. Sumun kaf kal hay bonota na'ta.

⁴ Mulla vul hagat tam Hilkiya mul ŋol ma-ɗifinna, tam muliyan-sa-ɗifinna sa gurayn kaw, tam sa ŋom vun-ziyna kaw, kay jakŋa ma kalaf hay Tempella vi Ma-Vatɗin kafna, ma nisi kotom mi Baal hiɗi Astarte hiɗi slen ma dukalawn kafna nisi ma yawamay goy jiya; nisi yawamay goyo, nam ŋalam goy gine hiɗi Yerusalem, hay liyna vi Sedron, yaw butuw-kuna valamu, kalam hay Betel.

⁵ Muliyan-sa-ɗifinna vi lawayn waana, sa muliyana vi Yuda tunsiya kay ŋal urdina kulo hay liyn ma ɗiŋiriŋŋa, hay hoyok-ziyna vi Yuda kaf, goy gal Yerusalem kaf, nam digiɗsi goy kafe, hiɗi nisi sa ŋal urdin tam Baal, tam fatta, tam tilla, tam mislekŋa, hiɗi sle ma hay dukalawn kaf.

⁶ Lawayn Astarte nam slum goy hay ziyna vi Ma-Vatɗina, nam tuɗum goy gine'e hiɗi Yerusalem, hay ɦoora vi Sedron; nam ŋalam goyo hay ɦoora vi Sedron, muɗum goy butuwu, nam ko butuwna hay zul ma pi sumun hayamna.

⁷ Ziyna vi sum sa li tuwsi viyuwna, ma ka hay ziyda vi Ma-Vatɗina, ma boyn ka cil sligara vi Astarte kalaf hayamna nam tom goyo.

⁸ Muliyan-sa-ɗifinna hay hoyok-ziyna vi Yuda kaf nam garsiyaya; liyn ma kulo ɗiŋiriŋŋa ma muliyan-sa-ɗifinna ŋal urdin hayamna nam tugosomu, fokay hay Geba pa ta-ta hay Ber-Seba; liyn ma ɗiŋiriŋŋa ma hay vun-galana nam muɗum liwisi, nam ma ka coli hay vun-galana vi Yosuwa, sa ma ŋolla vi hoyok-ziyna, hiɗi nam ma ka hay gal ma gulla vi vun-galana vi hoyok-ziyna.

⁹ May hiɗi kayni kaw, muliyan-sa-ɗifinna vi liyn ma ɗiŋiriŋŋa may tuɗ kat giwin-ma-ɗifinna vi Ma-Vatɗina hay Yerusalemɗi, may nisi ti fun-bay-kufna kayni jar ɓosiyosina.

¹⁰ Mulla tugos Tofet hay lokŋa vi gurona vi Hinnom, kay a sa ma ŋal goora lebo goota valam hay kuta hay semda vi Molok loɗi.

¹¹ Kulumayna ma muliyana vi Yuda vulum goy ɗifin mi fatta, ma ka goboy hiɗi ziyda vi Netan-Melek ma patayna, ma goy gal Tempella, nam yawam goy kafe; keke-ma-duura vi fatta nam ŋalam goy hay kut kafe.

¹² Giwin-ma-ɗifinna ma ka kulo yam ziyda-kulota vi Ahas, ma muliyana vi Yuda kotomna nam tom goyo, giwin-ma-ɗifinna ma Manase kotom kalaf hay wur-daŋ ma ma'na vi ziyda vi Ma-Vatɗina kaw nam tom goyo; bugol nam tom goy tona, yawam goy yaw' kaw, nam cuk butuwna hay niy-ma-riŋŋa vi Sedron.

¹³ Liyn ma ɗiŋiriŋŋa ma ka ɗiger vok Yerusalemna, hay gal ma jufna vi hiɗiyta vi ɓulak-goyta, ma Salomon mulla vi Israyel kotom mi Astarte, liwista vi sa Sidonna, mi Kemos, liwista vi sa Mowabna, mi Milkom, liwista vi gurona vi Amon kaw, nam tugosom kafe.

¹⁴ Sle ma sli tuw-sana ma ceɗayna nam tom goyo, lawayn waana nam ɦom gaa'a, nam hob zok sumuna hay baŋal liy ma nam ini hayam jewna.

¹⁵ Giwin-ma-ɗifinna ma ka hay Betel, hiɗi liyn ma ɗiŋiriŋŋa ma Nebat goora vi Yerobowam kotomna, ma Yerobowam kal sum sa Israyel hay sulukŋa hiɗi namna kaw nam tom gaa'a, liyn ma kulo ɗiŋiriŋŋa nam ŋalam goyo, muɗum goy butuw-kuwa, lawayn ma waana ma coli hayna nam ŋalam goyo kaw.

¹⁶ Yosiyas muɗ iramu, nam wi zulla ma ka kay hiɗiyna, nam gi sunda kay yaw zok ma ka hay zulla, nam ŋalam kulo kay giwin-ma-ɗifinna, muɗ giwin-ma-ɗifinna liwis hiɗi namu, kuɗ yoboyn ma Ma-Vatɗin dum hiɗi vun sa ma jobta ma di yoboy namna.

¹⁷ Nam di'e: Yam-usta ta nan wa' tan zawni vi gige? Sum sa hay hoyok-ziyna hotom dit ala: Kayni ti yam-usta vi sana vi Lawna, namu ma may hay Yuda pa, namu mi ma siwel kat giwin-ma-ɗifinna vi Betel kay slen ma naŋ hobom vunam tan lakŋi.

¹⁸ Mulla di'e: Hinimu; nigi ma geɗem zokomɗi, nisi hinim zokomu hiɗi zok sa ma jobta ma may hay Samariya pana kaw.

¹⁹ Ziyna kaf ma kulo hay liyn ma ɗiŋiriŋŋa, ma ka hay hoyok-ziyna vi Samariya kafna, ma muliyana vi Israyel kotomu kay ɓulak dik Ma-Vatɗina, nam ɦom gaa kafe, nam li tam ziy namna ŋray ca ki nam li hay Betel nala kaw.

²⁰ Muliyan-sa-ɗifinna vi liyn ma ɗiŋiriŋŋa sa ay hay liyn kayni, nam lisi ɗifini kulo kay giwin-ma-ɗifinna namna, nam ŋal zok sumun kulo kalamu. Bugol kayni nam hotay hay Yerusalem.

Yuldeta vi Paskata. Mitta vi Yosiyas

²¹ Mulla vul dita tam sumun kaf ala: Ligi yuldeta vi Paskata, kay subur sem Ma-Vatɗina, Lawna vigiya, ki ɗoy hay ɗerwelda vi bonota nala.

²² Kay Paskat tara'a ki kayn nala bay li tuwa, tun caway tam liyn ma sa kitana ti mulda kay sa Israyel pa, yuldet tara'a bay li hay liyna vi muliyana vi Israyel hiɗi Yuda tuwa.

²³ Paskata na'ta nisi la' hay Yerusalem kay subur sem Ma-Vatɗina kayni hay busata doogo yam glafandita vi Yosiyas tuwa.

²⁴ Suw kayni lo, Yosiyas ci goyo sum sa job kuɗ ŋusiyana hiɗi nisi sa di slen ma voksina, hiɗi terafimna, hiɗi lawayn waana, hiɗi liwista kaf ta ka hay nagata vi Yuda kaf hiɗi Yerusalem, kay li kuɗ yoboyna vi gatta, ma ka ɗoya hay ɗerwella ma mul-ma-ɗifinna Hilkiya fum hay ziyna vi Ma-Vatɗina.

²⁵ Jew Yosiyas kayni, mul mara'a kep kaw ma hotay tam Ma-Vatɗina hiɗi dikam kaf, hiɗi ciwta valam kaf, hiɗi donota valam kaf, kuɗ gatta vi Musus kaf, kep kaw mayɗi, bugolom nam kaw, mul mara ma ki kayn nala mayɗi.

²⁶ May hiɗi kayni kaf, Ma-Vatɗina dikam min sleɗ kay ɦiyda ŋolda tam jafna vi Yudaɗi, kuɗ sle ma Manase li'e kay muɗum ɦiya.

²⁷ Ma-Vatɗina hot di'e: Nan min yaw jafna vi Yuda goy vok iranu ki nan yaw jafna vi Israyel goy nala, hoyok-ziyn Yerusalem ma nan vilekemna, ma nan di ala semda van ma li tuni hayana nan ma noyom goyo.

²⁸ Caw lopna vi Yosiyas ma hinina, slen ma nam lum kafna, kayni ka ɗoy hay ɗerwelda vi Labar-Ma-Liyna vi muliyana vi Yuda.

²⁹ Hay liyna valam kayni, Farawn Neko mul ma Egiptena co'o kay dur mul ma Asiriyana, hay gal niy-lumna Eufrata, mulla Yosiyas kalay kay durumu; hay li ma mulla Farawn iram wumu, nam cumu, kayni hay Megiddo.

³⁰ Sa sunda valam slum tuwamu, burum hay keke-ma-duura; hay Megiddo pa nisi kalam hay Yerusalem, nisi pum hay zulda valamu may. Sum sa hay nagatna vi Yowahaz goora vi Yosiyas, nisi ɦok mul kalamu, tunum mulu hay baŋal bulumu.

Yowahaz, mulla vi Yuda

³¹ Hay li ma Yowahaz tun mul kayni busata valam asay dok-ma' yam ɦidi, nam ti mulda ir til ɦidi hay Yerusalem, sulum ya' Hamutal goota vi Yeremiyas ma Libnana.

³² Nam li slen ma joo'o kir Ma-Vatɗina, ŋray ca ki sumiyam li nala.

³³ Farawn Neko ɓalam hiɗi jaɓna hay Ribla, hay nagata vi Hamat, kay nam ma ti mul hay Yerusalem loɗi. Nam tun taara kay sum sa hay nagatna ir doorota talente kis, or ir talente kep may.

³⁴ Farawn Neko tun Eliyakim goora vi Yosiyas mulu hay baŋal bulumu Yosiyas, nam jokom selem ala Yoyakim. Nam vi Yowahaz, kalam hay Egipte, nam mit ɗawni.

³⁵ Yoyakim vul doorota hiɗi or mi Farawn; may nam tun taara kay sumuna kay nisi ma vul sle namna, kuɗ sle ma Farawn dumu, nam tunsi wurak kisi kuɗ donota vi gigekaw.

Yoyakim, mulla vi Yuda

³⁶ Hay li ma Yoyakim tun mul kayni busata valam asay dok-ma' yam vasl. Nam ti mulda ir busat doogo yam kep hay Yerusalem. Sulum ya' ala Zebudda, goota vi Pedaya ma Rumana.

³⁷ Nam li slen ma joona vok ir Ma-Vatɗina, ŋray ca ki sumiyam li nala.