2 MULIYANA 1 - BIBALDA TA PELDETTA

MULIYANA VI YUDA HIƊI MULIYANA VI ISRAYEL Ahasiya mulla vi Israyel li moyo, nam cap mita

¹ Sum sa Mowabna yaw kulo'o kat sa Israyella bugol mitta vi Akab.

² Fat tara kep Ahasiya nigay kulo hay ir kaway-ciliyna vi ziyda valam ta kulota pa hay Samariya, nam cap li moyo. Nam cuk sa sunda, ka di tisi ala: Tuɗgi kuɗ Baal-Zebub Lawna vi Ekron jobom tige, nan as yer goy kay moyna van su?

³ May sunda-wuralawna vi Ma-Vatɗina di tam Eliyas ma Tikbina ala: Fokaŋ kulo'o, tuɗaŋ ŋaf ir sa sunda vi mul ma Samariyana, naŋ ma disi ala: Nigi tuɗ job kuɗ Baal-Zebub lawayna vi Ekron kayn kay lawn mara may hay Israyelɗit su?

⁴ Ki kayn nala Ma-Vatɗina di'e: Ezekiyas ma fok kulo kay va ma buura valamɗi, nam ma cap mita. Nala Eliyas kalay malamu.

⁵ Sa sunda hotay kat Ahasiya. Nam ka jobsi ala nigi hotay kay mige?

⁶ Nisi ka dum ala sa mara kep co ŋafma irma'a, nam duma ala: Hotgi kat mulla ma cukgiyayna, digit ala, Ma-Vatɗin di'e: Naŋ cuk sumun kay tuɗ job kuɗ Baal-Zebub lawayna vi Ekron kayni, Lawn may hay Israyelɗi su? Ki kayn nala naŋ ma fok kulo kay va ma buura vaŋɗi, naŋ ma cap mita.

⁷ Ahasiya di tisiya: Sa namna ma ŋafgi irgiya kay kus yoboy namna hiɗi nigin kayni, jifna valam ir nanige?

⁸ Nisi hotom dita: San kayni cuki talam mi bakŋa, kanti ma furamna mi ɗigiya kaw. Ahasiya di'e: Kayni mi Eliyas ma Tikbina.

⁹ Nam gi soje ma ŋolla ma sumun kalam dok-vasln talamu, hiɗi sum sa dok-vasln kuɗum kaw. San kayni kalay kat Eliyas. Eliyas ka musi kulo kay sin-hiɗiyta, nam ka di talam ala: Sana vi Lawna, mulla di ay ala naŋ naysa.

¹⁰ Eliyas hot dit tam sa ŋol ma sojen kalam dok-vasln ala: La nan mi sana vi Lawna, kut ma jikay kulo hay wuralawn pa kay ŋalaŋ goyo, naŋ hiɗi sum sa kuɗaŋ dok-vaslna. Kut jikay kulo hay wuralawn pa ŋalam goyo, nam hiɗi sum sa kuɗum dok-vaslna.

¹¹ Ahasiya gi sa mara ma sojen kalam dok-vaslna talam lo, hiɗi sum sa dok-vasln kuɗumu. Sa namna sli ditiya di tam Eliyas ala: Sana vi Lawna, mulla di ala naŋ tuɗis gosoyo.

¹² Eliyas hotom dit ala la nan mi sana vi Lawna, kut ma jikay kulo hay wuralawn pa, ŋalaŋ goyo, naŋ hiɗi sumuna vaŋ sa dok-vaslna! nala kut jikay kulo wuralawn pa, na' ŋalam goyo, namu hiɗi sumuna valam sa dok-vaslna.

¹³ Ahasiya hot gi sa ŋolla mara'a ma sojen kalam dok-vaslna lo hiɗi sumuna valam sa dok-vaslna. Sa ŋolla namna ma nam gum sem ma ɦidina kaliya; hay li ma nam coowa tam Eliyas, nam girif gaa vok Eliyas, ka dum hiɗi giɗel-delta ala: Sana vi Lawna, nan siɗawaŋ ala naŋ hiɗi sa sunda vaŋ sa kuɗan dok-vaslna lakŋi irita vuma li kiraŋ jibet lige.

¹⁴ Wulin kayni kut jikay kulo hay wuralawn pa, sa ŋulona sa co jewan ma' hiɗi sojen kisi dok-vasl dok-vaslna na' ŋalsi goy kafe, may wulin kayni, irita van ma li kiraŋ jibet lige.

¹⁵ Sunda-wuralawna vi Ma-Vatɗina di tam Eliyas: Tapaŋ kuɗumu, laŋ nar kalam noŋ ne'ɗi. Eliyas fokay kulo'o, tapay kuɗumu kay tuɗ tam mulla.

¹⁶ Eliyas di tam Ahasiya: Humaŋ dita vi Ma-Vatɗina: Kay naŋ cuk sumun kay job kuɗ Baal-Zebub lawayna vi Ekron, ki Lawn ma sa as job kuɗum hay Israyel may noŋɗi nala, naŋ as fok kulo kay va ma buura vaŋ loɗi, naŋ ma mita.

¹⁷ Ahasiya mitiya, kuɗ yoboy ma Ma-Vatɗin dum hiɗi vun Eliyasna. Yoram ti mulda hay baŋalamu, kayni hay busata ma'ta vi Yoram, goora vi Yosafat, mulla vi Yuda; kay nam may fi goor noŋɗi.

¹⁸ Caw lopna vi Ahasiya ma hinina, slen ma nam lumna, kayni ka ɗoy hay ɗerwelda vi Labar-Ma-Liyna vi muliyana vi Israyel.