1 YOHANA 4 - BIBALDA TA PELDETTA

Sa hat hatta bay-gasita

¹ Nigi sa hayan kigina, vigi kuɗ ŋusiyan kafɗi; may wakgi ŋusiyana, la nam may vi Lawna su, kay sa jobta-Lawna sa bay-gasina dusiyay goy kay nagata.

² hiɗi van kayni nigi ma wi Ŋusta vi Lawna: ŋusta kaf ta li di-goyt ala Yesu Kristu ma hay sliw-tuwna, na' may vi Lawna;

³ ŋusiyan kaf ma li di-goyt kay Yesuɗina, nam may vi Lawnɗi, kayni ŋusta vi anti-kristu, ma nigi hum kalam ala nam ka ma'a, nam ka hay nagat wulini.

⁴ Nigiya, gurona vanu, nigi sa vi Lawna, nigi kolawa kay sa jobta sa bay-gasina, kay nam ma haygina ŋol suw nam ma ka hay sa nagatna.

⁵ Nisiya, nisi vi nagata; kay mige yoboyna visiya, may goy vi nagata pa, sa nagatna humsiya kaw.

⁶ Naya, nay vi Lawna, gigekaw ma wi Lawna nam humaya; sa ma may vi Lawnɗina nam humayɗi: Kuɗ kayni nay wi ŋusta vi gasita hiɗi ŋusta vi sinda.

Lawna mi minda. Minay Lawna, minay ɓosiyayna kaw

⁷ Nigi sa hayan kigina, minaygi tuway jar-tuwaya; kay minda may vi Lawn pa, sa ma ka hiɗi minda vuɗum mi Lawna, nam wi Lawna kaw.

⁸ sa ma may hiɗi mindaɗi nam may vi Lawnɗi, kay Lawna mi minda.

⁹ Ti-kamda vi Lawna ɗek tuwa' goy haraŋ taya hay li ma nam gi goora valam ma tuɗoŋ kepna Yesu Kristu ay hay nagata, kay nay ma lak iriya hay namu.

¹⁰ Ti-kamda na'ta kayni may ala nay min Lawna jeweɗi, may nam minay nay jewe, nam gi goora valam ay ki goor ɦu-dimi ma poora nala kay sulukŋa vaya.

¹¹ Sa hayan kigina, la Lawn minayawa ŋol nala, nay kaw, ma minay tuway jar-tuwaya.

¹² sa bay wi Lawn tuwa noŋo. La nay minay tuway jar-tuwaya, Lawna ma mus hayaya, ti-kamda valam ma hayayna nagawa kaw.

¹³ Kuɗ kayni nay wi ala nay ka lakay hay namu, nam kaw musi hayaya: Kay nam vulay Ŋusta valamawa.

¹⁴ Naya, nay wumu, nay li di-goyta kaw ala Bumna gi Goora valam ay gaa kay nagata kay suɗ sa nagatna.

¹⁵ Gigekaw ma di goy ala Yesu mi Goora vi Lawna, Lawna mus hayamu, nam mus hay Lawna kaw.

¹⁶ Naya, nay wi ti-kamda ta Lawna la' kaytawa, nay vaawa kaw. Lawna mi minda, sa ma mus hay ti-kamda mus hay Lawna kaw, Lawna hay namu kaw.

¹⁷ Kayni mi va ma ɗek ala ti-kamda nagawa hayaya, kay nay ma fi teŋ-irta hay fatta fi kitata: Kay ki nam ka nala, nay ka nala hay nagat tani kaw.

¹⁸ Narta may hay ti-kamdaɗi, ti-kamda ta gasita ci narta goyo, kay narta mar kitat kuɗa'a, may sa ma li nari nam asay hiɗi mindaɗi.

¹⁹ May naya, nay minimu kay nam minay jewe.

²⁰ La san di ala nam min Lawna, may nam ka gawt tam ɓasulumna ni, nam mi sa ma sinda, kay la san min ɓasulum ma nam wumnaɗi, nam as min Lawna ma nam bay wumnaɗi.

²¹ Vun-ma-gatna kayni nay fumi kalam pa ala: Sa ma min Lawna min ɓasulumna kaw.