1 TIMOTEWUS 4 - BIBALDA TA PELDETTA

Gatta tam Timotewus

¹ May Ŋusta di goy haraŋ ala hay liyn ma cawna sara'a ma nig gaa'a hin vida goyo, kay tap kuɗ ŋusiyan ma ɗutna hiɗi hatta vi fuliyana,

² Kuɗ mileta vi sum sa hat sinda tam sumuna, sa tumi hiɗi kuta-slawta hay tap-wida visiya.

³ nisi tel kay sli cata, tel tuwsi kay tina, slen ma Lawna lumu kay nisi sa viyna sa wi gasita ma tumu hiɗi gi-deɓta.

⁴ Kay slen ma Lawn kotom kafna nam ŋaa'a, va ma san as kay noyom goy mayɗi, la san vum hiɗi gi-deɓta.

⁵ Kay nam muɗi peldete hiɗi yoboyna vi Lawna hiɗi siɗawta.

⁶ La naŋ hat slen kayni mi bosiyayna, naŋ mi sunda ma ŋaana vi Kristu Yesu, hobay hiɗi yoboyna vi vida hiɗi hatta ta ŋaata ta naŋ hata'ay hat'.

⁷ May yoboy ma waana hiɗi ɗetna vi boy sa maariyana naŋ ma noyom goyo.

⁸ May hat tuwaŋu kay li nar kuɗ Lawna. Kay liwna gut hay va neeɗa ɦawa, may vida kuɗ Lawna li ŋaa'a kay slen pete, na'a deŋ taya irita ta wulinta hiɗi irita ta min ma'a.

⁹ Kayni mi yoboyn ma gasiya, ma nagaya kay san vumu.

¹⁰ nay li lopo, nay ŋafa kaw, kay nay tun vida vaya hay Lawna ma irina, namu mi ma su'da vi sumun kaf, suw pet sa viyna.

¹¹ kayni mi slen ma naŋ ma gatsiya, hatsiya kaw.

¹² Hin sa ɗuwaŋ birek-cek hay joriyota vaŋɗi, may naŋ ma lin mi sa ma sum sa viyna sli kuɗaŋu hay yoboyna, hay poyta, hay minda, hay vida, hay peldetta kaw.

¹³ Vul tuwaŋ dono tam jaŋga yoboyna, tam gatta tam hatta kaw ta-ta hay liyn ma nan ma coysa.

¹⁴ Vulda-slugota ta ka hayaŋu naŋ ma hina' muɗ goy purɗi, na'a ta naŋ fa' kuɗ vun-jobta ta di kaŋu, kuɗ ɓam tokŋa vi sa maariyana ma nisi tunum kaŋŋa.

¹⁵ Vul tuwaŋ goy kaf hay lop namna kayni, kay sumun kaf ma wi wulda vaŋu.

¹⁶ Naŋ ma mus jigere kay ŋom tuwaŋ naŋu, kay ŋom hatta van kaw, hiɗi so-tuwta, kay hay li ma naŋ ka li ki kayn nala, naŋ ma suɗ tuwaŋ goyo, naŋ ma suɗ nisi sa min humaŋu kaw.