1 TIMOTEWUS 3 - BIBALDA TA PELDETTA

Sa ŋom-tapna hiɗi sa sun-tapna

¹ Yoboy namna kayni gasiya, la san min li lop ma ŋom-tapna, nam vilek lop ma ŋaanawa.

² Kay na'ta la litigekaw sa ma ŋom-tapna ma lin mi sa ma law ma joo'o may kuɗumɗi, jufna vi cat kepe, tel tuwamu, yali, tap tuwam hiɗi sumuna, vi sumun ŋaa'a, wi yal kay hat sumuna,

³ tuwam may vuli goy tam dolaynɗi, waskayɗi, ɗiliya, gar cireptaɗi, dar gurjutɗi kaw,

⁴ sa ma ŋom ziyna valam ŋaa'a, sa ma gurona valam gati kuɗum ŋaa'a, hay hum-vunda kaw.

⁵ May la sa wi yal kay ŋom ziyna valamɗi, nam as kot tuw ekklesiyata vi Lawn ɗawn kottige?

⁶ Nam ma lin mi sa ma hamay wuliɗi, kay la nam mi sa ma hamay wuliya, subur-tuwta ma kal hayamu, nam ma nig gaa hay kitata vi Matna.

⁷ Nam ma lin mi sa ma sum sa goy jiyna li di-goyta ŋaata kalamu kaw, kay la naɗi nam ma kal hay ŋulda, nam ɗawn ma nig gaa hay jawta vi Matna kaw.

⁸ Sa sun-tapna kaw ma li tuwsi a sumun slisi yisi kulo'o, ja jarsi goy hiɗi vun ma ma' ma'na, ɦoy kuɗ dolaynɗi, jaŋ kuɗ gurjutɗi,

⁹ may nisi ma lin si sum sa ŋom ŋayayta vi vida hay tap-wida ta peldetta.

¹⁰ nisi ma waksi jewe, la va ma joo may kisiɗi, bugolda nisi ma hinsi li lop ma sun-tapna may.

¹¹ Nala boyna kaw ma li tuwsi a sumun slisi yisi kulo'o, di vun ma tefleɗi, ci dolayn ŋolɗi, li slen pet hay gasita kaw.

¹² Sa ma sun-tapna ma lin mi jufna vi cat kepe, nam ma lin mi sa ma ŋom gurona valamu hiɗi ziyna valam ŋaa'a kaw.

¹³ kay nisi sa li lopna vi sun-tapna ŋaa'a sesi muɗ tiy ŋolo, nisi jor voksi dono'o hay vida hay Kristu Yesu kaw.

¹⁴ Nan ɗo slen kayni taŋu hiɗi varta ala hini neeɗa ɦawa nan ma coys goy vaŋu;

¹⁵ may la yan vi neeɗa, hini kayni naŋ ma wi yal ma poy hay ziyna vi Lawna, namu mi Ekklesiyata vi Lawn ma irina, dolla hiɗi sem gasita ma tuni gaana.

¹⁶ Nay as li di-goyt ala ŋayayta vi narta kuɗ Lawna na' ŋolo: Nam ma vul tuwamawa goy haraŋi hay sliwna, li goy ɗigere hay Ŋusta, Sunda-wuralawna ɗuwumu kaw, nisi kusi labara kalamu jar jaf-sumuna sumun vi hayamu gaa hay nagata, Nam viys kulo'o hay gajijita.