1 SAMUEL 6 - BIBALDA TA PELDETTA

Sum sa Filistin gi ir timgillawa, tunum hay Bet-Semes, bugolda hay Kiryat-Yeyarim

¹ Timgilla vi Ma-Vatɗin li til siɗiya hay nagata vi sa Filistina.

² Nala sa Filistin yi muliyan-sa-ɗifinna hiɗi sa tun gireyta, nisi di'e: Timgilla vi Ma-Vatɗin waŋŋi nay ma lum ɗawn linige? Nigi ma ɗekma yal ma numa ma gum iram hay liyna valamna.

³ Nisi hot dita: La nigi min hot timgilla vi Lawna vi sa Israyella, nigi ma hotom ɦawaɗi, may nigi ma li ɗifin tam Lawna kay suluk ma nigi lumna, nala nigi ma fi yerta-goyta, nigi ma wi va ma Lawn ka ɗek donota valam goy tigi hiɗi namna kaw.

⁴ Sum sa Filistin di'e: Numa ma lum tam Lawn mi ɗifin mige? Nisi hot dit ala: Nigi ma kot sle ma ora vasl ŋray ki mil ma gulut dir san goyn nala, kot sle ma ora vasl kaw, ŋray ki kulomna nala, ŋray dig yerimana vi sa Filistina sa vaslna, kay bakmara namna vigi nigiya, nam vi yerimana vigi sa vaslna kaw.

⁵ Kotgi sle ma ŋray hiɗi moy ma gulut dir san goyna, kotgi sle ma ŋray hiɗi kulomna ma ka vurum nagata vigina, vulgi suburta tam Lawna vi Israyel, nala donota valam ta nam ka ɗeka' goy tigiya, tam nagata vigi kawta, nam ma hina' goy klasige.

⁶ Nigi as muɗ dikgi ɗeŋe, ki sum sa Egiptena hiɗi Farawn kaw muɗ diksi ɗeŋ nala kay mige? Nam may ka kitata valam kisiɗi su? Nam may hin gurona vi Israyel kal goyɗi su?

⁷ Wulin kayni, kotgi keke ma wulin kepe, yawgi luway dukunayna ma' ma guron ka ci miir kuɗum tuwa, ma bay tum juk pelem tuwa; tungi jukŋ kel luway namna, guro ma kuɗumna nigi hotom vo'o may.

⁸ Nigi ma sli timgilla vi Ma-Vatɗina, nigi ma tunum kulo hay kekena; jak hena ma nigi lum ɗifin mi Ma-Vatɗin kay sulukŋa nigi ma yawamu, lakam kulo galam hay timgil mara'a; bugol kayni nigi ma gum iramu, nam ma kala.

⁹ Cukgi irgi kuɗumu, la nam jik hay hagata ta ka hay jaara vi Bet-Semes ni, kayn di ala joo ma ŋol namna kayn lum tay mi Ma-Vatɗina. May la naɗi, nay ma wi ala lay joo kayn may mi namɗi, may joo na'ta co kay kayn kay tuwa'a.

¹⁰ Sum nisina li ki kayn nala. Nisi yaw luway ma' ma guron ka kuɗum ci miir tuwana, nisi jun keken kuɗumu, gurona valam nisi dukum vunam kalafi may.

¹¹ Timgilla vi Ma-Vatɗina hiɗi kulom ma koti hiɗi ora, hiɗi sle ma sli mil ma gulut dir san goyn nalana kaf nisi lakam hayamu.

¹² Luway ma dugunay namna sla' kayn ti hagata vi Bet-Semes ɗiger; nam sli haya na'ta ɗiger, ka gurnaya, nam may cal goy hay gal ma jufɗi lay, cal goy hay ma gulɗi lay. Sa yerimana vi Filistina ka tuɗ bugolomu ta-ta hay jaara vi Bet-Semes.

¹³ Sum sa hay Bet-Semesna ka feɗ alkamarena hay liyn ma beɗna; nisi poŋ irsi kulo na kayni, irsi cuk hay timgilla, nala diksi li firiya.

¹⁴ Keken co hay sinena vi Yosuwa ma Bet-Semesna, bugolda nam cola. Hiɗiy ma ŋol ka hay liy namna kepe. Guna vi keken nisi munum goyo, luway namna nisi ŋalam goy ɗifin tam Lawna.

¹⁵ Sum sa Levitna jik timgilla vi Ma-Vatɗin gaa'a, hiɗi timgil hen ma ka galam hiɗi sle ma or hayna. Nisi lakam kaf kulo kay hiɗiyta ŋolda. Hay buur namna sum sa hay Bet-Semesna li ɗifini hiɗi ma ŋal-goyna tam Ma-Vatɗina.

¹⁶ Hay li ma sa yerimana vi sa Filistin sa vaslna ɗuw kayni kaf ɗuwna, nisi hot vo'o hay Ekron hay buur na'ta de'.

¹⁷ Kayni mi or ma nisi kotom ki mil ma gulut dir san goyn nala ma nisi vulum tam Ma-Vatɗina kay li ɗifin kay sulukŋa visiya: Asdod vul kepe, Gaza vul kepe, Askalon vul kepe, Gat vul kepe, Ekron vul kepe may.

¹⁸ Kulom ma koti hiɗi ora kaw nisi vulum kayni, nam ŋray dig hoyok-ziyna ma ka gaa kuɗ gaŋeraŋa vi yeriman sa Filistin vasl kafe, la mi hoyok-ziy ŋulo ma gulmun ŋuyi talamna lebo la mi hoyok-ziy ma gurayna kaw. Ta-ta vaydi kaw, hiɗiyta ŋolda ta ka hay sinena vi Yosuwa ma Bet-Semesna, ta nisi bur timgilla vi Ma-Vatɗin kulo ka'ta, na' ka gay humay kay law namna.

¹⁹ Ma-Vatɗin ci sum sa hay Bet-Semesna hay li ma nisi ɗuw timgilla vi Ma-Vatɗina, nam ci sumun dok-siɗiya kuɗ sa birim dok-vaslna. Sumun kaf kal hay yorta, kay Ma-Vatɗin cisi hiɗi bakmara ma ŋolla.

²⁰ Sum sa hay Bet-Semes di'e: Ma-Vatɗin Lawn nam ma peldetna, sa ma as hin kulo vokom irin ɗawn mi gige? Timgil namna nay ma gum iram ɗawn ara mayge?

²¹ Nisi gi sunda tam sum sa hay Kiryat-Yeyarimna kay disi ala: Timgilla vi Ma-Vatɗina sum sa Filistin hotomiyawa, nigi ma co'o kay slumis goy gal vigiya.